Bréfin frá Magneu 71-135

Bréf 71                                                                                       Purkey 31.maí 2010

Kæri Georg.

Mikið má hún Bjarnfreður vera stolt af þér, bara á leið í borgarstjórastólinn hvorki meira né minna. Það má nú segja það, ekki datt mér í hug eitt augnablik að þú ættir eftir að verða svona frægur. Eymingja Hanna Birna að þurfa að lúta í gras fyrir meiraprófsbílstjóra, þetta hefur varla nokkrum manni dottið í hug, ég segi „no more.“

Veit Wasington af þessu ? Þú verður að senda honum skeyti, eða bara að bjóða honum þegar þú tekur við keðjunni.

Ég var að heyra í Sigmundi glópalán, mér heyrðist hann lýsa yfir stórsigri Framsóknar hér umbil um allt land. Sama var með Bjarna gæsalappa Ben, það var helst að skilja á honum að Sjálfstæðisflokkurinn væri hinn eiginlegi sigurvegari kosninganna, hann hefði fengið miklu fleiri atkvæði heldur en síðast. Ég bara skil ekkert í því hvaðan atkvæðin sem þú og þinn flokkur fengu komu, „I do not understand.“

Steingrímur bað menn bara að skoða úrslitin í samhengi, þá sæju menn að raunverulega hafi Vinstri Grænir unnið stórsigur svona á heildina litið, „totally.“

Goggi minn þú verður frábær borgarstjóri og svo verður svo gaman á fundum með þér, ekki þetta alvarlega röfl með og á móti, heldur brandarar hægri og vinstri eins og þú sagðir. Svo maður tali nú ekki um allar meðmælagöngurnar sem sá besti á eftir að standa fyrir. Ekki fleiri mótmælagöngur í henni Reykjavík, bara gaman, „you say so.“

Ég er að velta fyrir mér hvort þú gætir ekki reddað einhverju embætti fyrir Bubba frænda, hann er svo leiður yfir því hvernig Hanna Birna fór með hann, alveg í rusli. Þetta þarf ekki að vera neitt merkilegt. Hann er með meirapróf eins og þú, svo þú skilur þetta alveg.

Hann Bubbi minn á það til að fá naglakul, svo það væri ágætt ef hann fengi einhverja innivinnu. Hann gæti til dæmis séð um að opna hurðir fyrir þig og loka þeim aftur þegar þú hefur gengið um þær.  Eða bara skrifað eitthvað fyrir þig, kannski á gula miða þú veist, svona minnismiða.

Ég verð bara að spyrja, hver er þessi Jón Gnarri ?  Eruð þið kannski tvíburar þú Goggi minn og þessi Jón Gnarri eruð svo líkir, bara eins og eineggja tvíburar.

Hvað um það Georg minn ég skrifa þér örugglega fljótlega aftur, þangað til bestu kveðjur til þín og þíns flokks.

Þín einlæga Magnea

 

 

Bréf 72                                                                                       Bankaey 4.júní 2010

Kæri Eiríkur.

Þessi rannsóknarskýrsla sem gefin var út af óvinum Seðlabankans, er nú meira bullið. Auðvitað voruð þið Davíð alltaf að vara við. Auðvitað voruð þið Davíð alltaf klárir á stöðu bankanna. Þessir illpennar sem nú hafa ráðist á ykkur eru ekkert annað en öfundsjúkir og illa uppaldir lúserar, „ I mean it.“

Eins og þú sagðir þá voru virtir endurskoðendur búnir að skrifa upp á alla reikninga og uppgjör Landsbankans tíu mínútum fyrir hrun, og þá var allt í þessu fína lagi.

Hvernig dettur svo nokkrum manni í hug að halda því fram að Seðlabankastjórar hafi haft eitthvað með þetta að gera ? Meira að segja var Jonni í fjármála eftirlitinu búinn að gefa bönkunum næsthæstu einkunn bæði fyrir og eftir hrunið.

Ég er alveg viss um að þessar aðfinnslur út í ykkur í þessari svonefndu rannsóknarskýrslu er tóm lygi,  „I say so.“

Þið Eiríkur minn og þeir félagar þínir Davíð og hvað hann nú heitir þessi þriðji,  voruð alltaf með þetta á hreinu. Ég er sannfærð um að allar þessar viðvaranir frá Seðlabönkum í útlöndum hafa ekki átt víð Seðlabankann ykkar, enda segir þú að hrunið hafi ekki verið þér að kenna, ég bara spyr, hver heldur það í alvöru ?

Nei það á að stinga allri þessari rannsóknarnefnd í steininn og láta þetta fólk endurskrifa Litlu gulu hænuna.

Eiki minn það er rétt hjá þér að skrifa þina eigin höfuðlausn, það gerir það víst enginn fyrir þig.

Bestu kveðjur.

Magnea,

 

 

Bréf 73                                                                           Kolbeinsey 5.júní 2010

Kæri Georg.

Þá er komið að því að óska Bjarnfreði til hamingju með strákinn, bara orðinn borgarstjóri hvorki meira né minna. Það var sniðugt hjá þér að hafa Dag með þér. Það hefði verið hræðilegt ef þú hefðir valið Sylvíu Nótt með þér í þetta oj barasta. En auðvitað er klókt af þér að hafa einhverja sam-eitthvað til að tilkynna okkur ef til dæmis þarf að hækka orkuna eða útsvarið.

Þú tekur að þér allt það sem skemmtilegt er og lætur Dag um leiðindin, enda sagðir þú alltaf að það ætti að vera gaman, minn maður segi ég bara , „me man what else.“

Ég ætlaði alltaf að minna þig á loforðið sem þú gafst fyrir kosningarnar, þú manst þetta með bílstjórann. Ég er alveg til í að vera einkabílstjórinn þinn og sitja í farþegasætinu eins og þú sagðir, ætlarðu sjálfur að keyra. Þetta hentar mér stórvel, ég nefnilega missti prófið um daginn.

Nú getur þú keyrt og ég sem einkabílstjóri drukkið mitt bús án þess að eiga á hættu einhver leiðindi frá löggunni. Pott þétt, „I say no more .“

Voruð þið ekkert lofthræddir þarna uppá þakinu? Einhverjir höfðu orð á því að réttast væri af ykkur að hoppa framaf og taka flugið. Það er nú það, alltaf eru einhverjir brandarakallar á ferðinni.

Ég er enn að velta fyrir mér þessu Jóni Gnarra sem allir eru að tala um. Er hann ekki bara bróðir þinn Goggi minn ? Er hann ekki bara einhver leikari eða svoleiðis ? Þú verður sko góður þegar þið komið saman í norrænu  Borgarstjórapartíunum þú kannt svo mikið sænsku. Þú verður sko ekki í vandræðum með að tjá þig í þeim. Mundu bara að drekka ekki of mikið.

Þú skalt ekkert taka mark á honum Dabba Staksteinssyni, hann bara öfundar þig fyrir hvað þú ert fyndinn og frumlegur. Honum datt aldrei í hug að gera neitt fyndið meðan hann var  Sebastían borgarstjóri.

Það verður annað upp á teningnum núna, „yes me frend.“

Elsku Georg minn gleymdu mér ekki þegar þú hugar að einkabílstjóra fyrir næstu ár.

Ég á eftir að skrifa þér fljótlega Goggi minn.

Þín Magnea.

 

 

Bréf 74                                                                                       Engey 18.júní 2010

Kæri Georg.

Mikið er ég stolt af þér. Bara búinn að fá Hönnu Birnu í liðið með þér, ekkert smá afrek, „I mean it.“

Bjarnfreður hlýtur að vera í skýjunum yfir velgengninni hjá þér. Flottur Georg í Höfða þegar þú afhentir konunni einhver verðlaun eða heiðurseitthvað.  Það þurfti svo sem að gera athugasemd þetta pakk sem er ekki með á nýjustu tískunni. Hvað heldur þú að þetta hyski hafi verið að nöldra nema hvað ? Það fann það út að þú hafir ekki verið með bindi þarna í Höfðanum og segir meira að segja að það hafi aldrei séð þig með bindi, svo fussar það og sveiar. „You dont care. I dont care.“

Þetta pakk getur sko verið með eins mörg bindi eins og það vill. Því kemur sko ekkert við hvort þú sért með bindi eða ekki, og hana nú. „I mean it.“

Flott af þér að gefa í sund fram á haust flottur Georg ég segi ekki annað. Nú er enginn afsökun fyrir börn, unglinga og gamalmenni að fara í sund og hafa það næs í pottunum innanum allar sætu skvísurnar, maður lifandi.

Hvaða Jón Gnarr eru menn alltaf að tala um ? Það ert þú Georg Bjarnferðarson sem ert Borgarstjóri, en ekki einhver Jón Gnarri, er  það ekki alveg ljóst ? Þetta eru nú meiri grínararnir sem eru að uppnefna þig Georg minn. Jón Gnarri ég á bara ekki orð, „no man. I mean it.“

Getur þú Goggi minn ekki látið hann Gísla litla Martein hafa eitthvað að dunda sér við ? Hann er jú búinn að mennta sig í stórborgar hjólastígum í Edinborg, þar sem fólki dettur ekki til hugar að hjóla eitt eða neitt. Hann er svo kjút að hann Gísli minn Marteinn. Það er ekki hægt að segja sama um Júlla Vífil, láttu hann bara gera eitthvað sem ekki skiptir neinu máli, því verður klúðrað hvort sem er. Hann gæti til dæmis verið að snudda kringum tónlistahúsið, hann er víst hámenntaður söngvari þó ekki búinn að syngja sitt síðasta.

Elsku Georg láttu ekki trufla þig þótt fólk sé að uppnefna þig, haltu fast við stefnuleysið og grínið. Ég skrifa aftur við tækifæri

Þín einlæga.

Magnea

 

 

Bréf 75                                                               Heimsakaey 22. Júní 2010

Kæri  Pétur.

Mikið skil ég þig vel, það er ekki mikið varið í þetta þingdrasl, ég bara skil ekkert í því hvað þú ert eiginlega að gera með að sitja á þessu þingi. Það er ekki einu sinni hægt að lifa á þessum lúsarlaunum sem borguð eru fyrir það. Þeir þarna sem ráða þessu gefa bara ekkert fyrir alla menntunina,  heil átta ár í Súpergaggó á Melunum og reynsluna sem þú býrð yfir, þeir eru kannski búnir að gleyma hver stofnaði Kaupþingi  eða hét það Raupklink, ég man þetta aldrei. Svo má ekki taka við neinum mútum, svo ég skil þig vel þegar þú segist ekki nenna þessu lengur. Það er bara ekkert varið í þetta, „no man.“

Þú ert ekki einn um að þegja yfir mútunum, er ekki Kristján flokksbróðir þinn og hún Unnur Brá flokkssystir þín í sömu  sporunum svo má ekki gleyma henni Jónínu Rós sem er í vinstri armi Sjálfstæðisflokksins sem sumir kalla Samfylkinguna, hún Jónína er svo sæt, að mann langar bara að fara á þing, „yes man I love her.“

Hálf milla hvað með það, hún þarf ekkert að muna hvaðan svoleiðis smáaurar komu, ég meina.

Nei Pétur minn ég segi bara gefðu skít í þetta Alþingi sem er ekkert annað en samkoma mútuþega svona á heildina litið, „I mean it, fuck them all.“

Áttu ekki ennþá eitthvað í sparisjóðunum? Þú veist fé án hirðis eða eitthvað svoleiðis. Mér er sagt að það hafi glatast. En ég trúi ekki að þú með margar Súprgaggó gráður í allskonar peningafræðum, eftir átta ára nám þar, hafir tapað á þessum sparisjóðum,„no way.“

Elsku drengurinn minn mikið hlakka ég til að sjá þig á kassa í Bónus, þegar þú verður laus af þessu leiðindaþingi þarna niður á Austurvelli. Þú færð áræðanlega greitt þar eftir þekkingu á fé bæði án og með hirði. Þar er líka til sölu fé sem er búið að sundurgreina og frysta og pakka í þægilegar umbúðir fyrir okkur aulana,  sem höfum ekkert vit á fé hvorki dauðu né á fæti.

Þessi skrif um þig í ekki mogganum er ekkert annað en einelti, „I say so and mean it.“

Jæja Pétur minn ég skrifa þér svo aftur við tækifæri

Þín einlæga

Magnea

 

 

Bréf 76                                                                           Hellingsey 13.ágúst 2010

Kæri Gylfi.

Það er ekki að spyrja að því Gylfi minn, það bara má ekkert orðið nú til dags. Það má ekki skrökva að lýðnum, það má ekki þegja yfir leyndarmálum, það má bara ekki neitt fyrir þessu pakki. Það má ekki einu sinni túlka tölvupósta hvað þá meir. Þetta eru sannarlega erfiðir tímar Gylfi minn.

Þessir svokölluðu kjósendur eru svo ofan á allt að væla um að þú farir í langt langt frí og sumir hverjir að þú komir bara ekkert aftur, þvílíkt og annað eins segi ég nú bara.

Hver á svo sem að taka við ? Bjarni gæsalappi ? Sigmundur glópalán ? eða bara Georg Bjarnfreðarson ? Það væri mátulegt á þetta pakk að fá einhvern þessara í stólinn þinn „yes“.

Nei Gylfi minn haltu þínu striki og láttu þessa helvítis kjósendur ekki hringla í þér, ég treysti því að þú getir skilið frá tölvupósta og maður tali nú ekki um lögfræðiálit sem ekkert erindi eiga við lýðinn.

Það er bara ekki hægt að stjórna ef allt á að vera uppi á borðinu fólk ætti nú að skilja það eftir 30 ára stjórn Sjálfstæðis- og Framsóknarflokkanna. Svo er bara ekkert borð nógu stórt til að hafa allt uppá því „no man“ En þetta skilur ekki pupullinn.

Gylfi minn haltu þínu striki, ekki segja of mikið, geymdu leyndó í neðstu skúffunni og mundu að læsa henni svo helvítis þvottakerlingarnar komist ekki í hana.

Ég þarf að segja þér svo mikið elsku Gylfi minn, en það verður að bíða betri tíma.

Bless bless drengurinn

Þín Magnea

 

 

Bréf 77                                                            Frammey 15. September 2010

Kæri Sigmundur glópalán.

Ég varð svo glöð að heyra og sjá ykkur og Tryggva Herberts á INN-inu hans Ingva Krumma í gærkvöldi.

Þar voru sko orð í tíma töluð, það verð ég að segja, þú hefðir átt að koma fram með þessa snilld miklu fyrr og víðar, ég segi bara ekki meir.

Auðvitað eru laun ykkar alþingismanna allt of lág, það sjá nú allir. Þú hittir sko naglann á hausinn þegar þú sagðir að alþingismenn á sultarlaunum væru sko kjörin fórnarlömb fyrir þá sem vildu styrkj…….eee leggja til syrkj…….eee  fyrir kosningar smá ölmus……eee múta þeim.

Hvaða alþingismaður á þessum sultarlaunum sem þið hafið getur staðist nokkra þúsundkalla sem til falla svona frá einum og öðrum góðviljuðum borgurum ? ég bara spyr.

„I simply ask.“

Hver sér það ekki í hendi sér að þið verðið að verja ykkur fyrir ágangi þeirra sem sjá aumur á ykkur og vilja bera til ykkar nokkra þúsundkalla til að létta ykkur störfin á alþinginu ykkar.

Auðvitað hittirðu naglann aftur beint á hausinn þegar þú sagðir að besta leiðin væri að hafa kaupið svo hátt að nokkrir þúsundkallar frá velunnurum skiptu engu máli, „yes man.“

Svona á sko að kveða niður styrk……. ee mút…… eee þá sem vilja gera ykkur gott með smáaurum, ég er nefnilega viss um að þessir velgerðarmenn vilja eitthvað fá í staðinn þótt síðar verði.

Flott hjá  Herberti að segja að þú hafir opnað nýja sýn á þessar  gjaf….. ee mútu….. eee styrki til ykkar. Hann á þakkir skyldar fyrir það.

