Bréfin frá Magneu 1-70

Bréf-1                                                                             Flatey 23.júní 2009

Kæri Halldór.

Mikið sakna ég þín. Það barasta heyrist ekkert frá þér. Hvar ertu eiginlega ?

Ég minnist þess alltaf þegar þú og hann Davíð minn leystuð bankana úr álögum ríkisins.

Þá fyrst fóru peningarnir að vinna fyrir okkur, áður voru þeir dauðir í lokuðum hvelfingum bankanna. Það má heldur ekki gleyma gæfusporinu sem stigið var af þér þegar þú settir fiskinn undir kvótann. Eins og Hansi sagði, fiskurinn er einskis virði nema hægt sé að selja hann óveiddan.

Það má heldur ekki gleyma því hvernig þú hækkaðir lánin á húsunum okkar, það er eitthvað mesta gæfuspor sem stigið hefur verið í þágu fólksins.

Nú eiga allir húseignir sem tvöfölduðust í verði á örfáum mánuðum. Þótt þær séu óseljanlegar nú um stundir er þó ánægjulegt að sjá hve verðmætið er mikið. Svo fáum við líka að leggja meira til samfélagsins í hærri fasteignagjöldum. En það er eins Davíð, þú varaðir við þessu og reyndir hvað þú gast til að koma í veg fyrir þetta, en það var ekki hlustað á þig. Því fór sem fór.

Það var heldur ekki þér að kenna að óráðsíumenn komust til valda í bönkunum. Þið Davíð vöruðuð við allan tímann. Ég skil þig vel að hafa farið til útlanda þar sem hlustað er á þig og látið hina frammarana um að stjórna.

Elsku besti Dóri ég hef þetta ekki lengra í þetta skiptið. Vonandi hefurðu það sem allra best í útlandinu.

 

Þín Magnea.

 

 

Bréf-2                                                                                      Engey 23.júní 2009

Kæri  Davíð.

Mikið finnst meir óviðfeldið hvernig fólk talar um þig þessa dagana. Það er engu líkara en allt sem gengið hefur á undanfarna mánuði sé af þínum völdum.

Fólkið áttar sig bara ekki á því að það varst þú sem varaðir alla við. Það varst þú sem sagðir að bankarnir væru að stækka of mikið. Það varst þú kæri Davíð sem sagðir  Fjármálaeftirlitinu að bankarnir ættu að hægja á sér með þessa reikninga í útlöndum, ísleif eða hvað þeir nú heita. Þú gerðir allt sem í þínu og Seðlabankans valdi til að sporna við þessum ísleifsreikningum, þú meira að segja hækkaðir stýrivextina og nánast afnámst bindiskylduna  til að bjarga fjármálunum hjá okkur. Svo koma þessir spekingar úr bönkunum og segja að allt sé þér að kenna, svei segi ég bara.

Það varst líka þú sem sást í gegnum Baugsveldið og áróðurmiðla þess, en eins og fyrri daginn tók enginn mark á þér nema Geiri Harði og Gerða leikaradóttir, en það var ekki nóg allir hinir bara sögðu að þetta væri öfund í þér.

Kæri Davíð ég meina það, þessir bankaglæponar og Baugarar ættu barasta að skammast sín. Það voru þeir sem urðu til þess að þér var bolað úr bankanum, illu heilli. Allt hefur farið á verri veg eftir að þú varst rekinn út. Gengið hefur fallið,  fólk í útlöndum hefur hótað okkur öllu illu ef við borgum ekki skuldir óráðsíumannanna og kvennanna sem settu fjármál þjóðarinnar á hliðina. Þetta fólk sem segir þetta um þig elsku Davíð minn á bara að skammast sín og hana nú.

 

Þín Magnea.

 

 

Bréf-3                                                                                                    Þerney 24.júní 2009

Kæri Sigurljón.

Ekkert skil ég í þessu blessaða fólki sem er að nöldra yfir því þótt þú takir smá lífeyrislán til að gera við gluggana heima hjá þér. Það taka jú fleiri lán út á húsin sín en þú..

Þetta er ekkert annað en öfund hjá þessu fólki sem er sífellt nöldrandi yfir velgengni annarra. Þetta blessaða fólk áttar sig bara ekki á því að það eru einhver vandræði merð gjaldeyri, svo þér veitist jú erfitt að koma þessum fáu evrum sem þér tókst að skýla fyrir ágangi skattmanns til landsins.

Ég skil bara ekkert í þér að vera hér á klakanum á þessum erfiðu tímum. Allir vita best af hverju landið er gjaldþrota. En enginn gerir sér grein fyrir þeirri gæfu sem þjóðin hefur haft af stjórn þinni og fleiri á fjármálum. Hvernig væri komið fyrir okkur ef einhverjir aðrir hefðu stjórnað þessu ? ég bara segi ekki annað.

Ég veit að þú gerðir þitt besta til að bjarga okkur frá þessu rugli með Ísleifsreikningana í útlöndum, en það var ekki hlustað á þig frekar en hann Dabba minn.

Elsku Sigurljón ég vona svo sannarlega að fólkið átti sig á þessu og allt verði gott aftur.

 

Kær kveðja

Magnea.

 

 

Bréf-4                                                                                                     Flatey 24.júní 2009

Kæri Pálmi.

Enn er verið að bulla tóma steypu um þig. Fólkið segir að þú hafir verið að kaupa og selja sjálfum þér einhver fyrirtæki. Er þetta ekki dæmigert rugl þeirra sem hafa ekkert vit á viðskiptum ? Hvernig hefði fólkið komist til útland undanfarið ár, ef menn eins og þú hefði ekki notið við ? ég bara spyr. Hver nema þú gerðir fátæklingum kleift að ferðast til Köben og London ? Ekki var það ríkið, ó nei það varst þú elsku Pálmi minn og fólk með háleitar hugmyndir um einkarekstur eins og þú og Hansi. Allt þetta bull um að þú hafir hækkað eitthvað verð á flugfélagi frá einni sölu til annarra er bara öfund. Það er heldur ekkert merkilegt við það þótt félag sem þú stjórnar hækki í verði milli ára. Þeir sem áttu það á undan þér stóðu sig nú ekki betur en það að flugfélagið var komið í þrot þegar þú keyptir það og bjargaðir því.

Svo er þetta fólk að hneykslast á því að þú eigir einhverja einkaþotu. Og ekki bara það heldur að sætin í henni séu klædd leðri, Þvílík öfund. Hvað heldur fólk eiginlega að það sé ?

Auðvitað verður þú að eiga einkaþotu, ekki er hægt að ætlast til þess að þú ferðist með þessum vélum sem þú bíður fólkinu uppá  Það eru bæði ljótar flugfreyjur og þröngt á milli sætanna í þeim. Hvað er fólk eiginlega að pæla þótt þú eigir Reins, menn skilja ekki að það þarf að komast milli staða á jörðu niðri. Ekki fer þetta sama fólk í strætó út á Keflavíkurvöll þegar það fer til útlanda, ó nei ekki.aldeilis.

Elsku Pálmi minn, ég hef þetta ekki lengra í bili, en mikið vildi ég heyra frá þér, svona við tækifæri.

 

Þín einlæga

Magnea

 

 

Bréf-5                                                                                                     Purkey 24.júní 2009

Kæri Geir.

Það er ekki að spyrja að hælbítunum. Komnir í hælana á þér um leið og þú hægir á þér. Mér ofbýður lágkúran í þessu fólki, sem virðist sjálfskipaðir sérfræðingar um efnahagsmál sumir ekki einu sinni stúdentar hvað þá meir.

Þú sem ert með þrjár háskólagráður í peningafræðum meira að segja. Hvað er þetta fólk eiginlega að meina ?

Þú sem hélst öllum upplýsingum fyrir þig og þína um hrun Íslands enda eins gott að fólkið sem á að borga viti ekki fyrir hvað það á borga.