Ég vissi alltaf að við framsóknarmenn væru strangheiðarlegir og létum ekki múta okkur nema buddan væri tóm, „no way.“

Jæja Simmi minn, haltu þessu bara áfram og ekki bakka sentimeter með þessa sjálfsögðu kröfu um mannsæamandi kaup fyrir að sitja í þessum allt of mjúku stólum á alþinginu ykkar „no  way.“ Þetta eru jú bara mannréttindi. „Yes.“

Bestu kveður

Magnea

 

 

Bréf 78                                                                        Garðaey 15.sept 2010

Kæra Gerða

Mikið er ég lukkuleg yfir því að þú sért kominn á þingið aftur. Það veitir ekki af að fá skörunga eins og þig til að sporna við vitleysunni í þessum vinstri grænu og öðrum kommúnistum sem eru að hrekkja ykkur  og hóta ykkur einhverjum málssóknum og svoleiðis.

Ykkur alsaklausum að hugsa sér frekjuna. Hvað gat hann Geir okkar gert þegar allir háir og lágir lugu að honum ? Meira að segja Jón Ásgeir laug, hann sem talinn er alsaklaus, ábyggilegur og maður tali nú ekki um strangheiðarlegur. Þeir hjá pwc segja það og ekki ljúga þeir blessaðir endurskoðendurnir, ónei, „never.“

Það má svo sem draga þessa Samfylkingar þrjóta hvert sem er fyrir mér, en ekki hann Árna minn og þá ekki heldur hann Geir okkar Haarde, nei nei ekki þá því þeir vissu ekkert annað en allt væri í þessu fína lagi eins og Dabbi sagði allan tímann, yes.

Svo eru þetta úrelt lög sem á að beita á ykkur sakleysingjanna,“ yes.“

Það ætti að vera búið að afnema svona lagaskrípi fyrir löngu.

Elsku Gerða mín ég treysti þér einni til að leiða þessa þrjóta á þinginu sem endilega vilja hrekkja, til þú veist. „Yes fuck them all.“

Láttu nú kné fylgja kviði og gerðu það sem þú ert best í þú veist og láttu þá svo ekki sleppa með nein kúlulán frá þessu. Kærðu Steingrím og Atla fyrir valdníðslu, þeir eiga ekkert betra skilið. „No yes no.“

Þeir hafa ekkert að gera á þinginu ef þetta á að vera helsta verkefni þingsins.  Þeim er nær að hæla betur niður skjaldborgina sem Jóka reisti  til að við fengjum ekki skuldaregnið beint í hvirfilinn, „yes“ segi ég og aftur „yes.“

Elsku Gerða mín ég skrifa þér meira seinna.

Þín einlæga,

Magnea

 

 

Bréf 79                                                                                    Aumaey 27.sept 2010

Kæru Íslendingar.

Spáð er að yfir 1,000 íbúðir verði boðnar upp fyrir áramótin 2011. Núverandi eigendur verða fyrrverandi eigendur.

Reglufólk verður óráðsíu gjaldþrota skítapakk sem á að halda kjafti. „I say so, yes“

Ég segi bara, þetta er ykkur sjálfum að kenna og engum öðrum. Ykkur var nær að ana út í þessi íbúðarkaup. Hvaða vit var í að taka lán til að kaupa í þessum steypukössum ? “I simly ask bara“ .

Nú eruð þið eins og eymingjar vælandi og skælandi yfir því að bankasnillingarnir plötuðu ykkur upp úr skónum. Hvað eruð þið svo að rífa kjaft ? þið kusuð þetta yfir ykkur „ I mean it yes“

Svo er ég sannfærð um að þið kjósið næst þegar þið fáið tækifæri til þess, sama fólkið og gerði ykkur gjaldþrota og eignalaus með stórar skuldir á baki barnanna ykkar, stimplað óráðsíupakk. „yes“. Gott á ykkur. Þið völduð þetta sjálf.

Svo kennið þið smiðnum sem er að setja nýja rúðu í útihurðina sem pörupiltarnir brutu, um að hafa brotið rúðuna, ekki nóg með það, þið skammið smiðinn meira að segja fyrir að rúðan sé hálf mött, þótt hún sé ódýrari en sú sem var fyrir. „fock you all „

Hvað á að gera við 4,000 íslendinga sem verða á götunni, eftir að þessi boðuðu uppboð eru gengin yfir ? Verða settar upp flóttamannabúðir eins og við sjáum í sjónvarpinu frá útlöndum? Hvít tjöld í röðum með kamraröð við endann. Stefánar J. Hafsteinar með hrísgrjónapotta og vatnsausur gangandi milli tjaldanna skammtandi hungruðu óráðsíupakkinu lágmarks hitaeiningar svo Sameinuðu þjóðirnar hætti við að nöldra. „Good for you, I mean it“

En hvað ef svo sem 500 af þessum 4,000 gjaldþrota óraðsíu þú veist hvað, tækju sig saman og stormuðu Alþingi. Mokuðu öllum þessum ráðsettu og grandvöru þingmönnum út og settu nokkrar húsmæður í að laga til í heimilisbókhaldinu. Hvað getur löggan svo sem gert ef fimm hundruð manns taka á sig rögg, löggur verða líka gjaldþrota og einhverjir þeirra kæmu úr flóttamannabúðunum. „yes me frend“

Þetta sama óráðsíufólk gæti svo farið í kaffi í bankana og tekið til í lánasöfnunum, maður tali nú ekki um skuldapottana og svo þarf að skúra gólfin þar, maður lifandi. „yes“

Jæja kæru Íslendingar ég hef þetta ekki lengra að sinni.

Kærar kveðjur

Magnea

 

 

Bréf 80                                                                                       Djókey 1.okt.2010

Kæru Íslendingar.

Þið eruð enn vælandi og skælandi yfir óförum ykkar. Hvað haldið þið að það hafi uppá sig ? ég bara spyr.  Þið sem kusuð Íhaldið og framsókn í áratugi eigið ekki betra skilið en híma undir vegg með hor og slefu niður á bringu. Ef þið haldið að það sé einhver skjaldborg í kringum ykkur þá eruð þið bara auðtrúa almenningur, svokallaður. Auðvitað átti Jóhanna við tjaldborg en ekki skjaldborg.

Það verður spennandi þegar tjaldborgin hennar Jóhönnu  verður risin í Laugardalnum, eitt tjald fyrir fjóra, það þýðir 1000 tjöld fyrir 4000 fátæklinga sem ekki kunnu að fara með góðærið. „yes dear“

Það hefur ótvíræða kosti að búa þröngt, til dæmis þarf ekki þetta glingur sem þið hafið safnað um ykkur í góðærinu og sett á borð og  glugga. Það er hvort er búið að taka það upp í skuldir, verið fegin,  „I mean it“.

Svo má örugglega fá leyfi hjá Jóhönnu og Steingrími til að fara í bað í Laugardalslauginni svo sem einu sinni til tvisvar í mánuði, og þá að sjálfsögðu að nóttu til. Það má ekki trufla heiðvirkt og grandvart fólk, sem kunni að fara með góðærið. „No way“ En gleymið ekki að svoleiðis hlunnindi eru ekki skattfrjáls.

Nýr afbrotaráðherra er að láta skrifa fyrir sig nýtt kerfi sem gengur út á að þeir sem sitja inni á Litla Hrauni fyrir ýmis afbrot verði látnir dæma um hvort sækja á einhverja smá þjófa og færa fyrir dóm.

Hann segir að þetta hafi verið reynt nýlega á Alþingi og hafi svínvirkað. „ Yes yes yes „. Svo verður komið á hagsmunasamtökum smákrimma og öðrum hagsmunasamtökum fyrir hvítflibbakrimma. „I say no more „

Ég skrifa ykkur fljótlega aftur.

Ykkar einlæga

Magnea.

 

 

 

Bréf 81                                                                                       Útsvarsey 16.okt.2010

Kæru Íslendingar-2

Enn eruð þið ræflarnir sem ekki kunnuð að fara með góðærið vælandi yfir því að vera kominn undir hamarinn hjá fógeta. Auðvitað segi ég bara, „yes .“

Hvað með það þótt það verði að loka spítölunum ? þið eydduð öllum peningunum svo ekkert er eftir nema tap. Hvernig á svo sem að halda uppi spítölum þegar engir peningar eru eftir ?  „I ask you “ bara.  Það verður að verja fyrirtækin í landinu svo ekki sé nú minnst á bankana fyrir falli,  „I say”.

Er ekki nær að afskrifa skuldir heldur en að eyða peningunum í einhverja spítala og heilsugæslur, með því er hægt að bjarga helling af góðum kompaníum og bjarga útvöldum góðærisvíkingum. Maður nú ekki tali um að rétta þeim hjálparhönd. Hvaða vit er í að hjálpa þessu pakki sem ekki hafði vit á að taka lán og fjárfesta í góðærinu ? ég bara spyr.

Afskriftir Nóna dótturfélag Skinneyjar-Þinganess Halldórs Ásgrímssonar eru ekki nema 2,6 milljarðar. Sennilega þarf ekki að afskrifa nema hluta af 15 milljarða skuld Ölgerðarinnar, „pease of cake man”

Jóhannes fékk bara 782 millur afskrifaðar enda bara framkvæmdastjóri hjá Glitni.

Félagið AB158 ehf í eigu Inga Rafns fékk litlar 519  millur afskrifaðar enda bara forstöðumaður hjá Glitni.

Félagið HEKT í eigu Eggerts Þórs fékk afskrifaðar 510 millur hann var bara framkvæmdastjóri hjá Glitni

Bjarni Ármannsson fékk bara afskrifaðar 800 milljónir hann var bara forstjóri Glitnis.

Þetta eru bara Glitnisgaurar og hann Halldór okkar Ásgríms og slekt, rúmlega 19 milljarðar, bara smáaurar, tekur ekki að tala um það.

Þið sem kusuð íhaldið og framsókn kusuð þetta ástand yfir ykkur og eigið bara að vera stolt yfir því. Maður tali nú ekki yfir því að fá að leggja samfélaginu til verðmæti í húsunum ykkar sem eru undir fógetasleggjunni. Hvað hafið þið svo sem að gera við spítala og heilsugæslur ég bara spyr ? Hvað á það að þýða að vera með þessi mótmæli ? hverju er verið að mótmæla ? Pétur Blöndal sagði að það væri verið að mótmæla rúðubroti í húsi guðs við Austurvöll hvað veit ég ?

Nei kæru landar verið ekki með þetta sífellda nöldur út í íhaldið hvort heldur það sé samfylkingar eða framsóknaríhald eða bara gamla sjálfstæðisíhaldið, verið ánægð og fagnið með þeim sem fá afskriftir það eru okkar menn og konur. „yes”

Lengra verður þetta ekki að sinni, bestu kveðjur

Magnea.

 

 

 

Bréf 82                                                                                       Spáey 18.okt. 2010

Kæri T Þór Herbertsson

Mikið fannst mér þú klár á útvarpi Sögu í morgunn. Þú sagðist hafa spáð hinu og þessu og vissir alltaf að allt færi til fjandans. Meira að segja sagðist þú hafa spáð því fyrir nokkrum árum að öldruðum myndi fjölga um 500 frá þeim tíma sem spáin átti að ná yfir, en fjölgunin reyndist vera 1500. Þetta kallar maður nú spá í lagi. Svona eiga spámenn að spá. Voru fleiri spár álíka nákvæmar ? ég bara spyr ? „ I ask simply“.

Voru efnahagsspárnar líka svona rosalega nákvæmar ? eða svoleiðis ? Höfðu spárnar eitthvað að gera með það að Geir Haarde lét þig útfyrir dyrnar á ráðuneytinu ?  Í þessu samhengi, vast þú ekki í súpergaggó i að læra að lesa í spákúlur, ásamt Þjófnum og hinum sem þú varst að skamma fyrir einhver ummæli um ástandið á Íslandi í dag.

Hvernig var það nú aftur með skýrsluna ykkar Frederic Mishkin sem þið skrifuðuð 2006 fyrir viðskiptaráðið ?  Þar var sko ekki skrifað neitt ljótt um bankana. Fékk ekki Frederic ekki eina 124 þúsund dollara fyrir skrifin?  Hvað skyldi þú hafa fengið í þinn hlut ?

Ég nenni ekki að skrifa þér meira, því þú ert svo hrikalega leiðinlegur. „boring-boring-boring“

Magnea

 

 

Bréf 83                                                                                      Þingey 20.okt.2010

Kæra Margrét Tryggvadóttir

Þá er að koma mynd á framboðin til stjórnlagaþingsins, 500 manns í boði hvorki meira né minna.

Í Laxdælu má lesa þetta. “Það vil ég að þeir ráði sem hyggnari eru, því verr þykir mér sem oss muni duga heimskra manna ráð er þau koma fleiri saman,”

þessi orð eiga við í dag og spái ég að þau eigi eftir að ganga eftir  varðandi stjórnlagaþingið.

Ég legg til þýðingaraðferðina það er að þýða Þýsku, Bandarísku og Frönsku stjórnarskrárnar og láta svokallaðan almenning velja milli þeirra í þjóðaratkvæðagreiðslu. Og  gefa alþingi  fríi á meðan. Best að senda þingmenn í golf til Indlands eða Tælands á meðan. Ef það vantar eitthvað í þessar stjórnarskrár er það ef til vill að kveða þurfi fastar að því að auðlindir séu þjóðareign og óseljanlegar frá ríkinu, einnig að það megi ekki úthluta þeim til einstaklinga, eins og gert hefur verið með fiskinn.

Þín

Magnea

 

 

Bréf 84                                                                                       Þursey 23.okt.2010

Kæra Jóhanna.

Nú er lag. Nú er sko lag til að laga allt sem laga þarf, „yes“  Nú er bara að aftengja þessa arfavitlausu stjórnarskrá, þá er hægt að reka þingmenn í golf til útlanda, svo meðan þeir eru þar en nú aldeilis hægt að taka til, maður lifandi. Fyrst er að skipta um gjaldmiðil. Taka má upp hvaða gjaldmiðil sem er til dæmis mætti taka upp gjaldmiðilinn skeljar. Skeljar er ágætis orð yfir nýjan gjaldmiðil, skeljar voru jú notaðar af forfeðrum og mæðrum okkar samanber leggur og skel. „leggs and shells“ Þá þarf augljóslega að fara fram peningaskipti . Til að gæta fyllsta sanngirnis og hvika ekki frá réttlætinu væri rétt að hafa skiptin með þessum hætti:

1. Þeir sem eiga 1 milljarð eða meira fá skelina á 10 aura.
2. Þeir sem eiga 100 milljónir til 1 milljarð fá skelina á 50 aura.
3. Þeir sem eiga 10 til 100 milljónir fá skelina á 75 aura.
4. Þeir sem eiga 1 til 10 milljónir fá skelina á 1 krónu.
5. Þeir sem eiga 1 krónu til 1 milljón fá skelina á 300 krónur

Þeir sem hafa 4 milljónir í tekjur á mánuði og eru á atvinnuleysisbótum fá eins mikið af skeljum og þeir geta borið út úr skiptastöðinni.

Þeir sem eru atvinnulausir og á bótum fá ekki að koma svo mikið sem inn á lóð skiptistöðvarinnar. Þeir geta reynt að skipta sínum vesælu krónum á svartamarkaði Péturs Bl. Þegar hann kemur úr golfinu. „easy me dear“ ekki satt ?

Nú á þessum tímapunkti er engin verðbólga, ekki satt ? Nú þá er bara að ákveða að vextirnir séu í samræmi við eign fólksins í skeljum. „of course“

Dæmi: þeir sem eiga 1 milljarð eða meira fá 300 % vexti, þeir sem eiga 1 krónu til eina milljón borgi ríkinu 50 % af eign sinni í vexti. „reasonabble fair“ ekki satt ?

Elsku dúllan mín svona er þetta nú einfalt.  Bara setja í gang og drífa í þessu. Vitleysingarnir á þinginu verða bara hálfan mánuð í golfi, svo tekur ekki nema þrjá daga að láta renna af þeim, svo þú séð að nægur tími er til að framkvæma þetta. Þegar þeir svo koma til baka skilja þeir ekkert í þessum skeljum, það gerir ekkert til þeir hafa aldrei skilið neitt hvort sem er. „yes“  Jóka mín, „you are the best“.

Ég skrifa þér aftur þegar ég fæ næstu vitrun Jóka mín. Bless bless, „I love you“

Þín Magnea.

 

 

Bréf 85                                                                           Þursaey   12.nóv.2010

Kæri  Finnur.

Mikið er ég ánægð núna. Ég var að lesa höfuðlausnina sem þú lést skrifa í Fréttatímann. Svona eiga Finnar að gera, „yes“. Þessir mannorðníðingar sem hafa vaðið uppi undanfarið með lygum um þig fengu aldeilis „gomoring“ hjá þér.

Svona lygalaupar ættu að skammast sín fyrir níðið um þig. Auðvitað ertu gegnheiðarlegur eins og til dæmis Davíð og Halldór, sala á einhverjum banka kom þér auðvitað svo gott sem ekkert við. Þú varst aldrei neinn S-maður hvað þá heldur SS-maður ó nei. Auðvitað áttir þú engan þátt í kaupum á Frumherja né neinu fyrirtæki sem illpennarnir eru að bulla eitthvað út í loftið. Ekki er það þér að kenna þótt eitthvert fyrirtæki sem þú í fyrir algjöra tilviljun eigi sjötíu og eitthvað millur, „ no me frend“.

Það voru einhverjir aðrir sem voru að FIKTA í þessu, en ekki þú elsku drengurinn. Svo voru þessir þrjótar að gefa í skyn að þú hafir grætt eitthvað á mælum sem vinur okkar Alfreð Þorsteins þröngvaði uppá Frumherja geng vilja eigandanna.

Alfreð er grandvar maður sem veit uppá hár hvernig bissness virkar. Hann sparaði Orkuveitunni stór fé, með því að losa hana við allt þetta mæladót, „no question about that“

. Auðvitað er staðreyndin sú að Frumherji tapar bara á þessu mæladrasli, svo segja níðingarnir að það hafi verið einhver  tengsl milli ykkar framsóknarmannanna, svei þeim bara. „ I say fock them all“

Svo er reynt að koma því inn hjá þjóðinni að þú og Jafet séuð einhverjir sérstakir félagar. Ég hef nú þekkt þig lengi og veit að þetta er bara bull og óhróður um ykkur félaganna. „lies,lies,lies“.

Þó þið eigið eitthvert eyðikot á Snæfellsnesi þarf það ekki þýða að þið séuð einhverjir félagar. Auðvitað hittist svo á, að þið séuð á sama tíma í kotinu. Ekki er það svo, að þið ræðið ekki saman þegar svo stendur á.  Ekkert er varið í að dreypa á rauðvíninu einsamall .„nonono“.

Ég er bara svo hissa á þessu að ég bara verð að fá mér einn og leggja mig. Skrifa þér við tækifæri Finnur minn.

Bestu kveðjur, þín

Magnea

 

Bréf 86                                                                       Háskólaey 16.nóv. 2010

Kæra málnefnd.

Í dag hefur þú miklar áhyggjur af íslenskunni. Ekki nema von.  Háskólasamfélagið er enskuskotið eftir  veru í Súpergaggóum landsins. „no question about that“.

En við svokallaður almenningur eigum eftir að develópa  og evalueita þetta, „yes“. Það nær bara ekki nokkurri átt að annað tungumál sé talað í háskólasamfélaginu en meðal svokallaðs almennings. NOyesNOyesNOyes“.

Ég er svo sammála þér að þetta nær ekki nokkurri átt, háskólasamfélagið verður að taka sig á og tala íslensku. „what else“ ?.

Ekki má með nokkru móti glata málinu eins lyriskt og það er. Ég verð að segja  það. Eftir viku dvöl í útlöndum er ekki nema von að fólk ruglist smá á orðum eins flókið það er að læra á einu máli og tala svo annað mál.

Með lyriskri meðferð og  raunverulegum raunveruleika á málinu má ná heilsteyptu og samhangandi  máli sem allir skilja eins. „No problem“.  Með vandaðri notkun á okkar mjúka geometríska ilhýra grátóna máli gætum við með tímanum talað saman og skilið hvort annað. Ég segi bara bæbæ í bili.

Þín.

Magnea

 

 

Bréf 87                                                                                     Gæsalappaey 19.nóv.2010

Kæra þjóð.

Vitið þið að fyrir einn milljarð, það er upphæðin sem Villtist í vasa Jóns Ásgeirs ef eitthvað er að marka fréttir, er hægt að greiða 200.000 krónur, fimm þúsund sinnum ?

Vitið þið að fyrir 2,6 milljarða, það er upphæðin sem Halldórs Ásgrímssonar útgerðin fékk afskrifaða, er hægt að greiða 200.000 krónur, þrettán þúsund sinnum ?

Vitið þið að fyrir 250 milljarða, sem er talan sem er í fréttum í tengslum við Lárus Welling og félaga í Glitnis-bandinu er hægt að greiða 200.000 krónur,  eina milljón tvöhundruð og fimmtíu þúsund sinnum ?

Vitið þið að fyrir 1.000 milljarða er hægt að greiða 200.000 krónur , fimm milljón sinnum ?

Og fyrir 2.000 milljarða er hægt að greiða 200.000 krónur, tíu milljón sinnum.

Kæra þjóð, þetta finnst mér þið verðið að hafa í huga.

Hverjum er svo þetta ástand að þakka eða kenna ? Væntanlega þeim sem voru við stjórn frá 2000 til 2008. Hverjir voru það svo ? Jú fyrst og fremst Sjálfstæðisflokkurinn undir forystu Davíðs Oddssonar og  Geirs Haarde. Framsóknarflokknum undir stjórn Halldórs Ásgrímssonar,  Jóns Sigurðssonar, Guðna Ágústssonar og Valgerðar Sverrisdóttur.

Ekki má gleyma Samfylkingunni undir forystu  Ingibjargar Sólrúnar, sem kóaði með Geir Haarde síðustu 18 mánuði fyrir hrun.

Svo koma þeir Bjarni gæsalappi Sigmundur glópalán og Jóhanna Sigurðardóttir og láta sem flokkarnir þeirra hafi ekki komið nálægt neinu. Allt helvítinu honum Steingrími að kenna, hann bara mergsýgur almenning og skattpínir fyrirtækin í landinu svei honum þetta er allt honum að kenna. „fock him“.

Geir Haarde  vinur Bjarna gæsalappa lýsti því yfir að íslendingar muni greiða ICESVE . Bjarni gæsalappi skammast út í Steingrím fyrir að ætla að standa við loforð Geirs sem þá var formaður Sjálfstæðisflokksins.  Góða þjóð hafið þetta í huga þegar þið ræðið um fátækt á Íslandi

Ykkar vinkona

Magnea

 

 

Bréf 88                                                                           Litlahraunsey 25.jan.2011

Kæri Sigurjón.

Mikið er ég feginn að þú skulir kominn að austan. Var þetta bara ekki ömurlegt að vera þarna innanum alla þessa glæpona ? Mér var sagt að Ólafur digri af Akranesi og þú hafið verið einhverjum spurningaleik, frúin í Hamborg eða eitthvað svoleiðis, og þú máttir ekki segja nei, og ekki ég man það ekki  og  alls ekki  segja icesafe. Var þetta ekki hræðilegt ?

Hún Soffía frænka sagði mér að þú hafir staðið þig miklu betur en Ólafur digri í þessum spurningaleik.

Þú fékkst snúðana frá mér er það ekki ? Það var hreint ævintýralegt með þá. Við Soffía skárum nokkra  þeirra til helminga og settum neðst í vaskafatið, svo skárum við helling í fjóra parta og settum yfir helminguðu snúðana. Þetta var gert til að plata Lalla Jhons og hina krimmana og svo að sjálfsögðu fangaverðina. Það var gaman að gefa þeim snúða, engu líkara en þeir hefðu aldrei smakkað snúð.

En hvað um það Soffía sagði mér að hún hefði komist alla leið til þín með vaskafatið og þá voru allir hálfu snúðarnir eftir. Mikið var hún stolt af þér hún Soffía þegar hún lýsti því hvernig þú tróðst uppí þig hálfu snúðunum, hún tárfelldi af hrifningu meðan hún lýsti því.

Hvað hafði svo Ólafur digri út úr þessum spurningaleik ? ég bara spyr. Gastu ekki bara sagt já eða eitthvað svoleiðis eins og bara tortúla ? Ég er viss um að þú hafir ekki sagt neitt af viti, því þá væri ekki búið að sleppa þér.

Var maturinn ekki hræðilegur þarna fyrir austan ? Soffía sagði að hinir krimmarnir væru látnir elda einhverjar kássur fyrir þá sem eru í spurningaleik við lögguna, engar stórsteikur sagði hún, ónei.

En nú lagast þetta allt saman þegar þú kemur norður í menninguna. Vonandi verður þér ekki  meint af þessu  Sigurjón minn.

Hvaða kjaftæði er þetta með misnotkun ? Þú ert þó ekki hommi er það nokkuð ? Þetta er nú meiri óhróðurinn um þig, misnotkun ég segi bara ekki hann Sigurjón  minn.

Elsku kallinn minn ég ætla að bjóða þér í kaffi við fyrsta  tækifæri.

Auðvitað verða hálfir snúðar með kaffinu.

Sjáumst.

Þín Magnea.

 

 

Bréf 89                                                                                       Surtsey  9.feb 2011

Kæri  Hannes Smá

Mikið eru þessir öfundarpennar og illfygli leiðinleg út í þig. Þó það nú væri að bankinn fari ekki að rukka þessar 400 millur löngu áður en gjaldaginn lítur dagsbirtunnar, enda bara smáaurar. „Yes.“

Er ekki nóg að gert ég bara spyr ? Þú ásamt fleirum komuð okkur upp úr eymd og volæði, þið komuð Íslandi í sögubækurnar svo um munar, „me good yes“

Þú elsku Hannes minn Smárason voruð ekki með neinn fimmaurabissness „I say no more yes“.

Ertu kannski ekki að borga þessar 4,6 kíló millur ? „I simply ask?“

Hvað með það þótt einhverjir drullusokkar séu að rukka þig um 10 kíló millur þetta er bara frekja í þessu pakki að ætlast til að þú takir upp budduna, „No way“ segi ég bara og hana nú.

Svo eru menn að fleipra með að ekki sé veð fyrir þessum fáu kúlum ég veit ekki betur en hlutabréf í FL og Byr hafi verið sett að veði, einhvers virði er það nú maður lifandi „yes.“

Eins og Siffi segir þið molbúarnir eigið að skammast ykkar „I mean it“ .

Það voru alvörumenn eins og þú Hannes minn sem gerðuð ykkar besta en eruð bara húðstrýktir fyrir „ fuck them all, I mean it yes“.

Haltu þínu striki Hannes minn og farðu bara í mál við allar þessar frekjur sem eru að bögga þig „yes“ Við stöndum með þér og Sigurjóni digra og öllum hinum framsýnu athafnamönnum sem verið er að jagast í. Fram fram fylking athafnamanna, þeir lengi lifi til hagsbóta fyrir sig, helvítis smáborgararnir þessir sem þú og Sigurjón kallið „svokallaðan almenning“og eru sífellt að jagast út í ykkur, þeim er sko ekkert ofgott að borga „I mean it yes“

Þetta verður nú ekki lengra í bili Hannsi minn, bið að heilsa stelpunum á Tortúla

Kær kveðja þín

Magnea

 

 

Bréf 90                                                                                      Engey 7.mars 2011

Kæra Elín.

Hverskonar er þetta nú með þessa blaðasnápa ? ég bara spyr. Hvaðan fá þeir umboð til að spyrja bjánaspurninga ? ég bara spyr líka að því. „I simly ask“

Hvaða dónaskapur er þetta eiginlega „I mean it“ Að spyrja þig elskan mín hvort það sé eðlilegt að borga blessuðum bankasjórunum kaup. Það er bara ekki þitt að svara svona bjánaspurningum, auðvitað verður að borga mönnunum kaup eins og dýrtíðin er í dag, bensínið alltaf að hækka og smérið líka svo maður tali nú ekki um kétið, maður lifandi „I say“.

Fjörtíu prósent hækkun hvað með það. Þetta eru svo fáir sem eru bankastjórar, bara tveir eða þrír eða svona um það bil. Það munar ekkert um það þótt þeir fái nokkrar millur á mánuði „I say so“.

Þú ert bara forstjóri Bankasýslunnar eða svoleiðis, og kemur bara eiginlega ekkert við hvað bankarnir eru að gera, þeir eru jú í eigu einhverra sem eiga þá. Þótt ríkið eigi einhverjar krónur í þeim er það bara ekki þitt að stjórna launapólitík þeirra „no way“.

Það er sama hvað þú mjálmar, þeir eru í eigu þeirra sem eiga þá og þú kalt bara hvæsa og urra það kemur ekki við þá. „fock them all“

Auðvitað skiptir mestu máli innri hagræðing fjármálastofnanna og að gæta hófs í kostnaði. Það er til dæmis ekki forsvaranlegt að gefa viðskiptavinum spil svo eitthvað sé nefnt, þvílíkt bruðl segi ég bara. Þetta ert þú búin að marg segja þessu fólki.

Elsku Elín mín, hvernig stendur á því að þessir blaðasnápar spyrja ekki um sultarkjör bankastjóra og annarra sem vinna í Landsbankanum ? „I ask“

Elín mín ég er gáttuð svo ég bara get ekki skrifað meira í bili.

Bestu kveðjur.

Þín Magnea

 

 

Bréf 91                                                                                    Höskuldarey 7.mars 2011

Kæri  Höskuldur.

Nú eru illpennarnir og öfundarpúkarnir farnir að jagast út í ykkur bankastjórana. Þeir  sjá ofsjónum yfir þessu lítilræði sem þið fáið í ofurlaun. Ég segi bara Höskuldur minn, hvern djöfulinn varðar þessu hyski  um hvað þú færð fyrir að mæta í bankann, ég bara spyr  „simply ask“.

Fimm millur á mánuði, minna má það nú ekki vera fyrir að mæta í bankanum fimm daga í viku „I say“

Þessir öfundarpúkar ættu bara að skammast sín fyrir að skrifa svona „Sheim them all“.

Það er auðvitað hárrétt hjá forstjóra bankasýslunnar, henni kemur ekkert við hvað þú færð fyrir mætingu í bankanum, enda segir hún það sjálf hún Elín. Hún segir líka að þú eigir að hætta að gefa dagatöl og spil, því það sýni ábyrga stjórnun, aðhald  og hagræði. „ Yes my man“.

Þessir  blaðasnápar ættu frekar  að skammast út í helvítið hann Steingrím sem er alveg að sliga okkur svokallaðan almenning með sköttum  „fock him“.

Það má bara alls ekki minnast á hvers vegna allir þessir skattar eru. Það hlýtur bara að vera Steingrími að kenna, hverjum svo sem öðrum ? „ I ask.“

Höskuldur minn þú heldur bara áfram að mæta í bankann og gefur frat í þetta nöldur út í aurana sem þú færð fyrir mætinguna, þetta kemur bara engum við nema eigendunum sem eiga bankann hverjir svo sem þeir eru.

Það er ekki hægt að ætlast til þess að þú drekkir vatn með steikinni , ó nei,  auðvitað verður þú að hafa efni á rauðvínssopa  með steikinni, hvað annað ?

Þessi svokallaði almenningur sem ekki fær lengur dagatal frá þér og veit því ekki hvenær eru sunnudagar getur bara haldið áfram að éta plokkfisk og drukkið vatn með. Vatnið er bæði ódýrara og hollara en rauðvínið sem er orðið rándýrt. „Yes“

Ef einhver segir að þetta ástand sé einhverjum öðrum en Steingrími að kenna á hann mig á fæti, „Yes on my foot“ eins og Reikhás segir.

Hverjum dettur lengur í hug að gæsalappaflokkurinn og glópalánsflokkurinn hafi eitthvað með þetta að gera ?  Bæði Bjarni gæsalappi og Sigmundur glópalán eru margbúnir að segja að þetta sé Steingími að kenna, þeirra menn hafi ekki komið nálægt þessu með bankana og þessa svokölluðu útrás sem allt setti um koll. Það er auðvitað bara kommúnistaáróður og ekkert annað.  Allt frá Steingrími komið.

Jæja Skuldi minn ég skrifa þér meira seinna.

Þín Magnea.

 

 

Bréf 92                                                                        Kolbeinsey 7.mars. 2011

Kæra Birna.

Láttu þessi skrif öfundsjúkra kommúnista um kaupið þitt ekki trufla þig, haltu þínu striki Birna mín. Þessir smáaurar sem hrökkva til þin um hver mánaðarmót eru ekki umtalsverðir hvort sem er.  Ertu ekki örugglega búin að finna þessar 180 millur sem hurfu sjónum þínum um árið ?

Hvað er Steingrímur að ibba-gogg út af þessu, ég bara spyr „simply ask“.