Þér tókst elsku Geir minn að halda þjóðinni frá sannleikanum í meira en eitt ár fyrir hrun, geri aðrir betur. Bréfið sem þú sendir til vinaþjóða okkar  fyrsta desember er algjör snilld. Það sjá allir að það voru einhverjir ljótir kallar í útlöndum sem ullu því að bankarnir þrír í einkaeign fóru á hausinn. Þíð Davíð vinur minn höfðuð jú varað við þessu í langan tíma eins og við vitum öll.

En hælbítarnir halda áfram að níða þig niður fársjúkan manninn fyrir einhvern fellibil frá útlöndum sem skall á fjármálakerfi landsins og setti þessa einkabanka á hausinn. Eins og þú segir réttilega þá eigum við ekki að borga fyrir það.

Mikið er ég feginn því að þú sért ekki lengur ábyrgur fyrir þessari vitleysu, nóg er samt á þig lagt. Gott hjá þér að láta gæsalappa taka við flokknum.

Þessi D. Strauss-Kahn bankamaður sem heldur því fram að þú hafir brugðist rangt við hruninu, er bara einn af hælbítunum og hefur ekkert vit á íslensku hag- og bankakerfi. Enda er maðurinn bara framkvæmdastjóri Alþjóðagjaldeyrissjóðsins.

Svona menn eiga bara að vera heima hjá sér og ekkert að vera að skipta sér af okkur.

En hvað um það, það er af mörgu að taka Geir minn. Ég skrifa þér kannski seinna þegar betur árar.

Kær kveðja.

Þín Magnea

 

 

Bréf-6                                                                                         Ögur 24.júní 2009

Kæra Gerða

Nú eru spennandi tímar og við eigum bara að nota tækifærið og mennta okkur fyrst við erum ekkert að gera hvort sem er. Allt farið til helvítis og atvinnuleysið aldrei meira.

Svo er fólk að kenna ykkur um þetta gegnheilum íslendingum og valinnkunnum sjálfstæðismönnum og konum.

Þvílíkt bull, hvað á svona eiginlega að þýða ? ég bara spyr. Ég veit að þú Gerða mín og Geiri Harddi meintuð þetta með að nota kreppuna til að mennta fólkið. Ekki veitir af eins og þeir fáu sem eru menntaðir hafa farið með þjóðina. Engu líkara en ótýndir götustrákar hafi farið með bankamálin hér á landi undanfarin ár.  Ekki dettur mér eitt augnablik í hug að þú og Geiri hafið komið nálægt þessu peningaklúðri.

Það var auðvitað eitthvert regluverk frá útlöndum sem stjórnaði þessu öllu saman, meira að segja er mér sagt að regluverkið frá Brussel hafi beinlínis stofnað þessa ísleifsreikninga sem sett hefur okkur á kaldann skuldaklakann. Og maður tali nú ekki um Edss reikningana. Allt er þetta helvítis regluverkinu frá Brussel að kenna.

Nú ætlar víst súpergaggó á Melunum að kenna “Ponzi” aðferðina til að rétta við efnahaginn hjá okkur.

Það er tími til kominn segi ég bara að þessi súpergaggó fari að kenna eitthvað sem vit er í. Verst að skólarnir geta bara ekki tekið við öllum sem vilja læra. Þeir sem komast ekki að í skólunum geta þó alltént barið potta á Austurvelli, svona þegar veðrið er sæmilegt..

Gerða mín þú þarft ekkert að skammast þín þótt pabbi þinn sé bara leikari, það er ekki þér að kenna.

Nú verð ég að hætta. Skrifa þér kannski einhvertíma aftur.

Kær kveðja elsku Gerða mín

Þín Magnea.

 

Bréf-7                                                                 Kolbeinsey 25.júní 2009

Kæri Sigurður.

Það eru allir vondir við þig. En ekki ég elsku Siggi minn. Ég er ekkert að öfundast útí þig þótt þú eigir skuldlaust hús á Valhúsahæð. Allir geta átt skuldlaus hús eins og þú bentir réttilega á um daginn. Formúlan er bara að taka ekki lán, svo einfalt er það nú.

Svo eru hælbítarnir eitthvað að segja að þú  hafir keypt smá aðsetur út í London á tíu og hálfa punds-millur , ég segi bara og hvað með það ?. Þegar maður spyr svo hvort þetta séu ekki many monní þá er manni sagt að Siggi minn hefði bætt við tveimur og hálfri punds-millu til að vera alveg öruggur um að fá það. En þið illgjörnu eiturtungur gátuð ekki stillt ykkur um að segja að húsið hafi verið til sölu í mörg ár, en ekki selst. Ætli maður heyri ekki næst að Siggi minn hafi borgað of mikið fyrir kofann ? En það fylgir bílastæði sagði hann.

Ég ætlaði ekki að trúa mínum eigin eyrum þegar þú sagðir mér frá honum Dabba og því hvernig hann hafði hótunum við þig út af einhverju uppgjöri í evrum. Hvað á það að þýða eiginlega að blaðra um einhverjar niðurfellingar á ábyrgðum út af lánum til ykkar Heiðars. Þetta var svo sem ekkert, bara nokkir tugir milljarða, og hvað með það segi ég nú barasta. Og hvað á það að þýða að vera að nudda í þér út af  einhverjum sumarbústað sem þú ert að láta byggja fyrir þig ? Ekkert annað en öfund segi ég bara, og hana nú.

Ég verð að fara á klóið núna, skrifa þér kannski nokkrar línur við tækifæri.

Bestu kveðjur

Þín Magnea

 

Bréf-8                                                                             Flatey 25.júní 2009

Kæri Hannes S

Það er nú meira sem hamast er á þér. Hvað er þetta hyski eiginlega að meina. Þurfa þeir ekki að halda við húsunum sínum ? mér er spurn. Þeim væri nær að sýna þér vorkunn, að lenda í að kaupa ónýtt hús á 70 millur og þurfa svo að gera við það fyrir tæpar 350 millur. Þú hefur verið blekktur þegar þú keyptir þennan kofa. Þarft þú ekki að “súa” þessa fasteignasala ? Það er gert í Ameríku fyrir minni sakir. Hvað eru menn eiginlega að meina þegar verið er að nöldra út í millifærslur milli reikninga í FL eða hvað það nú hét og heitir? Mega menn ekki færa milli reikninga sem þeir eiga sjálfir án þess að spyrja um leyfi ? hvurslags er þetta eiginlega. Svo voru þetta bara smáaurar litlir þrír milljarðar.

Hvurn andskotann eru menn svo að meina með því að gramsa í skartgripakassa frúarinnar ? Voru þeir að leita að ónotuðum bíómiðum eða hvað ? Hverjum dettur eitt augnablik í hug að þú hafir gert eitthvað sem ekki er skothelt fyrir lögunum. Ekki er það lögbrot að kaupa ódýrt og selja svo með hagnaði, hvað þá að kaupa dýrt og selja með tapi. Þetta er tóm öfund og ekkert annað.

Svo er verið að öfundast út í þig fyrir að kærastan eigi nokkrar bíldruslur. Það er áræðanlegt að þetta eru bara verðlausar druslur. Ég bara skil þetta ekki. Svo er verið að blaðra um einhver fyrirtæki sem verið er að gera þessi bílakaup eitthvað vavó. Einátta ehf Tvíátta ehf eða hvað það nú heitir og svo einhver Úranus. Þvílíkt bull. Og hvað kemur svo fólki þetta við eiginlega ?

Það var nú ekki þér að kenna að American Airline bar sig ekki. Þeir höfðu bara ekki dug og þor til að gera eins og þú lagðir til. Það verður seint sagt um þig elsku Hannes minn að þú hafir ekki fært okkur hagsæld og mörgum já mörgum hagnað og gæfu. Ég held bara að það ætti að erfðabreyta þessu hyski sem er að nöldra út í þig. Og hana nú.

Ég á áræðanlega eftir að skrifa þér aftur, en hafðu það sem allra best.

Kveðja, Magnea

 

Bréf-9                                                                             Hrísey 25.júní 2009

Kæra Birna.