Menn verða bara að skilja það að þér er ekki bjóðandi að drekka vatn með steikinni Birna mín. Eins og ég skrifaði hinum bankastjóranum, getur svokallaður almenningur sko gott drukkið vatn með plokkfisknum, en að sjálfsögðu er það rauðvín með steikinni hjá þér, þó það nú væri. „so simple“.

Þessi bankasýslu gella er víst alveg hissa á þessum smáaurum sem þú færð, helst á henni að skilja að þú eigir að fá miklu meira. Þú manst bara,  ekki gefa skrílnum dagatöl og spil, þá kemstu á spjöld sögunnar sem ráðsettur, gætinn og yfirvegaður bankastjóri „Yes.“

Eins og við vitum báðar komst þú ekki nærri neinu hruni eða svoleiðis, það var allt helvítinu honum Steingrími að kenna og kommagerinu kring um hann. „Yes“

Þeir félagarnir Bjarni gæsalappi og Sigmundur glópalán hafa báðir sagt það var ekki ég og mínir menn, sem bjuggu til þetta efnahagsástand, „no way“  auðvitað er þetta allt honum Steingrími að kenna. „Yes fock him“.

Þegar  þetta öfundsjúka pakk er að nöldra skaltu bara spyrja, hvað borgar bankasýslugellan bankastjóranum í bankanum hans Steingríms og hana nú. „Yes you ask bara“.

Birna mín haltu þínu, og fáðu þér rauðvínsglas, „Yes“ Ég stend með þér.

Þín einlæga

Magnea

 

 

Bréf 93                                                                                    Spáey 8.mar.2011

Kæru bankastjórar.

Mikið var þetta klókt hjá ykkur að mæta ekki í spurningakeppnina í morgun. Hvað eiga svo sem þessir kújónar með að trufla ykkur í morgunkaffinu mér er spurn. „no way“ segi ég bara.

Vissi bankasýslugellan ekki að hennar maður sagði húrra þegar spurt var hvort Arionstjórinn ætti að fá smá í viðbót ? Mér er sagt það, og ekki lýgur Mogginn.

Hvað átti svo þetta að vera?  Hvaða spurningakeppni var þetta ? Átti þetta að vera 10 bjölluspurningar og 5 vísbendingaspurningar ? Eða bara frúin í Hamborg ? „don´t care“.

Arfa vitlaust hvað svo sem þetta átti að vera. Hverjir áttu svo að dæma svörin ? „I simply ask“  Kannski  Árni prestsins, eða þessi með múturnar, æi… hvað heitir hann nú aftur ? Árni fór eða var það Guðlaugur eitthvað ? Sá er nú aldeilis vanur að dæma í svona spurningaleikjum „Yes man“.

Haldið bara áfram að vera í kaffi  elskurnar mínar þið eigið það fyllilega skilið.

Var hádegissteikin ekki góð ? Var rauðvínið ekki örugglega Franskt ?

Þið þarna blaðasnápar sem skiljið eftir ykkur sviðin fréttablöð hvar sem þið farið, hættið að hrekkja strangheiðarlega bankastjóra, nóg er á þá lagt af launum, ég sé ekki betur en þeir séu að kikna undan þeim. „No more bug“  segi ég bara.

Ykkar ævinlega einlæga.

Magnea

 

Bréf 94                                                                                               Bankaey 9.mar.2011

Kæri Steinþór.

Hí á þig ekki nema með 1,1 millu á mánuði eyminginn,  algjör lúser á lúsalaunum. Það er varla að ég nenni að skrifa þér þessar örfáu línur. Er ekki fjölskyldan í einelti alla daga ? Þora krakkarnir lengur að fara í skólann ? er ekki bara híað á þau ? Þorir konan ein út í búð er ekki híað á hana líka ?

Hvernig smakkast kassavínið með hrossaketinu ?

Hvar ertu á skalanum hans Dóra verks í kópó ?

Lánar mest: lánar best: minnstar tryggingar: engin veð.

Ég segi bara bæbæ

Magnea

 

 

Bréf 95                                                                           Kolbeinsey 9. mars 2011

Kæri Sigurður.

Það hafa allir verið vondir við þig. En ekki ég elsku Siggi minn. Ég er ekkert að öfundast útí þig þótt þú eigir skuldlaust hús á Valhúsahæð. Allir geta átt skuldlaus hús eins og þú bentir réttilega á um daginn. Formúlan er bara að taka ekki lán, svo einfalt er það nú. Svo eru hælbítarnir eitthvað að segja að þú  hafir keypt smá aðsetur út í London á tíu og hálfa punds-millur , ég segi bara og hvað með það ?.

Þegar maður spyr svo hvort þetta séu ekki „many monní“ þá er manni sagt að Siggi minn hefði bætt við tveimur og hálfri punds-millu til að vera alveg öruggur um að fá það.

En þið illgjörnu eiturtungur gátuð ekki stillt ykkur um að segja að húsið hafi verið til sölu í mörg ár, en ekki selst. Ætli maður heyri ekki næst að Siggi minn hafi borgað of mikið fyrir kofann ? En það fylgir bílastæði sagði hann.

Nú eru þessir „fraud“ kallar í London að hrekkja þig. Hvar endar þetta segi ég bara ? Eru þessir Gengisbræður og hinir sem eru lagðir í eineltið með þér ekki örugglega saklausir eins og þú Siggi minn ?

Það kæmi mér ekki á óvart að þetta einelti sem þú og vinir þínir verða fyrir sé runnið undan rifjum Dabba og stöðumælaverðinum frá Akranesi.“ Fock them“ segi ég bara.

„Fraud“ kallarnir heppnir að þú skulir eiga bílastæði þarna í London, þeir hafa þá sloppið við stöðumælasekt þegar þeir náðu i þig. „good for them“

Ég bíð spennt eftir að þú skrifir mér Siggi minn, forvitnin er alveg að fara með mig. Mig langar svo að vita hvernig er að gista á „fraud“ hótelinu í London.“love you“

 

Bestu kveðjur

Þín Magnea

 

 

Bréf 96                                                                        Háskólaey 10.mars 2011

Kæri lesandi.

Það er bara ekki eðlilegt hvað hann Grímur hefur afkastað síðan hann smeygði sér undir sængurhornið hjá Jóhönnu.

Sjáið bara kortafyrirtækin til dæmis, ekki voru það áhangendur Sjálfstæðisflokksins né Framsóknar sem höfðu samráð um það hvernig skyldi plokka viðskiptavini, og útiloka aðra frá kortaviðskiptum, „no way“

Auðvitað var þetta Steingrími að kenna „I mean it yes“.

Við borgum bara sögðu Raggi og Dóri 700 millur ekkert mál. „pease of cake“  svo höldum við bara áfram undir öðrum nöfnum. Þetta er það sem kallað er frelsi í viðskiptum ef þið vitið það ekki.

Hann segir það hann Dóri verkfræðingur í Kópavogi. „Yes“.

Auðvitað veit hann allt um það,  ekki spurning. Eins og ég segi enn og aftur helvítið hann Steingrímur allt honum að kenna.

Kæri lesandi ég sá það í blaðinu sem Hádegismóri skrifar að sjálfur Guttenberg í Þýskalandi hafi þurft að segja af sér út af einhverju pári sem hann afritaði til að getað kallað sig „doctor“, je minn almáttugur. Meira að segja gat sjálf Merkela  ekki  róað lýðinn sem vill ekki kenna sig við háskóla meðan þessi orðaþjófur væri kallaður dr. „oh me good“. Örugglega Steingrími að kenna.

Við eigum svona náunga í okkar háskóla sem verður kannski einn af 100.000 bestu háskólum í alheiminum,  einhvertíma „in the far future“.

Það dettur ekki nokkrum prófessorum né rektorum svo mikið sem að minnast á svona smáræði. „no way“.

Orð eru bara orð segja þeir, hver á svo sem orðin nema  Hansi ? „I simpy ask“

Auðvitað er þetta allt í boði Steingríms. Ekki dettur nokkrum heilvita manni í hug að einhverjir Sjálfstæðismenn styðji þetta hvað þá Framsóknarmenn „nonono“ . Niður með Steingrím „I say so“.

Enda á Steingrímur þennan svokallaða menntamálaráðstýru, svo það er augljóst að allt er þetta Steingrími að kenna. „yes“.

Kæri lesandi ég þarf að lesa betur Hádegismóablaðið til að fá fleiri sannleikskorn til að skrifa um.

Rekið Grím úr bóli Jóku, þá verður allt gott.

Bestu kveðjur

Magnea

 

 

 

Bréf 97                                                                                    Örfyrisey 11.mar.2011

Kæri Ragnar Ö.

Hverju ætlast fólk til af þér ? Vill þessi svokallaði almenningur virkilega að þú hættir að vera vara formaður, út af þessu kortasvindli ? Ég bara spyr. Hvað á þessi frekja eiginlega að þýða . Er fólk virkilega svona út á túni,  Er Siggi aðalformaður  virkilega að hugleiða eitthvað með þig ?

Ég segi bara hann Siggi minn gerði það eina rétta að láta þig ákveða hvort þú eigir að halda áfarm að vera vara formaður hjá  honum. Nóg að sleppa öðrum vara formanns- djobbinu. Svo var þessi niðurstaða samkeppnisráðs tóm þvæla. Auðvitað varstu alsaklaus, þú bara fékkst ekki að útskýra sakleysið fyrir þessu ráði, þeir ættu bara að skammast sín. Þú sem fékkst vini þína með þér í að kaupa frið hjá þessu nefndarhyski og það ekki neinir smáaurar.

Svona er að búa í lögregluríki Raggi minn. Löggan veit ekkert hvað frelsi í viðskipum þýðir. Þeir held ég svei mér þá, telja frelsið vera að ríkið eigi öll fyrirtæki sem hægt sé að græða á.

En við Halldór vitum betur. Frelsi í viðskiptum felst í því að mega einoka arðvænleg fyrirtæki, en það verða að vera almennileg fyrirtæki svona eins og tryggingarfélög og kortafyrirtæki, og að sjálfsögðu mega kommarnir ekki koma nálægt svoleiðis. Þetta er fyrir innmúraða sjálfstæðis- og framsóknarmenn, og svo fáa útvalda samfylkingarmenn og konur.

Fallit, vonlaus  og önnur lúserfyrirtæki má ríkið eiga og reka. Það er mátulegt á Grím,  hann á sko ekki betra skilið. Og svo fyrirtæki sem snillingar hafa sogið öll verðmæti úr og skuldsett langt upp fyrir rjáfur. Svona er þetta nú Ragnar minn.

Þín Magnea

 

 

 

Bréf 98                                                                                       Háskólaey 21.mar. 2011

Kæri Jón Snorri.

Þetta er nú meira eineltið sem þú verður fyrir þessa dagana. Ég man það svo vel þegar þú laukst prófinu í peningafræðunum og byrjaðir að kenna í súpergaggó á melunum með honum Hansa orðaþjóf.

Hvað er fólk að nöldra yfir einhverjum töppum sem þú seldir og keyptir ? Fékkstu ekki tífalt verð fyrir þá þegar þú seldir þá ? ég bara spyr „simply ask“

Eru menn virkilega að kvarta yfir því að þú skyldir græða á þessum töppum ? Hvað kemur það málinu við, að þeir pössuðu ekki á flöskurnar ? flöskurnar voru bara ekki með rétta stúta fyrir tappana. „Yes me boy“.

Hvað á það svo að þýða að tína til einhverja hótelreikninga frá útlöndum ? Auðvitað verður þú eins og við hin að gista einhvers staðar þegar við skreppum út í heim. „ Simply so.“

Auðvitað eru þetta persónuleg útgjöld, og hvað með það ? „I ask yes“.

Hver getur verið án síma nú til dags ? svarið er enginn. „ nobody“ Auðvitað er best þegar maður þarf ekki að borga svoleiðis leiðindareikninga sem símareikningarnir eru, öfundarpúkarnir eru eitthvað að fleipra með að þessir leiðindareikningar séu uppá 740.000.

Ég Nonni minn segi bara,  svona eiga lektorar og MBA sérfræðingar að kenna sínu fólki, hvað annað ? „Hold your striki“ eins og Reykhás sagði. „yes me boy“.

Bíll og ekki bíll, dæmigert fyrir öfundina að tína það til með bílinn, eru þessar druslur nokkurs virði ég bara spyr ? Fyrir  mér er þessi sveifla með bílinn algjör snilld, ekki minni snilld en Icseve. Þú ættir að gera þetta að skylduverkefni  hjá þeim sem þú ert að MBA-a. „yes“.

Elsku Nonni minn ég bíð spennt eftir því að þú verður próffi í súpergaggó eins og vinur okkar Hansi. „yes,yes,yes“

Ég þarf að þjóta núna Nonni minn skrifa þér seinna. Bless bless.

Þín Magnea

 

 

Bréf 99                                                                                    Háskólaey 21.mar.2011

Kæri Davíð.

Það er naumast Raggi er reiður út í þig, mér bara blöskrar. Það er bara ekkert að því að búa í glerhúsi eins og hann segir að þú búir í, Bara að hafa óbrjótandi gler í því. Hann má svo kasta grjóti, sandi og möl, það hefur ekkert að segja.“no way“.

Ég er svo sannarlega sammála þér Dabbi minn varðandi þennan Háskóla Íslands, þar eru allir á móti þér varðandi þennan „Icesave „ þrjú samning. „yes“.

Hvernig er það með hann Hannes okkar Hólmstein, er hann ekki enn í þessum Háskóla ? Getur hann ekki komið viti fyrir í kollunum á þessu pakki sem á að lofsyngja samninginn ? „I simpy ask“.

Þetta væri nú allt öðruvísi ef menn hlustuðu á þig Dabbi minn. „yes“ Ekki er hægt að kenna þér um það hvernig fór með þetta „Icsave“ ævintýri. Ég veit ekki betur en þú hafið varað við  þessu alla tíð meðan þú varst í Seðló. „warning warning warning yes“

Meira að segja reyndir þú eftir bestu getu, og meira en það að bjarga Landsbankanum sem þú gafst Bjöggunum „yes“ voru það ekki björgunaraðgerðir upp á 300 kíló millur ? ég bara spyr „yes simply ask me frend“.

Auðvitað voru það ótíndir glæponar frá Baugi sem gerðu þetta allt saman, þeir settu alla banka á hausinn, einir og óstuddir með hjálp skólabræðra þinna úr Háskólanum. „fock them all yes“.

Kæri Dabbi nú er Gnarri að hóta okkur að fara til Grænhöfðaeyja, Heldur þú ekki að hann þurfi einhverja með sér ? Ég sá það í einhverju óþverrablaði að einhver náhirð væri óánægð með þennan „Icesave“ þrjú samning. Væri sú hirð ekki sæmandi Gnarranum á þessum grænuhausaeyjum ? Ég bara segi ekki meir. „tell no more“

Jæja Dabbi minn þetta verður ekki lengra í bili bless bless“ by by yes me dear Dabbi“.

Þín einlæga

Magnea.

 

 

 

Bréf 100                                                                                Frammey 3.apríl 2011

Kæri Alfreð.

Mikið er þetta satt sem þú sagðir í sjónvarpinu um daginn varðandi Orkuveituna. Auðskilið og skýrt að þið Framsóknarmenn komuð ekki nálægt skuldsetningu Orkuveitunnar „ no way“ segi ég bara. Auðvitað er þetta allt saman helv…. honum Jóni Gnarra að kenna „all of it“.

Svo dirfist hann að hækka gjöldin fyrir vatnssopann upp úr öllu valdi, það á bara að drekkja okkur í bæði heitu og köldu vatni svei mér þá og líka í skuldum Orkuveitunnar . Svo  boðar hann Gnarri enn frekari hækkun á sopanum og rafmagninu með. Er maðurinn í stuði eða hvað ?

Nei Alfreð minn, þeir sem kenna þér og þínu fólki um hvernig komið er fyrir Orkuveitunni ættu bara að skammast sín „sheim them all“.

Þetta er bara öfund í þessu pakki, svo skilur það ekki bissness. Auðvitað var sjálfsagt að rækta rækjur og skeljar, það ættu þessir öfundsjúku illpennar að vita, segi ég bara „ I say“.

Og Lína Net var tær og skýr snilld, auðvitað er það eðlilegt að kaupa svoleiðis af kunningjum og skoðunarbræðrum hvað annað spyr ég bara ? Okkur bráðvantaði svoleiðis línunet inn á hvert heimili „I mean it“.