Mikið getur fólkið verið ómerkilegt. Það heldur því fram að þú vitir ekki aura þinna tal. Það blaðrar um einhverjar 180 millur sem það segir að þú hafir ekki tekið eftir að voru í sparibauknum þínum.

Svo er verið að segja að fjármála eitthvað eftirlit hafi kíkt í sparibaukinn þinn og ekki séð neitt nema miða sem á stóð eitthvað bull um að kaupa hlutabréf við tækifæri.

Sniðugt að kalla sparibaukinn Melkorku, ég þarf að segja barnabörunum þetta þau gætu kallað sína sparibauka einhverjum svona nöfnum, tildæmis Búkollu, Grýlu, Sollu og jafnvel Birnu.

Birna mín vonandi er Bensinn í standi, er hann ekki flottur ?.

Mér finnst hann samt ekki nógu verðmætur fyrir minn smekk, mætti kosta meira.

Flott flétta hjá þér þetta með bankastjórastöðuna, bara orðin stjóri eftir allt saman.

Það eiga áræðanlega margir eftir að öfundast út í þig.

Jæja Birna mín. Hafðu það sem allra best.

Kveðja.

Magnea.

 

Bréf-10                                                                           Grímsey 26.júní 2009

Kæri Kristinn

Þú færð það nú aldeilis óþvegið í Hvítbókinni. Þú ert bara sagður í stjórnum ótal félaga og framkvæmdastjóri í mörgum þeirra. Svo er löng talning á félögum sem haft er fyrir satt að þú hafir verið í stjórn í, mörg komin á hausinn, en það er svo sem ekki tíundað, og heldur ekkert merkilegt.

Er þetta bara ekki dæmigert fyrir öfundsjúkan lýðinn ? Svo eru menn að fleipra með að þú og yndisleg frúin eigið þetta fína hús á Flórída, ég er viss um að þetta er bara sagt til að sverta ykkur hjónin. Það er einnig haft fyrir satt að þú hafir misst allt þitt. Þegar frændi minn missti allt sitt, átti hann hvergi heima eftir að sýsli bar hann úr og ritari sýsla ók burtu á bílnum hans, svo ég trúi ekki þessari draugasögu um þig að þú hafir misst allt þitt, né heldur að eitthvert olíu og bensín svindl sem þú ert sagður ábyrgur fyrir sé satt. Hvað þá að Solla mín hafi eitthvað notað Bjössa og Geira til að fá ríkisborgararétt fyrir gullfallega stúlku utan úr heimi. Nei segi ég það er svo mikið bullað um þig að fjórðipartur væri meira en nóg. Þú hittir sko naglann beint á hausinn, þegar þú sagðir að fólk væri fífl. Það sannaðist svo sannarlega í síðustu kosningum.

Ég bara vona að þið Solla hafið það sem allra best hvort heldur sem er á Íslandi eða í Ameríku. Þetta verður ekki lengra í bili, pósturinn var að koma, skrifa kannski seinna.

Kær kveðja

Magnea

 

Bréf-11                                                                          Flatey 26.júní 2009

Kæri Björn

Ég er nú hálf skúffuð yfir því að þín sé ekki minnst á HVÍTBÓK, er það vegna þess að þú fékkst ekkert fyrir þinn snúð ? Græddir þú virkilega ekkert á útrásinni ? Mér finnst nú að Dabbi og Kjartan hefðu átt að slaka einhverju nammi til þín, eins og þú varst búinn að gera fyrir þá. Ég veit ekki betur en þú hafir komið öllum ættingjum Dabba og vinum til starfa í dómarakerfinu. Helvíti sniðugt að hafa sína menn í dómstólunum þegar taka á í gegn þessa skúrka sem búnir eru að rústa öllu hér á landi. Ég hlakka til að sjá framaní Jón, Jóhannes, Hannes og Pálma og alla hina glæponanna þegar þínir menn taka þá í nefið hahahaha. En auðvitað verður ekki hreyft við okkar mönnum eins og Geira, Dabba, Gerðu og Kjartani svo einhverjir séu nefndir, en af nógu er að taka.

Manstu þegar ég lagði til að nota Höfðatorgsturninn til að geyma verstu skúrkana í. Þú veist nítjánhæða  turninn sem Eykt byggði fyrir eigið fé. Mér datt í hug manstu að setja þá í geymslu á sautjándu til nítjándu hæðirnar. Það þarf enga rimla fyrir gluggana. Ef einhver vill endilega flýja út um glugga þá er það í fínu lagi leiðin liggur beint niður 17-19 hæðir, verði honum að góðu. Svo er bara að láta lyftuna ekki ganga lengra en á sextándu hæð. Eina breytingin er að það þarf að setja hlera í staðin fyrir lyftuhurðir og góða hurð fyrir innganginn á 17.hæðina, bara húnn að utanverðu. Útivistarsvæði á þakinu. Er þetta ekki tær snilld ? Þarf ekki að byggja nýtt fangelsi. Þú spurðir hvernig þeir ættu að fá mat. Alveg rétt það er til dæmis hægt að semja við Bæjarins bestu eða Landspítalaeldhúsið. Þeir bara gefa upp bankanúmerið á Tortúla og geta þá pantað hvað sem er, og meira að segja vín með.

Ef þeir vilja dunda sér við eitthvað, þá má láta þá hafa nokkur Mattador spil, en muna að taka helminginn af peningunum burt svo þeir fari ekki á flug í fjárfestingum.

Ég hef þetta ekki lengra Bjössi minn, leitt að þú hafðir ekki tíma til að stofna herinn, en svona er nú þessi pólitík.

Kær kveðja

Þín Magnea.

 

 

Flatey 28. júní 2009

Bréf-12

Kæru bræður.

Ekki eru tvær bárurnar stakar. Mikið á fólkið bágt sem um þessar mundir er að jagast út í ykkur bræðurna, út af einhverju EXISTA og Skipti og allskonar. Að kaupa Símann á sínum tíma fyrir smáaura, var algjör snilld. Nú eiga fyrrverandi hluthafar Símans ekkert nema einhverjar verðleysur í einhverju EXISTA. Fyrst skiptuð þið Símanum í þrennt og létuð nýtt fyrirtæki eiga þessa parta.  Þið kölluðuð það Skipti, sennilega hefði betra nafn verið Skiptimynt. Þá fengu allir sem keyptu hluti í Símanum hluti í Mílu, Jörfa og svo smá í Símanum. Þá er boðið uppá Skipti að allir sem áttu hluti í þessum þremur fyrirtækjum fengu hlut í Skipti. Svo kemur snilldin sem erfitt verður að toppa. EXISTA kaupir Skipti og þeir sem eiga nú útþynnta hluti sem einu sinni voru hlutir í Símanum fá í staðin hluti í EXISTA. Þá kemur algjöra snilldin. EXISTA er gert verðlaust 0.05 á hlut. Þar með eru hlutir þeirra sem einu sinni keyptu hluti í Símanum, sem þá voru einhvers virði orðnir verðlausir. Tær snilld.

Svo er verið að finna að því þótt þið elsku bræður séuð að láta byggja fyrir ykkur smá afdrep til að hvíla ykkur í við arineld og koníak. Þetta öfundarpakk er ekki í lagi hvað þá að það sé nokkru skárra en þið bræðurnir. Ég er alveg viss um að þetta pakk myndi gera nákvæmlega það sama og þið bræðurnir ef það hefði fengið fimmhundruðþúsundkall á dag fyrir að koma þessum fyrirækjum á kaldan klakann. Svo eru öfundarpésarnir að jagast eitthvað, og fleipra um þyrlur og einkaþotur. Ég segi bara við þetta fólk. Skammist ykkar að láta svona útí drengina frá Bakka eða Bakkavör eða hvað það nú heitir sem þeir eru frá.

Elsku bræður það verður mér að mæta ef þessi skríll heldur áfram að hrekkja ykkur.

Kær kveðja

Magnea

 

Bréf-13                                                                                       Flatey 26.júlí 2009

Kæru feðgar.

Enn og aftur eru nöldrararnir byrjaðir að skammast. Núna út í ykkur feðganna, sem megið ekki vamm ykkar vita. Þið sem með öðrum lögðuð beinu, breiðu og rennisléttu brautina sem nánast allir landsmenn brunuðu eftir. Það voruð þið elsku feðgar sem leiðbeindu okkur og sáuð til þess að við færum ekki útaf brautinni ykkar. Það voruð þið sem vöruðuð okkur við holóttu moldarvegunum sem efasemdirnar höfðu lagt þvert á ykkar beinu og breiðu braut. Þið bentuð okkur á allt rykið sem þyrlaðist upp á þessum hálf ófæru troðningum. Þið sögðuð að maður fengi bara hálsbólgu og kvef ef maður færi út á þessa moldarvegi. En ykkar breiði, rennislétti og malbikaði vegur væri eini rétti vegurinn til að ná til alsældar auðsins. Auðvitað höfðuð þið rétt fyrir ykkur eins og Hannes Hólmsteinn hefur marg- bent á og Davíð líka. Það var ekki ykkur að kenna hvernig fór. Það var ekki frelsinu að kenna hvernig fór. Það var ekkert að frjálshyggjunni ó nei.

Það voru auðvitað allt þeim að kenna sem lögðu moldarvegina og þyrluðu upp mold og skít. Maður tali nú ekki um þessa lúsera sem héldu að þeir gætu ekið brautina með ofsahraða og tekið bara framúr hverjum sem var. Svona kallar eins og strákarnir sem búið er að stinga inn fyrir skitnar fimmtíu millur. Það er ekki skiljanlegt fyrir venjulegt fólk að mönnum sé stungið inn fyrir svona smáaura án þess að sekt sé sönnuð, ég verð bara að segja það, ekkert má nú.

Hvað eru gæjar eins og Jonní Boy Hannibali og Steini Páls að blaðra um að einhverjir Ísleifs reikningar séu ykkur að kenna, hvað vita þeir svo sem um það, afdankaðir pólitíkusarnir ? Mér bara blöskrar þetta bull í þeim og fleirum. Þetta er bara nöldur og öfund í þessu fólki og ekkert annað.

Elsku Bjöggarnir mínir þetta verður ekki lengra í þetta skiptið, en hafið þið það sem allra best.

Magnea

 

Bréf-14                                                                                    Flatey 31.júlí 2009

Kæri Bjarni.

Það er ekki að því að spyrja, Nú segir enginn svei lengur, enda ert þú elsku vinurinn minn með hæstu skattgreiðendum á landinu. Eins og þú hefur sjálfur sagt ertu búinn að viðurkenna viss mistök, og gera ekki allir einhver mistök mér er bara spurn ?

Auðvitað veistu ekki af neinum skattaskjólum á einhverjum Tortúlum það er bara eitthvert bull í DV og svoleiðis sneplum. Auðvitað eru það bara dylgjur og ekkert annað þegar verið er að segja að þú hafir flutt peninga úr Glitni til Noregs fimm mínútum fyrir hrun. Hvað á svona að þýða ? Hverjum dettur í hug eiginlega að þú hafir fengið einhverjar inni-upplýsingar frá Birnu í bankanum ? ég bara segi ekki annað en þetta er bara slúður og öfund og ekkert annað.

Eins og við öll vitum varst þú eini bankastjórinn á landinu sem varst gegnheill og heiðarlegur, og engum skal detta í hug að þú hafir komið nálægt neinu sem setti landið á hausinn. Þetta Græn-energi það var eitthvað sem ekki varð, svo ekki má kenna þér um það. Helvítis íhaldið klikkaði illilega í því máli eins og alþjóð veit. Ég hef heyrt það Bjarni minn að þú hafir ávallt verið þeirrar skoðunar að eftirlit með fjármálafyrirtækjum þyrfti að efla. En það hlustaði enginn á þig frekar en hann Dabba okkar, því fór sem fór.

Jæja elsku Bármann minn ég hef þetta ekki lengra núna.

Þín

Magnea.

 

 

Bréf 15                                                                        Flatey 1.sept.2009

Kæri  Ólafur.

Þá eru rógberarnir að segja allskyns sögur af þér. Það hlakkar í hyenunum yfir leitinni sem stöðumælavörðurinn lét gera hjá þér. Fundu þeir svo nokkuð ég bara spyr ? Voru þeir bara að telja postulínið og kristalinn ? Þetta eru nú meiri fúskararnir. Þetta lið sem er sífellt að nöldra segir að þú hafir sett einhverja peninga í skjól. Auðvitað er það ekki nema sjálfsagt, ekki er neitt vit í að hafa þá ekki í húsi eins og veðrið er, ég segi ekki annað. Svo eru þessar eiturtungur að segja að þú hafir ekki borgað fyrir bankann sem þeir félagarnir Dabbi og Dóri gáfu ykkur Sigga og Finni. Svei þessum eiturpöddum.

Og hvað heldurðu að þeir segi ? Að einhverjar mæðrakerlingar hafi unnið þig í máli um einhvern  jarðarpart eða eitthvað svoleiðis, þvílíkur kjaftháttur ég segi bara. Svo eru þessar pöddur að segja að þú sért í einhverjum tengslum við einhvern sjeik. Ekki veit ég hvað þessar pöddur eru að segja ekki þekki ég neinn sjeik nema þá milksjeik með jarðaberjabragði. Svo ég segi aftur frá mæðrakerlingunum, þær voru víst eitthvað að kvarta undan hávaða frá þyrlunni þinni. Þvílíkt og annað  eins. Hvernig átt þú að getað komist á jörðina þína nema á þyrlu, mér er spurn ? Þær tala ekki um hávaðann frá traktornum sem þær flengjast um öll tún á með einhver  tól í afturdragi, það heyrist nú í þeim líka, áræðanlega ekki svefnfriður fyrir þeim.

259 félög segja rógberarnir að séu skráð í húsinu þínu við Suðurlandsbrautina. Svo eru sendir einhverjir útvarpsreikningar á þau öll. Þvílíkur dónaskapur, senda reikninga fyrir útvarp og sjónvarp á þessi fyrirtæki, sem eru bara skúffur í gömlu skrifborði. Hvað halda menn eiginlega ? Halda þeir að það komist sjónvarp í skúffurnar eða hvað ? Hvernig halda þessir menn að hægt sé að hlusta og horfa á 259 útvörp og sjónvörp öll ofan í skúffum ?  og það í lítilli skrifstofukompu.  Þetta lið er bara ekki í lagi. Nýjasta sem ég heyrði frá þessu hyski er að þú og elsku drengurinn hann Hreiðar Már hafi verið yfirheyrður af útsendurum stöðumælavarðarins, og meira að segja að þið séuð ef til vill grunaðir um að hafa gert eitthvað ólöglegt, þvílík fyrra segi ég bara. Það vantar bara að slett sé rauðri málningu á húsið þitt, eða er það kannski búið ? Jæja elsku Ólafur minn þetta verður ekki lengra hjá mér í bili, bestu kveðjur frá mér og mínum. Ps. Gæsalappi biður líka að heilsa.

Þín Magnea.

 

 

Bréf 16                                                                                       Flatey 2.sept.2009

Kæri Lárus.

Mikið varð ég hissa þegar svokallaðir blaðamenn sem kunna greinilega ekki mannasiði byrjuðu að skrifa um þig allskonar sögur. Ein er sú að þú hafir fengið 60 millur að láni hjá vinum þínum í Landsbankanum og það meira að segja  vaxtalaust. Svo er ein sagan sú að þú hafir fengið afsal fyrir Reinsanum eftir hrunið skuldlausum meira að segja. Þetta er örugglega ekkert annað en öfund og kvikindisskapur öfundarmanna.  Hvað með það þótt 120 millur séu afskrifaðar?  þú áttir það áræðanlega skilið. Hvað er fólk svo að pæla þótt þú tækir alla peningana þína út úr bankanum fyrir hrun og kæmir þeim í skjól þar sem veðrið er heldur skárra en á Íslandi. Hvort frúin eða þú sjálfur hafi gert þetta, er bara tæknileg útfærsla og kemur engum við. Bara 320 millur bara smáaurar. Hvað með Tortúlurnar allar ?