Fólkið í Reykjavík sem ekki vill svona línunet inn í stofu til sín eru bara bjánar og vitleysingjar, þeir vita ekki hvað þeir fara á mis við „stupid fools“.

Það ætti bara að draga þessa illpenna alla saman fyrir Hæstarétt og láta réttinn dæma þá ógilda og taka af þeim bæði blöð og blýanta, svo þeir haldi ekki áfram að skrifa eitthvað rugl um þig Alfreð minn og þitt fólk.  Þú varst sko hetja okkar höfuðborgarbúa þegar þú og forstjórinn tókuð stöðu með krónunni, það fóru að vísu nokkrar kíló-millur í þetta sem töpuðust, en hvað með það þið tókuð jú stöðu með krónunni.

Svo eru menn eitthvað að röfla um að það sé ekki hlutverk Orkuveitunnar að reka allskyns fyrirtæki  og  stöðutökur. Þetta er vonlaust pakk allt saman “fock them all“.

Jæja  Freddi minn ég stend með þér sama hvaða vitleysu þú  gerir og sama hvaða bull kemur frá þér, þú ert minn maður “ My man“.

Kveðja

Magnea

 

Bréf 101                                                                       Hafnarbakki 16.maí 2011

Kæra Harpa.

Nú ertu risin úr djúpinu og gnæfir yfir höfninni og allri menningunni á Íslandi. Svei þeim sem halda því fram að þú sért óþörf og ekki annað en baggi á íslensku þjóðinni. „asheime them all“

Þetta pakk sem ekki kann að meta þig er bara öfundsjúkt pakk sem segir alltaf nei við öllu nýju.

Hvað með það þótt þetta öfundsjúka finni að því að þurfa borga brúsann þótt það vilji ekki notast við þig . Þú ert ekki nein mella ónei ekki aldeilis, þó það kosti sitt að njóta þín. „no way“

Þetta er bara öfund vegna þess að það fékk ekki boðsmiða á þig Harpa mín. Bjöggi gjaldþrota fékk boðsmiða ásamt Óla Bessastaða sá ég í einhverju blaði. Ekki amalegt að njóta þín í þeim félagsskap ó… ekki aldeilis.

Svo voru þarna fleiri boðsgestir sem ekki er sagt frá, en tunnuhljómsveitin spilaði við innganginn fyrir boðsgesti, við misjafnar undirtektir. „Yes“.

Þótt verkið væri alíslenskt var þess ekki getið hver væri höfundur þess. Mér finnst Harpa mín að þú ættir að bjóða tunnuhljómsveitinni  í rauða salinn, og bjóða allri þjóðinni að njóta þessarar þjóðlegu tónlistar sem hún flutti í nepjunni við innganginn. Það er alveg óþarfi að bjóða RUV á staðinn þeir hafa hvort sem ekkert vit á þjóðlegri menningar tónlist, þeir hjá RUV eru bara í ódýru amerískum gaddavírshljómum. „yes“

Ég hlakka óstjórnlega til að borga brúsann og alla kokteilana næstu áratugina, verst að ég á ekki fyrir strætó í bæinn til að berja þig augum, ég vona bara að það verði birtar fleiri myndir af þér í Mogganum,  þar sem þú stendur nakin í höfninni öllum menningarvitum til ánægju og gleði. „yes me dear“

Þín einlæga

Magnea

 

 

 

Bréf 102                                                                                              Danmörk  júlí 2011

Kæri Davíð-1.

Mikið er ég sammála þér, auðvitað eins og þú bendir á er þetta blaður í Jóhönnu ekkert annað en ómerkilegt yfirklór. Henni væri nær að hlusta á þig og Styrmi, frekar en Össa.

Auðvitað er alveg sama hvað Steingrímur puðar og puðar hann er í kviksyndi sem hann æddi sjálfur út í, enginn bað hann um það. Auðvitað er ástandið honum að kenna og engum öðrum „fokk him“.

Engum skyldi detta í hug að ástandið í þjóðfélaginu sé neinum öðrum að kenna. Alla vega ekki í dag.

Það er alveg óþarfi Davíð minn að mynnast á frjálshyggjuna ykkar Hannesar þjófs í þessu. Það var ekki ykkur að kenna þótt bankarnir væru gefnir vildarvinum þínum og Halldórs Ásgrímssonar.

Ekki áttuð þið neinn þátt í því. Ég er sannfærð um að það var Steingrímur sem gaf bankana, Símann og tryggingarfélögin vinum ykkar Halldórs. Svo heldur hann að þetta sé ekki sér að kenna hvernig ástandið er, svei bara Steingrímur skammastu þín „shame on you“.

Davíð minn haltu áfram á þessari braut þá losnum við við Grímsa og Jóku í næstu kosningum. Eina vitið fyrir þessa voluðu þjóð væri að kjósa þig og þitt fólk. Þá verður hægt að bæta fyrir bullið í þeim hjúum. Bið að heilsa Staksteinum.

Kveðja  Magnea

 

 

 

Bréf 103                                                             Reykjavíkurtjörn 27.ágúst 2011

Kæri Þór Saari.

Það er alltaf sama sagan með ykkur potta- og pönnu fólkið, sífellt nöldur og nag. Ég hélt bara að það væri nóg fyrir ykkur að fá frímiða í Hörpuna segi ekki meir.

Haldið þið potta-og pönnufólkið að Jóka hafi meint eitthvað með stjórnlaga þú veist? Dettur þér virkilega í hug að það hafi átt að setja nýja stjórnarskrá ? Bæði Davíð og Bjarni gæsalappavafningur hafa sagt að við hefðum ekkert að gera við svoleiðis plögg nóg væri af vitleysunni fyrir því.“yes“

Auðvitað var alltaf meiningin að fá brandaraskrá til að skemmta ykkur þingmönnunum í skammdeginu í vetur. Þessi svokallaða stjórnarskrá er bara eitthvað til að ræða um. „Talk about“ hvað annað er mér spurn?

Davíð setti Bjarna Ben í stjórnarskránefnd fyrir alllöngu sem skilaði auðu einfaldlega af því þetta plagg sem er í gildi er alfullkomið og ekki ástæða til að breyta því. „ No changes please“

Sigmundur glópalán sem er kominn í pólitíska megrun sagði líka þetta stjórnlagaráð er ekkert stjórnlagaráð og á ekki að vera að kássast uppá okkur hæstvirta með einhverjum bjánatillögum. Og ofan á allt að fara fram á eitthvað þjóðaratkvæði, þvílíkt og annað eins, ég segi bara. Svona á bara ekki að gera nú til dags, það á ekki að vera að hrekkja fólk.

Elsku drengurinn þú ert svo klár og „clever „ að ég má til með að birta gullkorn eftir þig um þetta. „Yes“  Tilvitnun.

„Eitt er hins vegar alveg á hreinu og það er að ef Alþingi með öll sérhagsmunatengsl fjórflokksins og þingmanna í forgangi kemst upp með það byrja að breyta efnislega atriðum í frumvarpi stjórnlagaráðs, þá er málið ónýtt og hugmyndin um nýja stjórnarskrá er dauð. Almenningur verður því að láta málið til sín taka.“ Tilvitnun líkur.

Ég segi bara áfram Þór nú er að kalla til potta og pönnur og láta til sín taka heyr heyr.

Elsku kallinn minn bless í bili

Þín Magnea

 

 

Bréf 104                                                                                  Reyhúsasker 6,sept. 2011

Kæri strætó

Elsku strætó minn, mikið gleður það mitt gamla hjarta að sjá allan hagnaðinn hjá þér strætó minn.

En ég skil ekki alveg hvernig töfrabrögðum þú beitir til að ná þessum gróða. Ég sá það í fréttablaðinu að hagnaðurinn hefði getað orðið miklu-miklu meiri ef færra fólk hefði farið með þér. Þeim mun færri farþegar þeim mun meiri hagnaður, og minni kostnaður. Það er ekkert nema tómt vesen og kostnaður af þessu helvítis pakki sem ryðst inn í vagnana þína strætó minn. Hvernig væri að minnka vagnana og fjölga ferðum, kæmi það ekki svaka vel út ? ég bara spyr.

Ef rétt er segir þú strætó minn að meðalfargjald sé 100 krónur, en þyrfti að vera 400 krónur svo eitthvert vit væri í rekstrinum.

Síðast þegar ég tók bensín kostaði hver lítri 226,50 krónur. Á einum lítra er hægt með góðu móti að ferðast 10 kílómetra. Ein rispa í bæinn kostar 2 lítra sem sagt 453 krónur. Fyrir tvo kostar rispan í bæinn með strætó á venjulegu fargjaldi ( 350x 4= )1.400 krónur. Eftir óskahækkun strætó (400 krónur á ferð) kostar rispan 1.600 fyrir tvo.

Hvaða vit er í að fara í strætó ? ég bara spyr ? Strætó bara tapar meira ef fólk asnast í hann.

Kveðja

Magnea

 

 

Bréf 105                                                                       Tjarnarhólminn 25.ágúst 2011

Kæri  Þorvaldur.

Það er ekki að spyrja að öfundinni hjá ykkur lúserunum. Hvað með það þótt elítan fái bestu sætin í Hörpunni. Hvað með það þótt elítan fái smá skrens með einhverri eldingu út á flóann til að horfa á flugeld ég bara spyr ? Það er svo sem ekkert nýtt. Ég ætla bara að segja þér það Danni minn að elítan á líka frátekna bedda á Háskóla-hátækni hótelunum í Fossvogi og Hringbraut, svona „ in case „ aldrei að vita nema einhver úr elítunni fái flensu eða magakveisu.

Ég bara skil ekki þetta eilífa nöldur í ykkur Möggu Tryggva út í hana Jóku. Jóka er verðtryggð eins og annað gott fólk í Samfylkingunni „yes man „ Því skyldi hún vilja verðtrygginguna burt ég bara spyr „no way “

Ég hélt að ykkur Möggu væri orðið ljóst að allt þetta hrun og vesen með heilbrigðisruglið er honum Steingrími að kenna, hverjum svo sem öðrum ? Svo hækkar hann og hækkar skattana á ykkur lúserana svo elítan geti flatmagað og sleikt rjómann ofan af þjóðarkökunni „who else“.

Flottur diskókubburinn við höfnina þessi með flóttaleiðina út í sjó.  Danni minn hvernig er uppskriftin af kökunni sem þá bakaðir fyrir fúna ? Ég þarf endilega að baka eitthvað annað en vandræði á næstunni.

Þín Magnea

 

 

Bréf 106                                                                                 Viðey 10.sept. 2011

Kæru VG

Það nær ekki nokkurri átt að hleypa einhverjum Kínverjum inn í landið, maður veit aldrei hvenær þeir springa framan í okkur. „Yes“ Það á alltaf að byrja á að segja nei ef einhverjir útlendingar vilja fjárfesta hér hjá okkur svo á að segja nei nei nei.

Þessi Kínverji ætlar áræðanlega að smíða kjarnorkusprengjur á Grímsstöðum eða einhver önnur kjarnorkuvopn. Eða setja upp herstöð til að ógna Japan, ég hef það fyrir satt, heyrði þetta á útvarpi sögu „yes“.

Holurnar í golfvellinum eru bara byssuhlaup og ekkert annað, Hvað haldið að hægt sé að spila golf þarna norðurfrá, ef til vill nokkra tíma á ári. Þetta er bara yfirskin og ekkert annað.

Auðvitað verðum við að laða til okkar erlent fjármagn. Kínverskt er ekkert verra en hvað annað. Auðvitað eru þetta dollarar en ekki juan eða hvað það nú heitir þessar kínversku krónur. Hvað kemur það málinu við þótt einhverjir Kínverjar eigi torfusnepla á fjöllum ? ég bara spyr „simply ask“

Ekki fara Kínverjarnir með torfurnar úr landi þótt þeir reiðist okkur eða hvað ?. Ekki heldur og þaðan af síður fara þeir úr landi fimm stjörnu steypuklumpa. Ó nei ekki aldeilis.

Hugsa sér milljarða frá Kína fyrir eina lopapeysu, maður lifandi það gerist ekki betra. Handprjónasambandið ætti  að hugsa sér gott til glóðarinnar og gefa í. Gefa lopapeysur í allar áttir í von um að einhverjir milljarðar skili sér til til okkar. Yes man“.

Elsku VG verið á móti öllu sem ykkur er boðið, svona til að byrja með. Ég treysti ykkur til að hrista af ykkur allar erlendar fjárfestingar. Áfram VG

Bestu kveðjur

Magnea

Bless elsku drengurinn minn og varaðu þig á helvítis kommunum.

Þín Magnea.

 

 

Bréf 107                                                                                  Æðey 12.sept.2011

Kæri Nubo.

Það er ekki einleikið hvað þið Kínverjarnir eru sniðugir „clever „ Steingrímur og Davíð fatta bara ekkert, en eru svona á móti þér til vonar og vara “in case“ , aldrei of varlega farið „careful  yes“.

Er það ekki deginum ljósara að meiningin er að girða mannheldri girðingu þessa móa á Grímsstöðum ?

Og er það ekki deginum ljósara að þessi glæsihöll sem þú ætlar að reisa er fimm stjörnu tukthús fyrir útvalda kínverska glæpona? „ I simply ask yes“.

Og er golfvöllurinn ekki pyntingartæki nútímans, til að þvinga fram játningar þessara glæpona ? „skrú them“ Hver  játar ekki glæpi sína eftir níu holur á frosnum golfvelli í 20 stiga frosti og norðan stórhríð og það vettlingalaus ?,  ég bara segi ekki annað „tell no more me frend“.

Það stenst enginn glæpon ekki einu sinni Hannes þjófur 18 holur í slagveðurs rigningu og austan 20 metrum á sek. nei . „oh no me frend“.

Hvaða glæpon þolir svo ofaní þetta að rækta kartöflur „potatos“ ? þarna norðurfrá ég bara spyr. Það þola  ekki  nema ofurþjófar á borð við íslenska ofurbissnessmenn til dæmis eins og Sigurjón snúð, Jón bónuss, Hannes Smáa og ….. æi, nú er ég búinn að gleyma hvað hann heitir þessi í Kaupþinginu Sigurður eða eitthvað svoleiðis  eða var það Bidda í Íslandsbanka svona er maður orðin gleymin Nublo minn „ forgot ewery thing“.

Þú fyrirgefur þetta hjá mér en var það ekki annars þetta sem þú varst að ræða um við hann Óla Bessastaða ? „mister topp cat“ í vor sem leið.

Flott hjá þér að hafa flugvöll innan girðingar, fangaflug er flott allir á saga klass ekki satt.

Ef illa fer er það helvítinu honum Steingrími að kenna „blame him bad“ gæi þessi Grímur.

Ef allt gengur eftir þá er það helvítinu honum Steingrími að þakka „good“ gæi þessi Grímur

Elsku drengurinn minn, ég er að verða búin að prjóna lopapeysuna sem ég lofaði þér um daginn.

Verðum í sambandi, þín einlæga.

Magnea

 

 

Bréf 108                                                                                  Alþingi 11.okt. 2011

Kæri Páll Magg.

Manstu ekki þegar við vorum að spila Mattador við Árna bróðir þinn ? Árni var þá nýbúinn að setja íslandsmet í að segja af sér Hann og Halldór Ásgríms eru þeir einu ráðherrar sem hafa afrekað að segja af sér á sama kjörtímabili og þeir voru jú í sama Framsóknarflokki þá. Hvernig var það með hann Árna bróðir var það ekki hann sem setti húsnæðisverðið upp til himna með því að hækka lánin frá Íbúðalánasjóði upp í 90 %.

Þið voruð svo fyndnir þá. Ég man að þú varst alltaf að stríða Adda bróðir út af þessum 90 prósentum, þú sagðir alltaf þegar Addi mátti kaupa götur í Mattadornum, áttu ekki fyrir þessu Addi minn ? viltu ekki fá 90 % lánað hahahahaha út á þetta?

Addi svaraði þá hvern andskotann meinarðu eiginlega þú hefur ekkert vit á peningum bara bæjarritari í gjaldþrota  bæjarfélagi, það væri mátulegt á þig að setja þig yfir sölu á bönkum eða eitthvað.

Nú hefur þetta ræst sem Addi bróðir var að stríða þér með, bara orðinn forstjóri yfir bankasýslu ekkert annað vaó maður „yes yes“.