Það var flott hjá þér að veita bónusa til þeirra sem gátu með harðfylgi og þrautseigju þröngvað lánum upp á fallit fyrirtæki. Svo eru menn að hneigslast, þvílíkt og annað eins.  Ég kalla það að spjara sig að fá hálfa millu í bónus fyrir að landa einu láni, sem maður þarf ekki að hafa neinar áhyggjur af hvort verði borgað eða ekki, tær snilld ekki satt?

Svo eru eiturbrasararnir að segja að þú sért ekki lengur Wellingur heldur sonur Snorra, mér verður flökurt.

Þetta verður ekki lengra í bili Lalli minn.

Kveðja

Magnea.

 

 

Bréf 17                                                                                       Flatey 2.sept.2009

Kæri Karl.

Ég skil bara hvorki upp né niður í öllu sem sagt er um þig og þína fjölskyldu. Hvað er svo sem athugavert við að eiga 88 félög í skúffum, auðvitað borguðuð þið útvarps-og sjónvarpgjald af þeim öllum, hvað svo sem annað ? Svo er verið að finna að því við ykkur bræðurna að einhver óbótasjóður hafi verið tæmdur. Auðvitað á að nota peninga ef þeir eru til, annars liggja þeir bara dauðir engum til gagns.

Eins og Hannes segir það á að láta peningana grilla fyrir sig á daginn. Svo eigum við að detta í það á kvöldin, allir nema Davíð saklausi.  Svo er mér sagt að stöðumælavörðurinn sé að íhuga að skoða heilstætt og á breiðum grundvelli hvort hann eigi ef til vill að láta einhverja spyrja ykkur bræðurna hvað hefði orðið af öllum peningunum sem hurfu úr tryggingasjóðnum. Þvílík frekja ég segi bara ekki annað. Það er bara eins og öfundarpakkið sem þykist ekki eiga fyrir skólabókum haldi að það megi svívirða ykkur endalaust fyrir eitthvað sem kom fyrir ykkur og okkur, öllum að óvörum. Mér finnst alveg sjálfsagt af þér að stefna rógberunum fyrir rétt.  Bara súa alla þessa rógbera.

Hvað á það eiginlega að þýða að nöldra yfir því þótt þið greidduð ykkur smáaura í arð, það voru jú bara 20 mega krónur, eða voru það 20 gígakrónur, sama er mér þetta er bara öfund og ekkert annað. Er það ekki kallað að peningarnir grilli fyrir ykkur?

Hvað varðar fyrirtækin mín þá eru bæði Mílusteinn og Askur í góðum málum, allt annað sem sagt er um þau er haugalygi og ekkert annað. Það er því algjör óþarfi og dónaskapur að skvetta rauðri málningu á húsið sem konan mín á, nær að hafa hana bláa fyrst verið er að þessu á annað borð. Hvað með það þótt ég eigi einhverja sumarbústaði á Flórída sem illar tungur kalla Flórinn, menn mega jú eiga sumarbústað eða hvað ?

Jæja Kalli minn ég þarf að skreppa á klóið svo ég segi amen í bili.

Bestu kveðjur til ykkar bræðranna.

Magnea

 

 

Bréf 18                                                                                       Flatey 2.sept. 2009

Kæri  Hreiðar.

Allt er þetta lið eins. Nú er ráðist á þig elsku Hreiðar minn fyrir eitthvað sem ljótir kallar út í heimi gerðu. Þessir ljótu kallar slitu bara allar lánalínur, það er ekki hægt að kenna þér um það. Ég sé ekki að þessu pakki komi neitt við hvar þú býrð með þinni konu, hvort það er Hlyngerði eða Hveragerði, hverjum kemur það við ? ég bara segi ekki annað. Þótt þið hjónin eigið 5 eða 6 millu bíl, hvað með það ? Hverjum kemur við þótt þú hafir slegið Kaupþing um nokkra milljarða til að kaupa í Kaupþingi ég bara spyr ? Og hvað á það að þýða að nöldra yfir því,  þótt elskuleg frúin lýsi því yfir í lokuðum saumaklúbbi, að það sé ekkert vit í því að ferðast til útlanda nema í einkaþotu, sérstaklega ef börn eru með.  Svo eru þessir menn sem hafa horn í síðu allra sem þorðu að stjórna bönkunum  okkur öllum til heilla að draga fram allskonar sögur. Þótt þú hafir fengið 450 millur fyrir að stýra bankanum á skerið, þá er alveg óþarfi að vera að finna að því.  Þú ert búinn að biðja skúringarkonuna afsökunar á því hvað þú skrúfaðir út ú bankanum í laun, mér finnst það alveg nóg,  og engin ástæða fyrir þig að biðja fleiri afsökunar, enda ert þú enginn glæpon.

Þú ert  konungur skattakonunganna og er ég hreykin af þér fyrir það. En að skvetta málningu á húsið þitt finnst mér alveg ga-ga, ég tala nú ekki um það, og það rauðri, betur að hún hefði verið blá og verið örlítið jafnari á veggnum. Þetta var algjört fúsk eins og sást á myndinni i Mogganum, sveiattan bara.

Elsku Hreiðar minn hafðu það sem allrabest í Lux.

Kær kveðja.

Þín Magnea.

 

 

Bréf 19                                                                                    Flatey 3.sept.2009

Kæri Illugi.

Það er ekki að spyrja að pupulnum, þeir vilja kalla þig illhuga, mér blöskrar bara, og út af hverju ég bara spyr ? Sjóður níu eða tíu hvað með það ? Þarf endilega að velta sér upp úr þessum sjóðum ? Nokkrir milljarðar til eða frá, hvaða máli skipta þeir ? Ekki ætla þessir plebbar að borga þetta hvort sem er. Það er bara ekkert við því að segja þótt einhverjir tapi, bara ef þú tapar ekki líka. Auðvitað kemur ríkið til hjálpar, þú ert nú einu sinni á þingi. Til þess eru þingmenn að hjálpa hverjir öðrum. Elsku Illi minn ég trúi bara engu misjöfnu sem sagt er um þig og hananú.

Mér finnst þú eigir að halda áfram að skamma Steingrím og Jóhönnu fyrir bankahrunið sem þú og vinir þínir hjálpuðuð til með. Það er ekki einleikið hvernig þau skötuhjúin ætla að fara með okkur almúgann. Bara setja drápsklyfjar á okkur og börnin okkar og jafnvel barnabörnin þin líka, sveiattan. Auðvitað er ekkert af þessu ykkur „gæsalappa“ að kenna ykkur var sagt að allt væri í stakasta lagi, bæði af Jónsa í Bónus og Lalla í bankanum. Hvernig áttir þú elsku drengurinn minn að vita annað ? Nei mér finnst komin tími til að Óli bóndi á Bessó láti setja fjölmiðlalög sem banna skammir út í þig, gæsalappa og ykkar flokksfélaga. Það mætti svo vera með staðlaðar skammir út í Steingrím og Jóhönnu sem Mogginn birti daglega, ég tala nú ekki um ef Palli á ruv læsi þær í kvöldfréttatímum svona einu sinni eða tvisvar í hverjum fréttatíma. Svo finnst mér líka að pupullinn eigi að haga sér og hætta að skammast út í ykkur, þeim væri nær að borga, þetta pakk ég segi það bara.

Illi minn ég skrifa þér meira við tækifæri, mér sýnist Jónas í eftirlitinu vera að koma upp tröppurnar hjá mér.

Bestu kveðjur

Magnea

 

Bréf 20                                                                          Viðey 3.sept.2009

Kæri Halldór.

Ekki vantar öfundina í þinn garð. Það er ótrúlegt hvað fólk getur bullað um ykkur bankadrengina. Þér rataðist aldeilis rétt orð, þegar þú sagðir að hver væri sinnar gæfusmiður, og bara gott á óráðsíufólkið sem tók alltof mikil lán. Auðvitað verður þetta fólk sem  kunni sér ekki  hóf að standa skil á skuldum sínum.  Rétt eins og Landsbankinn og hinir bankarnir. Það gengur ekki að hlaupa frá öllu saman það á og verður að borga.

Hugsið ykkur dónaskapinn, einhver flækingur sem vara að baða sig í einhverri mannlausri sundlaug fyrir vestan fann að því við þig drengurinn minn að þú borgaðir ekki fyrir þig og strákinn ofan í laugina, ég bara spyr djö….. kom honum það við þessum flækingi ?

Það var gott hjá ykkur Sigurjóni að senda bréfið til Hollands. Fjármálaeftirlitið hefur sennilega misskilið það, því þeir halda því fram að þið hafið lofað að börn og barnabörnin okkar muni borga ef illa færi. Menn halda að sé bara hægt að spyrja út í þetta, ég segi bara, hvernig dettur mönnum annað eins til hugar?  Auðvitað er bankaleynd yfir þessu öllu, hvað annað. Svo eru öfundarmenn að gaspra með það að þið drengirnir stundið fjármálaráðgjöf inn við sundin blá, áræðanlega tóm lygi.

Svo er verið að segja að þú hafir lánað Óla fyrir kaupum á Búnaðarbankanum og fengið lán fyrir Bjögga og co. Hjá Búnaðarbankanum til að kaupa Landsbankann. Þetta kalla ég nú bara tæra snilld. Skil ekki hvað veldur þessari öfund út í þig, ég verð að segja það.

Þessar illu tungur eru að býsnast yfir því að þið hjónin eigið skuldlausa bíla. Auðvitað eigið þið þá skuldlausa þið kunnið á hlutina og eruð miklir gæfusmiðir.

Eins og þú hefur margsagt er þetta bankahrun ekki þér að kenna. Það eru einhverjir ljótir kallar í útlöndum sem á að kenna um það. Þú byggðir upp stórt og öflugt peninga-eitthvað og komst á hálaunastefnu sem margir nutu góðs af. En pakkið sem núna keppist um að rægja ykkur, segja að þjóðin eigi eftir að greiða þessa hálaunastefnu til Hollands og Englands þvílíkt hyski þetta pakk ég segi bara það.

Jæja Dóri minn dyrabjallan kallar svo þetta verður að duga í bili.

Bið kærlega að heilsa ykkur skuldlausu hjón.

Magnea.

 

 

Bréf 21                                                                                    Flatey 3.sept.2009

Kæra Valgerður.

Óþverra fólk er að segja að þú hafir ásamt Dóra og Dabba gefið bankana tvo. Bölvuð vitleysa er þetta hjá þessu öfundarpakki. Auðvitað borguðu þeir Björgólfarnir Landsbankann. Ég veit ekki annað en Bjöggi hafi tekið helling af moný upp úr brjóstvasanum og lét svo vin sinn slá nokkra aura í Búnaðarbankanum til að fullkomna kaupin. Allt annað er bara illkvittin lygi og ekkert annað. Þú hefur örugglega ekki staðið fyrir því að selja Óla og Finni Búnaðarbankann fyrir slikk, hvað þá að þú hafir vitað að þeir slógu Landsbankann um lítilræði til að þú fengir moný í ríkissjóðinn. Hvað þá að þú hafir gleymt að láta skrúfa frá heitavatninu á vellinum. Bölvaður kommúnista áróður og eitur tungur. Þetta frost á vellinum kostaði bara nokkrar millur eða tugi milla, segja þessar illu tungur. Vonandi gengur búskapurinn hjá þér fyrir norðan betur en ríkisbúskapurinn hans Grímsa. Það kæmi mér ekki á óvart að þér elsku Vala mín yrðir fyrir aðkasti þessara skúrka, ef til vill sletta þeir málningu á rollurnar þínar, hver veit. Vona að þeir beri gæfu til að hafa hana græna, rautt passar einhvernvegin ekki í sveitinni.

Elsku Vala mín hafðu það sem allra best.

Þín vinkona Magnea.

 

 

Bréf 22                                                                                    Flatey 4.sept.2009

Kæri Matthíssen.

Mikið er ég feginn að þú skulir vera laus við peningaáhyggjurnar sem þú barst með stakri prýði fyrir okkur öll. En það er ekki að spyrja að öfundarpakkinu, þú varst þegar kominn milli tannanna á því þegar þú söðlaðir um og fórst í beljulækningar. Þetta skítapakk hefur það í flimtingum að þar sért þú betri en við peningapössun. Elsku drengurinn minn, ég bara bið þig að taka ekki mark á þessum rógi. Þetta er bara öfund og illkvitni hjá þessu fólki, gott ef þetta eru bara ekki kommúnistar eða eitthvað verra.

Svo eru þessir pennar að segja að þú skiljir ekki rússnesku, að þú hafir ekki skilið að Rússarnir ætluðu bara að fjárfesta í íslenska ríkinu en ekki lána þér. Þú hefðir átt að fá einhvern til að þýða fyrir þig það sem hann sagði þessi Dimitri Pönkin. Dabbi skildi hann sko alveg. Enda sagði hann ég sagði ykkur þetta strax, ég man það svo vel.

Svo er þetta pakk eitthvað að kenna þér um að Dabbi hafi tvöfaldað lánin til einkavinavæddu bankana, þvílíkur áróður. Ég trúi því bara ekki að þið Dabbi hafi gert nokkuð svo vitlaust. Þetta hafa ábyggilega verið hagfræðingarnir í Svartakastala sem stóðu fyrir því að lána svona mikið. Hvorki dýralæknir né lögfræðingur kunna að gera svona lagað.

Þessi pennavinur þinn, þessi Darling, kann hann ekki íslensku eða hvað ? Maðurinn segist hafa skilið þig, en það er deginum ljósara að hann hefur ekki skilið nokkurn skapaðan hlut. Lét setja á þig hryðjulög hvað þá meira. Voruð þið bara ekki í tölvuleiknum „vorkraft fyrir toopleiers“ ?

Ég hef svo sem ekkert vit á þessum tölvuleikjum.

Svo eru þessir kallar að segja að þið Dabbi og Jónas í eftirlitinu hefðuð getað stoppað útrásagæjana og komið í veg fyrir hrunið. Þetta er bara ekki svona einfalt, það held ég allavega. Þú sagðir að þú hefðir ekki réttu verkfærin til þess og  Dabbi sagði ég er bara alveg máttlaus gagnvert Baugi og co, og Jónas í eftirlitinu sagði, ég kann bara engin ráð. Svo er þetta pakka að rífa kjaft og skammast út í þig og alla hina íhaldsdrengina, svei bara segi ég.

Ég veit betur. Þegar þú varst lítið kríli og kúkaðir í þig sagðirðu ég gerði þetta ekki, það var kisi sem kúkaði í buxurnar mínar. Þetta segir mér bara að það eru aðrir sem kúkuðu í buxurnar þínar og settu þjóðina á hausinn. Var það bara ekki þessi Darling og Lárus vellingur sem gerðu það ?

Elsku drengurinn ég verð að hætta núna, en það er svo margt fallegt sem mig langar að skrifa um þig, en það verður að bíða um sinn.

Bestu kveðjur

Magnea

 

Bréf 23                                                                                    Flatey 4.sept.2009

Kæri Kjartan

Þá eru eiturtungurnar byrjaðar að hjakkast á þér. Þeir gaspra út í loftið um að þú hafir ekkert vitað að bankinn þinn sem þú varst stjórnarformaður í hafi styrkt Fláráðs Grúpp um einhverja aura. Hvað eru svo sem 20 millur í dag . Úps var þetta öfugt styrkti Fláráðs Grúpp kannski bankann eða var það Sjálfstæðisflokkurinn sem fékk styrkinn ?