En ekki vantar öfundina hjá þessum kommum og krötum , ekki dettur Dabba á Mogganum í hug að öfundast út í þig og þá ekki Sigmundur glópalán ekki heldur „no me frend“ .

Svo eru illar tungur að tala um að það sé einhver að borga fyrir veittan greiða úr fortíðinni „I ask simply“ er þetta virkilega satt ? Hvaða greiði er þetta sem bankasýslan er að greiða fyrir ég bara spyr ? Veit Sigmundur glópalán eitthvað um þetta eða er þetta eitthvað í sambandi við vinkonu þína hana Sverrisdóttur þarna að norðan, ég  botna bara ekkert í þessu Palli minn.

Láttu ekki nöldrið í þessu vinstra pakki hafa áhrif á þig haltu þínu hlykkjótta striki ótrauður og líttu ekki um öxl. „Yes“

Palli minn ekki gefast upp þátt þeir kasti gleri úr steinhúsi . Stingdu bara hausnum í grjótið og láttu sem þetta pakk sé ekki til „Yes“

Þín Magnea

 

 

 

Bréf 109                                                                              Purkey 12.okt. 2011

Kæri Kalli

Hvað eru þessir trúleysingjar að brúka kjaft út af einhverju bréfsnifsi  sem þú gleymdir á skrifborðinu hjá þér og hvað á það eiginlega að þýða að skrásetjari heimti að bóka svona snepla „I simply ask“.

Hvers konar er þetta með hann Bjarna gæsalappa?  Hann er ekkert betri, heimtar að allir þingmennirnir og konurnar fari í kirkju til að hlusta á biskupaorð. Veit hann ekki að það er stórhættulegt að vera á rápi milli kirkju og þinghúss „ dont say more“.

Ég segi bara Kalli minn þótt einhver prestur eða biskup hjálpi konum í neyð og lesi yfir þeim huggunarorð og sé mannlegur í viðmóti, er að bara ekki hið besta mál ég bara spyr ?

Ekki dettur mér í hug að þjónar almættisins séu eitthvað hinsegin, hvað þá að þeir séu uppáþrengjandi  við syrgjandi ekkjur ó nei „no no no“  Það þarf nú eitthvað meira en krumpað bréfsnifsi og það óbókað til að fá mig til að trúa því.

Kalli minn haltu áfram á beinu brautinni og láttu ekki öfundarpakkið hafa áhrif á þínar gjörðir „no no no“.

Það er enginn  betri en þú til að halda trúleysingjunum frá okkar ástsæla Alþingi . Burt með alla trúleysingja og komma úr húsinu.  Ég er viss um að Sigmundur glópalán er okkur Bjarna gæsalappa sammála „ no question“.

Bless bless

Magnea.

 

 

Bréf 110                                                                                   Drangey 14.okt.2011

Kæra Katrín

Var þér nokkuð sagt frá því að unglingar lesa og lesa án þess að fatta hvað þeir eru að lesa ? Þegar ég var í barnaskóla vorum við látin lesa og lesa en enginn spurði okkur hvort við vissum um hvað við vorum að lesa. En ég held að það hafi einhvernvegin komið fram og kennararnir bara vitað að við vissum um hvað við vorum að lesa.

Þá voru flestir kennararnir kallar sem okkur þóttu vera eldgamlir en voru sjálfsagt ekkert mjög gamlir. Þá tók það þrjú ár að verða kennari. Nú eru flestir kennarar í pilsi eða kjól og námið er orðið 7+ og meira að segja í  Háskóla.

Er þá hægt að draga þá ályktun að með meiri menntun kennara og öðruvísi  kynjaskiptingu en var hafi kennslan orðið lélegri eða hvað ?

Lesskilning er hægt að kenna, þess vegna er sérkennileg þessi útkoma sem maður les um varðandi skilningsleysi unglinga á því sem þeir lesa.

Ég segi  bara ekki annað Katrín mín. Er til einhver skóli þar sem kennararnir eru gamlir kallar sem hafa bara lært að kenna í þrjú ár,mér er spurn ? Hvar eiga  tvíburarnir að læra að lesa þegar þeirra tími kemur ?

Kveðja.

Magnea

 

 

Bréf 111                                                                                   Álfsey 21.okt. 2011

Kæri Bjarni „gæsalappi“

Déskoti ertu flottur á því. Ætlar bara að redda þessu sem þið og frammararnir lögðuð í rúst á 20 árum á ekki nema  1 2 3 4 árum ef ég hef skilið bæklinginn rétt sem kom inn um bréfalúguna hjá mér.

Leggja af skattana  sérstaklega þó eignaskattinn „yes me man“. Það léttir nú aldeilis af barnafólkinu, öryrkjum og  öldruðum sem ekkert eiga þungum klyfjum „yes“ .

Smíða fleiri störf bara eins og 12 þúsund stykki eða svo  „of corse yes“

Koma hjólum atvinnulífsins af stað „what else man“. Liðka fyrir lánafyrirgreiðslu til  fyrirtækja og athafnamanna  svo sem eins og Ólafs Ólafssonar, Finns Ingólfssonar og Wernerbræðra svo einhverjir séu nefndir. Minn maður ekki hægt að segja annað „me man yes“.

Svo ætlarðu Bjarni minn að auka þjónustuna við gamalmennin og láta lækna alla sjúkdóma og maður tali nú ekki um öll sjúkrahúsin sem þú ætlar að láta byggja.  Þessi D-vítamínbylgja er hún ekki komin frá þér Bjarni minn ? ertu ekki að búa alla landsmenn undir að velja D í næstu kosningum XD hvað annað .

Flott trix hjá þér elsku drengurinn minn svona á maður að gera „yes“.  Svo ætlar þú líka að selja Landsbankann eða kannski bara að einkavinavæða hann eins og  Dabbi og Dóri gerðu.

Mikið hlakka ég til elsku Bjarni minn gæsalappi. Fullt að gera engir skattar allt í gúdí gúdi „yes“.

Maður tali nú ekki um báknið sem þú ætlar að koma burt maður, sama sagði Hannes Hólmsteinn hér um árið og þú og Geiri Haardi, báknið burt „yes“.

Láttu bara ekki Hönnu Birnu snúa á þig á landsþinginu, hún er óttaleg tæfa, svo tapaði hún borginni fyrir klaufaskap,  haltu fast um þitt ég treysti þér til þess elsku drengurinn minn, þá mun ég geta sofnað róleg á kvöldin.

Helvítið hann Steingrímur sem hefur sett allt á annan endann í þessu volaða Íslandi, burt með hann og inn með þig gæsalappi minn.

Bestu kveðjur

Þín Magnea

 

Bréf 112                                                                                  Dyrhólaey 06.maí. 2012

Kæri Davíð.

Mikið þótti mér vænt um ábendinguna ykkar Staksteins um Shengen. Auðvitað eins og allir vita er það afsal á fullveldinu að hleypa hér inn allskyns útlendingum svo til óheft. „Yes idepend disaster“.

Hverjum datt eiginlega í hug að koma okkur í þessa bullandi vitlausu stöðu eiginlega? „Yes who“.

Þetta er örugglega allt honum Steingrími að kenna.“who else“ ég bara spyr.

Hver var annars skipsstjórinn á þjóðarskútunni þegar inngangan í EES var samþykkt ? „Yes I ask“.

Hver var svo skipstjórinn á þjóðarskútunni þegar shengen aðildin var samþykkt ? „I simply ask again“.

Þetta var allt saman fyrsta og öðrum stýrimanni að kenna, það er ég viss um Dabbi minn. Þeir hafa verið á dúndrandi fylliríi og ekki vitað hvað þeir voru að gera er ég viss um. „drinking problems“.

Nú er einhver kerling skipsstjóri sem þú segir réttilega að sé í einhverskonar EB-vímu hvað svo sem það nú er. „EB-drugs“ .

Vonandi eru fyrsti og annar ófullir og með aðra höndina á stýrinu tilbúnir að rétta kúrsinn. „right the kúrs“.

Það væri gæfa þjóðarinnar ef þú af þínu lítilæti gæfir þeim rétta staðsetningu og hvert skútan á að halda, svo hún steyti ekki á þessum EB-skerjum. „Yes David me frend“.

Elsku drengurinn minn, ekki láta okkur verða EB-plágunni að bráð. „no“.

Davíð minn vonandi er jarðvegurinn í Hádegismóanum óspilltur af þessu EB-eitthvað.

Ég fylgist með svörunum ef einhver getur svarað þessu með EES og Shengen.

Bless bless Dabbi minn

Þín Magnea.

 

 

Bréf 113                                                                    Tjarnarhólmi  19.maí 2012

Kæri Dolittli.

Hvernig dettur fólki í hug að þú kunnir ekki að reikna?  Ég skil bara ekki hvað gengur á í hausnum á fólki sem heldur þessu fram, ég verð að segja það .    “Must say so“

Þú endurskoðaðir einhvern banka ef ég man rétt og það var sko allt í lagi með hann, nema hvað hann fór á hausinn áður en blekið var þurrt á plagginu. Auðvitað var það ófyrirséð. Engum datt í hug að eitthvað væri að í þessum bankaskrifli. „NO one I say“

Auðvitað er sjálfsagt að fara verlega þegar verið er að reikna. „careful yes“

Þú getur ekkert gert að því þótt hagnaður sé 70 milljarðar þótt þú hafir reiknað hagnaðinn 35 milljarða.

Hverjum hefur svo dottið í hug að rengja gjaldþrota útreikningana nema helvítinu honum Steingrími. „fokk him“

Auðvitað fara allar útgerðir á hausinn og það lóðbeint eins og þú segir ef útgerðin á að borga til eigenda fisksins fyrir að fá að veiða hann. „no way no pay“

Við háttvirtir kjósendur ættum að borga útgerðinni fyrir að veiða þessar slorugu bröndur fyrir okkur , auðvitað. „of corse“

Kæri Dolittli haltu þínum útreikningum, þú kannt örugglega betur að reikna prósentur heldur en hyskið í ráðuneytinu, ég er viss um að þeir myndu falla á barnaskólaprófinu í reikningi. „Yes fall fall to hell“

Ég hef samband seinna Dói minn.

Kær kveðja.

Magnea

 

 

Bréf 114                                                                           Grímsey  25.apríl 2012

Kæri Geir.

Skelfing er ég lukkuleg með þennan landsdóm. Þú vannst eins og ég sagði alltaf. Þessir kommúnistar og ofstækisfólk úr hreyfingunni sem voru að bögga þig ættu bara að skammast sín. „Yes“

Eins og við vitum bæði var þetta bara klámhögg ætlað til þess að koma óorði á blessaðan blásaklausa flokkinn okkar. „fock them all.“

Ég skal bara segja þér Geir minn að ég veltist um af hlátri yfir þessum skrípadómi, ég hef ekki hlegið svona mikið í langan langan tíma svei mér þá.

Auðvitað er ekkert athugavert við að gera eins og allir hinir, þessi stjórnarskrá er hvort sem er tómt bull og eingin þörf á að taka hana of hátíðlega, ó nei.

Geir minn ég og mitt fólk stendur með þér í baráttunni við illu öflin sem vilja skemma mannorðið þitt og þíns flokks. „bad people.“

Ég á bara ekki til eitt einasta orð yfir þessari frekju í fólkinu. Að reiða hátt til höggs og brenna svo af, svei barasta. Það segir sig sjálft að það var tilgangslaust að rausa eitthvað um fall bankanna við einhverja ráðherra sem höfðu hvort sem er ekki vit á neinu. „no way“ ég segi bara ekki annað.

Ég er að spá í að stofna sjóð til að safna peningum fyrir þig út af þessum málskostnaði sem lögfræðingarnir eru að rukka. Hvernig væri svona minningarsjóður,? gæti heitið til dæmis HAAARDe sjóðurinn. Þá geta allar Ragnheiðurnar sent svona minningarkort til þín og látið eitthvað smotterí af hendi í sjóðinn um leið.

Meira um það seinna elsku Geir minn.

Hlakka til að koma í sigursamkvæmið til þín.

Þín Magnea.

 

 

Bréf 115                                                                         Grímsey 26.apríl 2012

Kæri Grímur.

Grímur minn hvernig dettur þér eiginlega í hug að búa til þetta endemis kvótarugl ? „ I simply ask.“

Hvað á svona lagað að þýða ? spyr ég bara. Hvernig eiga kvótagæjarnir að hafa efni á því að byggja hallir kaupa dagblöð og fyrirtæki sem þeir settu sjálfir á hausinn? Það er deginum ljósara að ef þeir eiga að borga líka fyrir fiskinn þá geta þeir þetta ekki. „No way“

Hvernig er þetta eiginlega með þig Grímur minn, ertu búinn að gleyma hvernig á að leggja saman og draga frá? Þetta er kennt held ég ennþá í einhverjum skólum. Það gefur auga leið ef hagnaður er tveir milljarðar á einu ári og það kostar einn og hálfan milljarð að endurnýja einn togara, þá eru tuttugu ára einkaleyfi hvergi nóg,til að endurnýja skip og hnífa, bara segi ekki meir. „tell no more“

Svo ætlar þú ofan í allt að leyfa einhverjum fúskurum að veiða þrjá fiska af hverjum hundrað sem má veiða. Þessir fúskarar þekkja ekki þorsk frá grásleppu hvað þá meir. Þaðan af síður vita þeir hvað er sporður og hvað haus á þessum fiskum sem þeir þekkja ekki.

Grímur minn hvernig dettur þér í hug að okkar ástkæru útgerðarmenn sem kaupa allt mögulegt fyrir tap og afskriftir útgerðanna, geti borgað fyrir fiskinn sem þeir veiða fyrir okkur af einskærri góðmennsku? Nóg er að þeir borgi Færeyingum þó við förum ekki líka að rukka þá. „no pay I say.“

Grímur minn ég myndi mæta hjá ykkur á fundinn á Akureyri, ef ég væri ekki svona slæm í mjöðminni.

Talaðu bara ekki af þér Grímsi minn.

Þín Magnea

 

 

Bréf 116                                                                                 Viðey 30.júlí 2012

 

Kæri Eiður.

Ég er nú aldeilis hissa á þessu nöldri í þér Eiður minn út í þennan tekjusnepil.“nag nag“.

Auðvitað og augljóslega eru mótmæli íhaldsins út í snepilinn vegna minnimáttarkendar fyrrverandi borgarfulltrúa, sem skammast sín fyrir að hafa ekki nema 400þúsund spírur á mánuði, meðan Georg Bjarnfreðarson sem nú um stundir gegnir nafninu Jón Gnarr er með tæpar 1200spírur, „yes“.

Svo á hinum enda Eiður minn eru kallar eins og þú og Davíð sem finnst að þið eigið skilið að fá þessa aura frá okkur, finnst ekki neinum komi við hvað þeir fá í ellinni og hvaðan þeir koma, „leyndó leyndó Já“

En bara til að hressa uppá minnið Eiður minn þá færðu þessa aura frá okkur, þessum háttvirtu kjósendum, fyrir þær sakir að þú varst einu sinni gerfikrati sem blekktir okkur kjósendur.

Þú varst svo sem ekki einn um það því ekkert hefur breyst frá því þú varst upp  á þitt besta í pólitíkinni.

En elsku Eiður minn þú átt samúð mína alla út af þessum tekjusnepli. Ég var nærri búinn að gleyma þeim félögunum Dabba og Júlla borgó, en þeir eiga samúð mína líka.

Bless Eiður

Magnea

 

 

Bréf 117                                                                                  Ríkey 5.ágúst 2012

Kæra Margrét T

Elsku dúllan mín hvað fannst þér að? Kjólföt og glingur. Máttu kjólfötin ekki vera í hvaða lit sem er? Ég bara spyr,“yes simply ask“. Þú hefðir nú tekið þig vel út í hvítum kjólfötum eða maður tali nú ekki um í bleikum, maður lifandi, „yes“. En mér fannst nú helvíti klárt hjá stjóranum að mælast til þess að þið kæmuð með nýburstaðar tennur og samlitum skóm, með skafið undan nöglunum. Hugmyndin um sterkan leiðtoga sem þú settir fram er fjári góð. Ég tel það enga spurningu Magga mín að þú átt við hann, æ hvað heitir hann nú aftur?   Þór eitthvað, „yes Thor Sar“. Ekki er þinginu treystandi fyrir svo miklu sem að skrifa herra Ólafi þakkarbréf fyrir að leiða okkur inn í næsta kjörtímabil. Hugsaðu þér bara ef Thora hefði verið kosin, þá hefði Steingrímur ef til vill þurft að klæðast mussu, „yes muss“

Hvernig líst þér á þá hugmynd að bjóða sauðsvörtum almúganum til þessarar innsetningar forsetans og þið sem vinnið hvort sem er í húsinu fengjuð bara frí á meðan. Það mætti notast við slump-úrtak frá einhverjum Gallúpum eða Capasentum við val á boðsgestum, konur í kjól og menn í buxum, allir með nýburstaðar tennur, einfalt og verður örugglega vinsælt meðal ykkar þingmannanna.