Svo er þetta pakk eitthvað að fleipra um að þú skuldir bankanum eitthvað, þvílíkt og annað eins.

Þetta hyski ætlar bara aldrei að hætta þessu slúðri. Djö…. fannst mér það gott þegar þú tókst Gerðu í nefið fyrir aulaskapinn á fundinum, þar sem Gerða skilaði auðu, bara blankó í evrópuþvælunni. Meira að segja skildi gæsalappi hvað stelpan var að meina. Ég er líka viss um að þú fattaðir málið, en prinsipp er prinsipp það eiga þau nú að vita.

Maður tali nú ekki um snilldina að selja borginni þúfurnar í holtinu þegar enginn vildi kaupa lóðir.

Hvað á Grímur með að krefjast þess að þú biðjist afsökunar á bankahruninu, er hann með einhverja beiðnablokk eða hvað. Heldur hann bara að hann geti gasprað út í loftið um afsakanir ? Engu líkara en hann búi í glerhúsi maðurinn sá.

Hvaða rugl er eiginlega í fólkinu, að þú vitir ekki hvort innistæður íssleifs reikninganna séu ríkistryggðar.

Veit þetta pakk ekki að þú ert lögfræðingur eða hvað ? Auðvitað veistu að þeir eru ekkert ríkistryggðir, þú ert jú búinn að segja það ekki bara einu sinni heldur tvisvar. Það voru helv… bretarnir sem settu allt á annan endann í bankanum þínum með því að setja hryðjulög á ykkur í Bretlandi, það veist þú manna best Kjarri minn.

Þetta með blankheitin, þú getur alltaf reddað smáaur með því að selja kofann sem þú keyptir af þjófinum úr Súpergaggó. Hann bara fer í tjald í Laugardalnum, ekki að hafa áhyggjur af honum. Jónsi bæjó gæti líka skotið yfir hann skjólshúsi ef  honum verður kalt greyinu.

Þú átt áræðanlega eftir að fá fleiri línur frá mér elsku Kjartan minn

Bestu kveðjur.

Magnea.

 

 

Bréf 24                                                                                       Flatey 4.sept.2009

Kæri Jónas

Nú þykjast allir hafa vitað hvernig færi fyrir bönkunum okkar. En þeir vissu bara ekki að þú og Dabbi unnuð sólahringum saman við að afstýra þessu hruni sem þó varð. Hvernig hefði þetta orðið ef ykkar hefði ekki notið við ? Ég segi bara þá væri ekki föngulegt ástandið hér á landi  núna.

Ég er viss um að útlendingarnir sem hlógu sig hálf máttlausa yfir því hvernig þið Dabbi létuð, hafa bara ekki skilið íslensku.

Ég heyrði tvo menn vera að tala um ykkur Dabba, þeir sögðu að á einhverjum fundi í Nýu York . Annar sagði að þú hefðir lýst fyrir fundarmönnum hvernig þú og Dabbi væruð á ná tökum á ástandinu. Menn litu hver á annan og svo brast á allsherjar hlátur. Hinn sagði frá fundi í alþjóðabankanum eða einhverju svoleiðis hafi Dabbi miklað fyrir fundarmönnum stórkostlegan árangur íslenskra athafna og fjármálamanna.

Sama þar,  menn litu hver á annan og svo brast á hlátur sem aldrei ætlaði að enda. Svona getur öfundarpakkið látið frá sér fara á skítugum ölstofum. Að halda því fram að þú Jónas minn sem ert talinn til eins af prinsum Sjálfstæðisflokksins ásamt gæsalappa, hafir ekki gert allt sem í þínu og eftirlitsins valdi var til að stöðva flokkfélaga þína í bönkunum, er bara kommúnistaáróður og ekkert annað. Svo eru þessar bjórfyllibyttur að halda því fram að þínir menn í eftirlitinu hafi ekki tollað í stólunum fyrir tilboðum um betri tíð frá bönkunum. Þvílíkt bull og þvílík vitleysa, mér verður flökurt.

Ég veit ekki betur en það hafi verið stöðugur straumur í eftirlitið með blómakörfur og koníaksflöskur allan desembermánuð, og maður tali nú ekki um allt nammið sem borið var í símadömurnar. Ég verð bara að segja það Jónas minn, það var fruntaskapur að henda þér út úr eftirlitinu eins og þú varst búinn að fórna þér fyrir okkur lands- og sjálfstæðismenn. Jafnvel Dóri evru-verkfræðingur er hneykslaður og þá er nú mikið sagt.

Elsku Jónas minn, vonandi eru atvinnuleysisbæturnar þolanlega háar. Ef illa gengur að láta enda ná saman veit ég af presti í Grafarvoginum sem hleypur undir bagga með þeim sem minna mega sín.

Þín elskulega Magnea kveður að sinni.

 

 

Bréf 25                                                                                    Flatey 4.sept.2009

Kæri  Finnur

Bara orðinn aðal maðurinn í Kbank.

Manstu þegar þú sendir Geir og Sollu til að snúa ofanaf vitleysunni í útlensku spekingunum, sem sögðu ljótt um íslenska bankakerfið ? Það var víst rigningardaginn í júlí í fyrra. Mér finnst stórkostlegt hvað þú brást af mikilli skynsemi við þessum áróðri í útlendingunum. Betur ef fleiri hefðu farið að þínu fordæmi. Rosalega var það líka flott þegar þú hótaðir helv… blaðasnápunum að súa þá ef þeir hættu ekki að blaðra upp úr ólánsbókunum hjá þér.

Svo eru eiturtungurnar eitthvað að þvæla um eitthvert kúlulán eða kúkalán sem þú átt að hafa fengið fyrir eitthvert félag sem þú áttir en ert víst löngu búinn að selja. Þetta voru ekki nema 850 millur, það þykir ekki mikið nú til dags, þegar engum heiðvirðum manni dettur í hug að nefna minna en milljarð þegar um peninga er að ræða, skil bara ekki í þessum plebbum. Svo eru þessir eiturpennar að segja að þú hafir ekki borgað vextina heldur látið þá fylgja með félaginu sem þú seldir. Ég segi bara það eru ekki allir jafn rausnarlegir að láta fylgja með alveg ókeypis vexti uppá 17 millur, segi ég og ekki annað en það.

Svo eru menn að þvæla um einhverjar bíldruslur sem bankinn átti þegar þú komst til að redda honum.  Drusluflota á stærð við meðal bílaleigu. Auðvitað léstu þá fjúka til hagsbóta fyrir þá sem keyptu druslurnar. Svo eru illar tungur að fleipra með að bankinn hafi tapað 300 millum á þessu. Ég segi bara þá hefur einhver grætt 300 millur á þessu. Er það ekki bara gott ? Það er slík öfund í gangi gagnvert þér að maður bara skilur ekkert.

Auðvitað eiga allir að borga sínar skuldir. En það má alltaf skoða einstöku skuldara alveg eins og þú bendir á. Það er alveg óþarfi að rukka alla í botn, eitthvað má nú afskrifa, til þess eru jú afskriftir. Helv… pakkið sem er sífellt nöldrandi á ekki skilið neinar afskriftir, láttu það hafa það segi ég og sigaðu á það löggunni og lögfræðingum og lögtæknum þau eiga ekkert gott skilið.

Þú elsku drengurinn minn sérð áræðanlega hvernig hægt er að leysa þessi leiðindamál sem þið félagarnir véluðuð þjóðina í, ég er handviss um það.

Þessir illpennar sem vaða uppi í Baugs- og Dabbamiðlum eru óþolandi, það á bara að loka þessum sneplum og flengja pennana, allavega að taka af þeim blek og prentsvertu. Svo á að koma ruv-inu í hendurnar á einhverjum sem ekki eru sífellt að grafa í ykkar persónulegu málum. Mikið að þeir séu ekki undir sængurhorninu hjá ykkur hjónunum að njósna. Ekki einu sinni friður fyrir þessum illpennum á nóttunni hvað þá meir.