Magga mín bestu kveðjur í þingið.

Þín Magnea

 

 

Bréf 118                                                                          Elliðaey 9.ágúst 2012

Kæra Harpa.

Ég sá það í blaðinu hans Dabba að allt sé í mínus hjá þér Harpa mín. Engar áætlanir hafa staðist, þrátt fyrir að margir reiknarar hafi reiknað og reikað í marga daga.

Hvernig var það nú aftur, voru reiknararnir ekki með reikningspróf úr Súper-gaggó á Melonum ? Voru enginn í þessum átta stjórnum sem sjá um þig Harpa mín þess umkomnir að reikna fyrir þig kostnaðinn sem þér fylgir? Vita þessir aular ekki að nylonsokkar kosta sitt nú eftir hrun ?

Hvernig datt þessum reiknurum í hug að það þú slippir með fasteingnagjaöld eins og af fjósinu hans Nuplólétt á Grímsstöðum? „I simply ask me dear“

Eins og stelpan í ráðuneytinu segir, þú hefur ekki selt þig nógu dýrt. Þú verður að hækka gjaldið og sleppa því að bjóða þessu fólki sem segist hafa vit á menningu. Það er ekkert of gott til að borga þér almennilega fyrir þjónustuna. „yes pay resonable price“.

Ég segi bara við þetta pakk sem er að nudda í þér. Hættið eins og skot og látið hana Hörpu mína í friði, það voruð þið sem sköpuðuð hana og ykkar að borga meðlagið og hananú, „yes pay the medlag“

Harpa mín það er ekki þér að kenna þótt þú sért ekki rétt verðmetin. Þú verður aldrei seld á einhverju bónusverði nei nei. „no bónus price“

Harpa mín ég fylgist með hverjir fara á þig á næstunni, en láttu þessar átta stjórnir skammta þér fyrir nærum og sokkum einhverja hungurlús. „jes hungerjús“

Harpa mín hafðu það sem allra best.

Þín einlæga

Magnea.

 

 

Bréf 119                                                                          Dyrhólaey 9.ágúst 2012

Kæra Kolbrún Bergþórs.

Mikið er það satt hjá þér sem þú páraðir í blaðið ykkar Dabba. Auðvitað er það tómur dónaskapur og ekkert annað en öfund þegar verið er að klína því á Bjarna gæsalappavafning og Sigmund glópalán að þeir séu þar sem þeir eru vegna þess að pabbar þeirra eru svo ríkir, „yes welthy“.

Þeir geta ekkert gert að því þótt þeir eigi ríka pabba.

Það er ekki að spyrja að þessu öfundarhyski í Samfylkingunni sem ekkert vit hefur á peningum, þeir sjá drauga í hverri peningahirslu. „yes ghosthillu“ eins og reykhús sagði svo snilldarlega á sínum tíma.

Fattar þetta pakk ekki að velgengni íslenskar stjórnmálamanna fer ekki eftir því hvort pabbarnir eigi einhverja aura eða ekki, heldur fer frami þeirra eftir því hvað pabbarnir hafa fengið mikið afskrifað af skuldum og hve marga vafninga þeir hafa tekið, „yes turning papers“.

Þetta fólk veit bara ekkert hvað það er að nöldra og ætti bara að skammast sín, „blame them all“

Eins og hægt sé að afskrifa hjá hverjum sem er, nei svoleiðis er ekki gert. Það verður að velja rétt fólk til að afskrifa hjá og ekki stjórnar Bjarni gæsalappi því, „no control“ en spurðu hann Steingrím hann stjórnar afskriftum. „yes“

Kola mín haltu áfram að skammast út í öfundarpakkið þú ert best í því, láttu bara ekki skáldagyðjuna stjórna því hvar þú párar, þú gætir gætið fengið nobelinn og ekki er það nú gott.

Ég hef samband við tækifæri Kolla mín

Þín Magnea

 

 

Bréf 120                                                                          Ævintýraeyjan 10.ágúst 2012

Kæri LÍN

Ég var að lesa fréttina þína um áætlanir og útkomu sjóðsins undanfarið. Áætlun stóðst engan vegin ekki einu sinni sem einskiptisaðgerð. LÍN minn hvað ertu að hafa áhyggjur af einhverri einskiptisaðgerð og samsetningu námsmanna, „I simply ask“ Hvaða rugl er þetta eiginlega á þér ?

Þú getur sparað milljónir á því að taka upp BörBörs kerfið í bókhaldinu hjá þér. Hættu öllum áætlum og svoleiðis hégóma sem skilar bara ykkur reiknurunum svekkelsi og veseni við að útskýra bullið, „yes bullshit“.Það virðist vera sama hversu mikið þið lærið að reikna þarna í SúperGaggo á Melonum  ykkur tekst bara ekki að gera áætlanir sem reynast í námunda við veruleikann, sama hvort það er byggingarkostnaður, rekstrarkostnaður eða annað. BörBörs kerfið klikkar ekki, „dont klikk no“

Fyrir þá sem ekki þekkja BörBörs kerfið þá er það byggt upp af tveimur nöglum, „yes two spikes“. Naglinn inn og naglinn út einfalt og gott, „wery simple yes“ Ef meira er á naglanum út er tap, en ef meira er á naglanum inn þá er gróði, elsku LÍN mín taktu upp þetta kerfi og þá verður Grímur ánægður. Það má alltaf gera áætlanir eftir á það er sára simpilt að láta þær standast, „yes“

Ég kveð að sinni.

Þín Magnea

 

 

Bréf 121                                                                          Útey 14.ágúst 2012

Kæri kjósandi, XD

Halldór evruverkfræðingur segir að kosningabaráttan sé byrjuð. Hann segir líka að Sjálfstæðisflokkurinn sé eini flokkurinn sem treystandi sé fyrir því að stjórna landinu.

En elsku besti kjósandi, yes dear woter“ líttu nú á.

Í stjórnartíð Sjálfstæðisflokksins, sem hrópaði báknið burt, hefur báknið vaxið og stækkað um 40%.

Í stjórnartíð Sjálfstæðisflokksins og Framsóknarflokksins voru bankar afhentir flokksmönnum sem reyndust vera ótíndir glæponar. Þetta var kallað einkavæðing en var í raun einkavinavæðing. Síminn var afhentur samskonar mönnum Áburðarverksmiðjan og Sementsverksmiðjan sömu leiðis. Svo má ekki gleyma því að undir stjórn sömu flokka fór Seðlabankinn á hausinn. En eins og Halldór verkfræðingur segir réttilega, hvað erum við að pæla í svoleiðis smámunum, við eigum bara að hugsa í sjálfbæru núinu.

Auðvitað kjósum við Sjálfstæðisflokkinn hvað annað ég segi bara það, „tell no more“

Ykkar einlæga Magnea.

 

 

Bréf 122                                                                                      Útey 14.ágúst 2012

Kæri kjósandi, XB

Það voru nú góðir tímar meðan Halldór okkar Ásgrímsson var að braska með bankanna í bakherberginu  hjá honum Davíð okkar, „yes brask“. Ef ég fæ Búnaðarbankann þá mátt þú fá Landsbankans sagði Dóri en bætti við, ég vil að hann Finnur minn fái skoðunarstöðina og eitthvað smávegis meira, „yes a litle more“. En þá verð ég að fá eitthvað af keflavíkurvellinum sagði Dabbi. Svona gekk þetta nú fyrir sig, Yes me dear“.

Svona eiga pólitíkusar að gera. Þessi helvítis almenningur er ekki of góður til þess að gefa okkur þetta smáræði. Lægst virtir kjósendur eiga ekkert með að finna að þessu, og hananú. Ekki var nú að spyrja að því mokað var í almenning súkkulaði og lygum um stöðu fjármála. Allt í þessu fína „wery fine yes“.

Við frammarar segjum bara, kjósum Sigmund glópalán, hann er ekki í sama framsóknarflokki sem var þegar Halldór og Valgerður stjórnuðu honum. XB segi ég bara, „yes wote XB“

Ég er bara hálf ringluð í dag var ég ekki rétt áðan eða var það í gær að segja XD? Ég held bara að ég verði að leggja mig.

Ykkar Magnea

 

 

Bréf 123                                                                          Pukurey 15.ágúst 2012

Kæri kjósandi XS

Mikið þótti mér vænt um Jóhönnu þegar hún flutti framboðsræðuna um árið. Hún sagði með þunga, skuldir heimilanna eru alltaf að aukast, þetta sagði hún eftir hækkun á smérinu. Þegar við Samfylkingin verðum komin í stjórn verður það okkar fyrsta verk að afnema verðtryggingu á lánum almennings.  Svo ætlum við líka leiðrétta stökkbreyttu lánin ykkar. Gott hjá Jóku minni, „good Jok yes“.

Við munum slá skjaldborg um okkur þingmenn en setja upp tjaldborg fyrir ykkur aumingjanna sem kusuð okkur.

Við munum sjá til þess að skuldir verði afskrifaðar hjá útrásarvíkingum og öðrum sem eru okkar menn.

Við munum gæta þess að auðmenn tapi ekki á einhverri verðbólgu.

Við munum sjá til þess að þið aumingjarnir sem kusuð okkur verði rukkuð um hverja krónu sem þið tókuð að láni.

Við munum ekkert gera varðandi ólögleg lán til ykkar aumingjanna, þið bara borgið og hana nú, „yes pay you stupit fool“

Allt verður uppi borðinu, það verður allt upplýst smátt og stórt allar ákvarðanir verða aðgengilegar, öllu verður velt við og almenningi veittur aðgangur að þeim, ekkert verður falið.

Rannsóknarskýrsla verður höfð til að draga þá til ábyrgðar sem settu allt á annan endann, glæponarnir verða látnir sæta ábyrgð og endurgreiða illafengið fé. „wery good Joka yes I lowe you“

Ha, hvað ertu að segja á að geyma þessar skýrslur í 100 ár? Elsku besta eitthvað er nú bogið við þetta.

Bara til að upplýsa ykkur kjósendur Samfylkingarinnar, þá hefur aldrei verið meira leyndó yfir gerðum banka og ríkistjórnar eftir að Jóka mælti þessi orð. Verðtryggingin er enn, og hækka skuldir heimilanna í hvert skipti sem smérið hækkar. „yes pay more“

Við sem elskum Samfylkinguna kjósum að sjálfsögðu hana Jóku einu sinni enn XS XS Jóka er best hvað annað svo sem?

Ykkar einlæga.

Magnea

 

 

 

Bréf 124                                                                          Pukurey 16.ágúst 2012

Kæri kjósandi XV

Mér þykir græni liturinn hjá ykkur svo fínn, hann er svo róandi og mildur. Þegar maður æsir sig upp út af því að maður er blankur, þá þarf maður ekki annað en horfa á flokksmerkið græna, þá róast maður og gleymir blankheitunum. Ég hef tekið eftir því að Bjarni gæsalappi Ben og Sigmundur glópalán geispa þegar þeim er litið á græna litinn í merkinu ykkar, hann er svo róandi að jafnvel heitustu andstæðingar ykkar sofna bara við að sjá hann.

En elsku Grímur minn, mér finnst þú eigir að láta lita á þér skeggið, það er hörmung að sjá það, bara ekkert grænt í því.

Þið Jóka eruð góð saman, allt í leyndó og afskriftir hægri vinstri, allir happó nema þeir sem kusu ykkur í þeirri trú að einhver breyting yrði á fjármálaruglinu. „yes mony mess“. Hvernig var það nú annars ætluðuð þið vinstri grænir ekki að gera eitthvað við verðtrygginguna? Var ekki meiningin að fletta ofanaf öllu svindlinu og sukkinu? Átti ekki að skamma ljótu strákana í bönkunum sem tóku sér margföld laun við að koma landinu á hausinn? Ætluðuð þið ekki að skamma fjárhættuspilaranna í lífeyrissjóðunum fyrir  að tapa lífeyri gamalmennanna sem borguðu í þá ?

Kæri Grímur minn illa finnst mér þú hafa farið að ráði þínu að taka það í mál að starfa með XS án þess að gera þá kröfu til þeirra að þeir losuðu sig að minnsta kosti við hrunstjórnarráðherrana og jafnvel fleiri. „yes throw them all out“.

Ég fæ ekki betur séð að flestir sem voru í stjórnum fyrirtækja og settu þau á hausinn séu það enn eftir milljarða afskriftir. Er þetta í anda í velferðarstjórnar ykkar Jóku? Ég bara spyr. „I simply ask“.

Er það ykkar vilji að þeir sem tóku ólögleg lán, séu rukkaðir eins og allt sé í stakasta lagi? Er það svokallað velferðarréttlæti? Ætlið þið vinstri grænir að standa að því að tæma lífeyrissjóðina í steypumót á Landsspítalalóðinni ? Er einhver velferð fólgin í því að eiga steinkassa en ekkert til að setja í hann? „Yes emty concret box“.

Elsku kjósandi XV ég bara bið þig. Nú verð ég að horfa á græna litinn svo ég springi ekki af reiði. Baráttu kveðja XV XV

Ykkar Magnea

 

 

Bréf 125                                                                                      Ögurey 2.sept. 2012

Kæri Ögmundur.

Þú ert frábær, lætur ekki neinar jafnréttiskerlingar smekk fullar af öfund stjórna þér. Auðvitað ræður þú hverja þú hefur í vinnu hjá þér, ekki nema hvað? „so what“  Ég segi bara það haltu áfram að stjórna og gefðu frat í þetta nöldur sem er út í þig. Það kostaði Jóku ekki nema 500 þúsund að gera eins og þú gerðir, svo það ætti ekki að kosta þig meira en hana Jóku, og hvað er ein milla í sláturtíðinni ? „I simpy ask“

Þetta jafnréttiskjaftæði sem þið Jóka lofuðuð er bara til heimabrúks um helgar fyrir lúsera sem fá hvort sem er ekki vinnu neins staðar, „yes lusers“. Öfundarpúkarnir sem eru að jagast út í þig og Jóku eru bara öfundsjúkir út í ykkur, af því þið eruð í stjórn. Þeir myndu gera nákvæmlega sama ef þeir réðu, það hafa þeir sýnt. Ögmundur minn, haltu áfram að stjórna og láttu ekki grátkerlingar afvega leiða þig með þessu jafnréttis röfli. „yes“  En mundu bara eftir henni Soffíu frænku hún verður að fá vinnu hvað sem það kostar, hún er svo blönk greyið. Upplagt að nota þetta jafnrétti til að koma kellunni í vinnu. Auðvitað ferðu að lögum þegar þú reddar henni Soffíu.

Getur þú ekki endurnýjað þessa jafnréttisnefnd og losað þig við þessar nöldurkerlingar sem halda bara að þær eigi  að ráða ?

Láttu þér bara ekki detta í hug að segja af þér út af þessu nöldri. „nag nag nag“

Öggi minn þú veist að ég stend með þér.

Kveðja þín

Magnea

 

 

Bréf 126                                                                                      Pottasker 19.okt.2012

Kæra Anna B.

Mikið þótti mér vænt um þegar þú bauðst til að leiðbeina okkur aulunum hvernig við eigum að greiða atkvæði á morgun.

Þessi stjórnarskrár snepill er ekkert annað en arfavitlaust plagg sem þið skuluð ekki eyða tíma í að lesa. Svo er þetta ekkert annað en útúrsnúningar og þvæla um að okkar fólk megi ekki ráðstafa þessu sem enginn veit hvað er en en er kallað auðlindir. Hverskonar rugl er þetta eiginlega? ég bara spyr „yes simply ask“.

Og svo er eitthvað í þessum snepli sem þessir menn kalla þjóðin. Þjóðin hvað er nú það eiginlega, geta þessir menn skýrt það ég bara spyr? Solla sagði í Háskólabíói að þúsund manns væri ekki þjóðin, svo þið sjáið bara hverskonar rugl þetta er eiginlega. „ yes bullshit“

Anna mín þetta er allt rétt hjá þér og leiðbeiningarnar eru kristalklárar. „kristal clear yes“

Voru þær ekki svona annars?

Ef Bjarni gæsalappi, Sigmundur glópalán, Dabbi Hádegismóri, Nonni hæstaréttar, Geir Hardi og Hannes þjófur segja nei,  þá skalt þú segja já, svona einfalt er þetta nú.

Þetta er nú bara svo skírt að það er algjör óþarfi að lesa þetta plagg sem þú sagðir okkur frá.

Skrifa þér eftir helgi ef úrslitin verða hagstæð.

Kveðja, Magnea

 

 

Bréf 127                                                                       Pottasker 21.október 2012

Kæra Anna B.

Leiðbeiningarnar sem þú gafst í fyrradag hafa greinilega virkað. Þegar ég gjóaði augunum á tölvuskjáinn sá ég að 66% höfðu sagt já, bara eins og 66° norður.

En ég spái því að Bjarni gæsalappavafningur „goose foot twister“ og hans lið segi eins og Ingibjörg Solla sagði í Háskólabíói, þetta er ekki  Íslenska þjóðin, þetta eru bara nokkrir lúserar sem þola ekki réttlæti okkar Sigmundar glópaláns.

Elsku Anna mín, ég vona að þér líki útkoman. Það er alveg rétt hjá þér að benda Bjarna gæsalappa á það, að þeir sem heima sátu og sötruðu bjór og kaffi meðan þú og við sem  dröttuðumst á  kjörstað og greiddum atkvæði  , treystu bara ekki á sjálfa sig. Eins og þetta var nú einfalt þegar maður las leiðbeiningarnar frá þér, elsku Anna mín „so simple“

Ég skil bara ekkert í þessu fólki það hlýtur að vera Íslenska þjóðin sem sat heima og sötraði bjór og kaffi, nema þeir sem sögðu nei, það er örugglega líka hluti Íslensku þjóðarinnar.

Já lúserarnir tilheyra einhverri annarri þjóð Anna mín, þetta lið ætti bara að setjast að á Tenerífe eða einhversstaðar þar sem sólin skín.

Elsku Anna mín nú bíð ég eftir úrslitunum og viðbrögðum fræðimanna eins og til dæmis Hannesi þjófi og Jóni Steinari fyrrverandi.

Elsku Anna mín ég læt þetta duga í bili.

Bestu kveðjur, til ykkar hjónanna, og góða ferð.

Magnea

 

 

Bréf 128                                                                          Flæðisker 21.október 2012

Kæri Jón Valur.

Mikið þykir mér vænt um skrifin þín. Þú segir sko aldeilis rétt þegar þú bendir á að við missum sjálfstæði okkar við það bara að horfa í áttina að Evrópu. Fullveldið fer til helvítis alveg eins og hjá Dönum og Svíum, svo ég minnist ekki  á aumingja Finnana, þetta lið hefur allt glatað sjálfstæði sínu og ákvarðanatöku yfir málefnum Portúgala.

Auðvitað er ekkert vit á því að breyta einu eða neinu hér í þessu volaða samfélagi Jón minn Valur. Hvaða vit er til dæmis í því að þjóðin fái arð af auðlyndum sínum ég bara spyr? Hvaða vit er í því að taka kvótann af blessuðum englunum sem af stakri fórnfýsi  veiða fyrir okkur fiskinn án þess að þurfa að borga fyrir veiðileyfin?  Hvernig eiga þeir svo sem að geta borgað?  Til dæmis skuldar Samherji  sem svarar 501 hjartaþræðingavél, það er ekki sanngjarnt að þeir þurfi að borga þetta lítilræði (75 milljarðar).

Nei Jón minn Valur, þar sem  mikill minnihluti kjósenda  sagði já,  en þeir sem sögðu nei  tilheyra miklum meirihluta kjósenda, vandinn var bara sá að þeir sem ekki greiddu atkvæði rötuðu ekki á kjörstað til að segja nei.

Helvítinu honum Steingrími að kenna að setja ekki upp almennileg skilti svo fólk jafnvel með smá í öðrum eða báðum fótunum rataði til að kjósa.

Ég segi bara það Jón minn, það er ekki hægt að hafa almennilegar þjóðaratkvæðagreiðslur hér fyrir villitrúarfólki sem hugsar bara um brennivín og heldur að kosningar snúist um öl og partí.

Skrifa þér seinna elsku Jón minn

Þín Magnea

 

 

Bréf 129

Kæri Staksteinn.

Það er sko alveg rétt hjá þér Dabbi minn, þetta með útvarpsráðið, hvað hafa svo sem einhverjir gaurar út í bæ vit á fréttavali í útvarpi og sjónvarpi? Nei og aftur nei, auðvitað á meirihluti á alþingi að ráða hvað er sagt í útvarpinu en þó enn frekar hvað ekki er sagt, það sjá nú bara allir. Þessir gaurar sem þykjast vera að vinna þarna í Efstaleytinu eiga bara ekkert með að rífa kjaft út af þessu útvarpsráði. Það sjá bara allir að þeir sem eru á Austurvellinum eru næst því sem er að gerast í landinu og geta því einir ákveðið hvað er hollt fyrir svokallaðan almenning að heyra og sjá, og hvað ekki. Ég treysti sko Illhuga menntráðherra fullkomlega til að velja sína og Bjarna gæsalappa-menn í þetta ráð til að koma í veg fyrir að þessir þarna í útvarpinu og sjónvarpinu sendi eihverja vitleysu út á öldur ljósvakans. Já Dabbi minn ég segi bara það. Ég ætla bara ekki að kveikja á þessum kössum fyrr en ég er viss um að þínir menn séu sestir undir stýrið, þangað til ætla ég bara að hlusta á Útvarp Sögu, þar er engu logið.

Elsu Staksteinn minn, ekkert stress, bless.

Þín Magnea.

 

 

Bréf 130                                                                       Nöldurey 6.júlí 2013

Kæri Sigmundur glópalán D. Gunnlaugsson.

Mikið er ég sammála þér að taka ekki mark á þessum skammstöfum utan úr heimi. Hvað svo sem þessar skammstafanir hafa vit á okkur íslendingum ? ég bara segi það. Meðan evrópufésið hefur ekki sannað sig fyrir Íslandi þá skulu þessar skammstafanir bara tala fyrir sig.

AGS, LSD, SA, DV, MBL, OECD, LÍN, FÍB, DB, ESB, EB, EIR, DAS, HHÍ, FÍ, BLÍ, BSRB, BB, LB, ISB, LB, og svo má lengi telja. Eina skammstöfunin sem ég veit að sé til einhvers gagns er LÍÚ. Auðvitað ber að fara eftir alvöru skammstöfunum þegar þiggja skal heil ráð, hvað annað segi ég bara ? Elsku drengurinn minn ef einhver er að bulla og nefnir til sögunna aðrar skammstafanir en LÍÚ þá bara segir þú sem rétt er, það er ekkert að marka þetta þvaður í ykkur og hana nú.

Simmi minn elsku drengurinn hlustaðu ekki á nöldrið um kosningarloforð, það kemur frá nautheimskum almúganum sem hefur ekkert vit hvorki á pólitík né fjármálum. Það er bara gott á þetta hyski hvernig komið er fyrir því, það hefur kosið þetta yfir sig og á ekki betra skilið. Þið þarna úti, hættið að skammast út í Simma og Bjarna, þeir mega alveg gera það sem þeim dettur í hug, þeir eiga þetta og mega þetta.

Þín ástkæra

Magnea.

 

 

Bréf 131                                                                                     Engey 2.okt. 2013

 

Kæri Bjarni gæsalappa-vafningur.

Ég var að hlusta á þig áðan í sjónvarpinu. Hvert orð sem þú sagðir var tær snilld.

En vertu viss, þegar úrtölu-kommarnir lesa þetta fjára-frumverp umturnast þeir og snúa út úr hverri setningu. Hvaða vit er til dæmis í því  að skattleggja yfirhagnað þegar þarf að afskrifa hjá snilldarvel reknum fyrirtækjum eins og eignarhaldsfélaginu Svartháfi, það voru ekki nema 38 milljarðar afskrifaðir hjá þeim, bara smáaurar er það eitthvað merkilegt ?

Fyrir 38 milljarða er ekki hægt að kaupa nema 253 hjartaþræðingarvélar, eða 10 geislalækningatæki. Hvað eru menn svo að rífa kjaft ég bara segi ekki meir „say no more“.

Nei Bjarni minn ekki láta þessa komma stoppa þig í að spara fyrir okkur útgjöldin. Þú ert með að mér skilst 88 sérfræðinga sem eru að minnsta kosti búnir að læra í sjö ár hver í súpergaggó á melunum. Þeir hafa áræðanlega komist að þeirri niðurstöðu alveg eins og Hannes að því að minni skattar sem koma í ríkiskassann þeim meira verður í honum.

Hvað er fólkið að væla yfir því að þurfa að borga lítilræði fyrir gistingu á Lansanum?  Þetta er miklu ódýrara en á tjaldstæðinu í Laugardal. Mig grunar raunar að þingmenn verði undanþegnir þessu beddagjaldi en hef samt ekki fengið það staðfest.

Ég skrifa þér bráðum aftur elsku drengurinn.

Þín Magnea

 

 

Bréf 132                                                                                  Vigdísasker 4.okt.2013

Kæra Vigdís Gríms.

Ég er vön að kalla þig Viggu, er það ekki í lagi?

Þegar ég heyrði þetta ómerkilega nöldur út í Lansann vegna  beddagjaldsins, datt mér eitt í hug.

Ég spurði kunningja mína hvort þeir vildu ekki möguleika á að vera tveir saman í rúmi á Lansanum ef þeir þyrftu að leggjast þar inn veikinda sinna vegna.

Jú sagði einn, hvenær ætlar Vigga að láta taka úr sér botnlanga næst? Ég er alveg til í að leggjast inn á Lansann og deila rúmi með henni. Það verður bara helmingur á hvort okkar, hræ ódýrt..

Fyrir afskriftir félaga vinar þíns og flokksbróður Finns Ingólfssonar FS7 eða Fikts ehf má borga 2 milljónir og fimmhundruð þúsund gistingar á Lansanum. Ef tvö eða tveir eru saman þá gera þetta 5 milljónir gistnátta. Öll þjóðin gæti gist í 14 nætur fyrir þessar afskriftir.

Já Vigga mín mér líst alltaf betur og betur á þetta, veit bara ekki hvar þetta endar „No end me frend“

eins og Ragnar reykhús sagði.

Haltu ótrauð áfram Vigga mín að finna upp allskonar gjöld sem hægt er að rukka þetta fólk sem þykist vera veikt en liggur bara á Lansanum í leti og ómennsku. Til dæmis skeinipappírsgjald, ljósaperuleigu það er alger óþarfi að glenna upp ljós fyrir þetta fólk sem er þarna að „hugga“ sig eins og danskurinn segir.

Vigga mín ég skrifa fljótlega aftur, bestu kveðjur

Þín Magnea

 

 

Bréf 133                                                                                   Spítalasker 21.okt 2013

Kæri Kristján minn Júl.

Hvað er þetta fólk þarna á spítölunum að kvarta, er ekki nógu hlýtt inni hjá þeim eða kvað?

Þetta er sínöldrandi yfir öllu, það má ekki bila tæki svo þeir fari ekki í blöðin með það. Þeir eru alltof margir segja sumir, Þó það nú væri að þeir séu búnir að fatta netið, ég segi bara það. Er eitthvað að því að panta notaða varahluti á netinu, þeir eru miklu ódýrari þannig. Nei Stjáni minn ansaðu ekki þessu væli í fólkinu, stattu með þínum kjósendum og haltu áfram niðurfellingu skatta og afskriftum til bláfátækra útgerða.

Þetta spítaladót má sko bíða næstu stjórnar, þeir fá þá eitthvað að gera blessaðir. Haltu þér við staðreyndirnar, og kosningaloforðin

Þótt járnskip greiði 158 milljóna í arð og eigi 3,2 milljarða umfram skuldir í þessu  járnadrasli, þá borguðu þeir alveg helling í skatta og veiðigjöld. Þótt arðurinn væri 25 millum hærri en veiðigjöldin er engin ástæða til að grenja, svona á þetta bara að vera segi ég Kiddi minn.

Svo voru einhverjir þingmenn (ábyggilega kommar) að segja að þið ráðherrarnir hlustið ekki á vælið í þessu spítalafólki. Ríkisstjórnin bara hlustar ekki eða heyrir ekki segja þeir.

Ég segi bara, hvernig liti dæmið út ef ríkisstjórnin hlypi eftir allri vitleysinu sem þessum svokölluðu sérfræðingum dettur í hug? Þá væri ekki hægt að lækka veiðigjöldin og afskrifa skuldir þessara bláfátæku útgerða, eymingjarnir yrðu bæði svangir og ráðvilltir ef arðurinn minnkaði um einhverjar millur.

Kiddi minn dyrabjallan hjá mér var að hringja svo ég segi bara bless í bili.

Þín Magnea.

 

 

Bréf 134                                                          Bjarnfreðarsker 01.nóv 2013

Kæri Georg

Mikið varð ég feginn þegar ég heyrði að þú ætlaðir ekki að vera borgarstjóri lengur. Nú þarftu ekki lengur að þykjast vera einhver Jón Gnarr. Þú getur aftur farið að gangast við nafninu Georg Bjarnfreðarson, enginn feluleikur lengur með nafnið, þú ert flottur segi ég bara, áfram Goggi.

Ekki láta  helvítis íhaldið hafa taumana, þeir gera bara hverja vitleysuna eftir aðra. Betra að fá sjóræningja til að stjóra heldur en samfylkingar-vinstri-grænt-framsóknar-íhald.

Er ekki Björt Framtíð einhverskonar kokteill úr þessum fjórflokki ? ég bara spyr.

Georg minn elskulegur er það ekki áræðanlegt að þú verðir næsti forsætisráðherra? ég bara ætla að vona það „yes hope so“

Sæta stelpan sem var í fyrirsvari fyrir Besta Flokkinn, man ekkert hvað hún heitir, er flott, verst ef hún er hefur drukkið of mikið af þessum bjarta framtíðar kokteili. En það má láta renna af henni fyrir næstu kosningar.

Ég segi bara áfram Goggi, áfram Goggi, láttu úrtölupakkið ekki komast upp með neina vitleysu, vertu okkar maður við stóra stýrið, þegar Bjarni gæsalappi og Sigmundur glópalán hrökklast frá því.

Ég ef auga með þér vinurinn.

Þín Magnea

 

 

Bréf 135                                                                                  Glópasker 10.nóv.2013

Kæri Sigmundur glópalán.

Hvað eru þessir gaurar og gaurur að rífa kjaft þarna í alþingiskofanum við  Austurvöll yfir því að þú gafst skýrslu um stöðu skuldaleiðréttinga sumra heimila..

Heldur þetta lið sem kosið var til þingsetu eigi að vera með einhvern kjaft við ykkur Bjarna gæsalappa, ég mara spyr ? “yes I simply ask“

Skilur þetta lið ekki að því fleiri heimili sem boðin eru upp þeim mun minna þarf að leiðrétta.

10 nefndir og starfshópar eiga að sjá til þess að búið verði að bjóða sem flest upp svo ekki þurfi að hafa áhyggjur af  leiðréttingu til þeirra. Tær snilld segi ég bara. Enda sömu hugmyndafræðingar á ferð.

Sigmundur minn ekki láta það fara í taugarnar á þér þótt Bjarni gæsalappi og íhaldshjörðin hans hafi skroppið í kaffi meðan þú gafst skýrsluna góðu sem sagði akkúrat ekkert um skuldaleiðréttingu annað en það að verið væri að skoða möguleika á því hvernig væri hægt að leiðrétta forsendubrest  á kostnað svokallaðra kröfuhafa.

En svona bara fyrir þig, þú lætur það ekki fara lengra. Bakkabræður fengu afskrifaða 170 milljarða hjá Kaupþingi og Arion banka 2008. Bara þessi eina afskrift nægir til kaupa á 425 geislalækningatækjum. Það vantar bara eitt eða tvö svoleiðis tæki fyrir spítala landssins.

Simmi minn farðu varlega í umferðinni, ég er viss um að einhverjir öfundarpúkar sitja um að keyra yfir þig.

Sjáumst í næsta kokteilboði

Þín Magnea.