Jæja elsku drengurinn minn. Með þessu bréfi vildi ég sýna þér stuðning í þínum góðu verkum, ekki veitir af. Ef þú hitti hana Biddu sem veit ekki hvort hún á 180 millur eða ekki, þá skilaðu kveðju frá mér.

Þín Magnea

 

 

Bréf 26                                                                                    Flatey 5.sept.2009

Kæri Magnús

Ég verð að skrifa þetta og setja í blaðið þar sem ég veit ekki hvort ég sé með rétt heimilisfang hjá þér í Pétursborg. Var það ekki BOMBOM-bruggstræti eða er það Bravóstræti, þú sendir mér línu við hentugleika. Mikið hefur verið sagt um þig undanfarið og ég verð að segja það ekki er allt jafn fallegt.

Þessir blaðasnápar sem finna hjá sér þörf til að svívirða samborgaranna ættu að skammast sín og skammast frekar út í þjófa og nauðgara, en láta heiðursmenn eins og þig og Samson í friði. Það er með ólíkindum hvað þeir hafa diktað upp um þig. Ekki trúi ég því eitt augnablik að þú sért kominn á hausinn, það eru bara  illar tungur sem hafa komið þessum sögum af stað.

Svo er skatturinn líka að bögga þig. Segir að þú skuldir einhvern skattpening, ég veit ekki meir. Þú sagðir að þú skuldaðir ekkert og ég trúi því. Svo eru menn eitthvað að blaðra um Jónfrúeyju einhverstaðar í útlöndum. Að þú eigir eitthvert fyrirtæki þar Mirol eða Mirroll og hvað með það ?

Ég veit ekki betur en þú hafir flutt það til Lux. Lux er með margsköttunarsamninga við allt mögulegt svo skattinum kemur þetta bara ekkert við. Svo segja illpennarnir að þú hafir flutt helling af pening í eitthvert skjól. Ég segi bara og hvað með það. Kemur það bara einhverjum við ? Ekkert vit í að láta verðmætin veðrast.

Ekki var það þér að kenna að þúsundir ferðamanna urðu vegalausir í útlöndum. Þeir héldu að það væri flott fyrirtæki þetta EXCEL, en ég veit alveg að þetta er bara eitthvert forrit frá míkrosoft, og menn verða sko að kunna á það til að verða ekki strandaglópar.

Avíagrúpp var nú aldeilis grúppa í lagi  flaug með fólk og frakt og alles um allan heim. Öfundarpjakkarnir eru eitthvað að segja að þetta hafi verið vonlaust frá byrjun. Ég segi bara þetta var sko ekki minni snilld en Eimskip á sínum tíma. Óskabarnið endurborið hvorki meira né minna. Það var aldeilis fengur fyrir þig að fá Halldór frammara til að klippa með þér á Travel Cittý borðann í Gattvík  og pæjan sem er á myndinni með ykkur er ekki nein smápía maður, þótt hún hafi verið með vettlinga.

Flott hvernig þú gekkst frá Eimskip, bara labbaðir út og lést Samson fá hræið flott flott maður.

Svo eru eiturpennarnir að bulla eitthvað um að einhver Straumur sé að rukka þig. Ég segi bara og ræð þér heilt. Þetta eru engir burðarásar eins og þeir segjast vera þetta eru bara smáfiskar að reyna að synda móti straumi, Ég segi, elsku drengurinn minn neitaðu bara að borga og segðu þessum straumum að éta það sem úti frýs. Ég veit þeir eiga eftir að súa þig en láttu sem þú vitir ekkert, enda þarftu þess ekki þar sem þú ert ekki lengur Íslendingur heldur Rússi. Gjaldþrot og ekki gjaldþrot hvernig er hægt að gera þig gjaldþrota? Ég bara spyr þú sem ert ekki lengur Íslendingur, bölvað bull í þessu pakki, ég segi ekki annað.

Mangi minn ég verð að hætta núna, en skrifa þér aftur þegar þú ert búinn að senda mér adressuna þína í Pétursborg eða var það Vladivastokk ?

Allra bestu kveðjur frá mér og íslensku þjóðinni.

Þín Magnea

 

 

Bréf 27                                                                                    Drangey 5.sept.2009

Kæri Hannes

Mikið var gaman að sjá þig um daginn niður við alþingishúsið, þú veist þar sem þínir menn voru að skamma Grím fyrir að hafa sett þjóðina á hausinn. Mér fannst alveg mátulegt á þessa vinstri bleiku og grænu að fá lesturinn, ég segi bara þótt fyrr hefði verið. Hvað á svo sem að þýða að leggja meiri skatta á okkur og ekki nóg með það, þessir kommar ætla líka að draga saman í þjónustu fyrir okkur.

Hvernig ferð þú nú að Hannes minn sem alltaf hefur verið á framfæri ríkisins ? Mér er bara spurn. Grímur er viss með að taka af þér hádegisrauðvínið. Honum og Jóku væri trúandi til að setja fyrir þig þurrt rúgbrauð og blávatn í hádeginu. Þú Hannes minn sem fannst upp peninga hamingjuna og allt frelsið. Maður mátti bara ekkert fyrr en þú komst peningafrelsinu á.

Ég og fleiri höfum velst um í vellystingum undanfarin ár, svo er pupullinn að segja að hann hafi bara ekki fengið neitt. Þvottakerlingarnar væla út í eitt og fiskkerlingarnar æmta og skræmta og segjast hafa verið blankar frá fæðingu. Ég skil þetta bara ekki. Þú sem fannst upp góðærið eins og vinur þinn Dabbi saklausi sagði.

Þetta er með ólíkindum hvað þessi svokallaða ríkisstjórn er óforskömmuð.

Svo eru eiturpennarnir búnir að grafa það upp til að svívirða þig alveg sérstaklega að þú sért dæmdur þjófur. Og ekki nóg með það þeir skrifa líka að þú sért dæmdur í útlöndum fyrir að svívirða mann, og það meira að segja landa þinn sem skrapp úr landi til að gera bissness.

En þetta er bara smá misskilningur er ég viss um, enda sagði stelpan í Súpergaggó sem hefur þig á launaskrá. Ég veit ekki hvernig hann er ráðinn, hvort hann er æviráðin eða ekki. Þessi stelpa segja mér kunnugir ætlar að gera þennan skóla að einum af 100.000-dustu bestu súpergaggóum í sólkerfinu.

Ég veit ekki betur en það væri þú elsku drengurinn sem fannst það út að fiskurinn í hafinu væri verðlaus þangað til búið væri að koma honum óveiddum í einkaeign. Illpennarnir og öfundaraularnir segja að Dóri frammari og valdir íhaldskallar hefi fengið fiskinn ókeypis á silfurfati. Það var alveg rétt hjá þér eins og allt sem þú hefur sagt. Þessir frammarar og íhaldsuppar hafa stórgrætt á þessu, svo mikið að þeir skulda orðið 500 milljarða.

Það varst þú og enginn annar sem sagðir Dóra og Dabba saklausa að peningar í bönkum lægju dauðir og engum til gagns meðan ríkið ætti bankana. Þess vegna lá það í augum uppi að það ætti að einkavinavæða bankana til að blása lífi í aurana.

Ég vorkenni ekki þessu pakki sem segist ekkert hafa fengið, segja meira að segja að Dabbi saklausi hafi kennt þeim um að hafa verið á fylleríi. Þetta skítapakk segir það helv….. hart að fá bara timburmennina án þess að hafa fundið á sér eitt augnablik, og verða að auki að borga tappagjaldið fyrir fyllibytturnar.

Að græða á daginn og grilla á kvöldin þessi málsháttur  er algjör perla. Það á að fella þennan málshátt að skyldunámi í öllum leikskólum landsins og nýlendum okkar. Það væri Dönum fyrir bestu að kenna hann í sínum vöggustúum.

Það er ekki að spyrja að ill-og öfundarpennunum, þeir klæmast á þessu eins og öðru sem hefur komið frá þér. Svona er þeirra útgáfa. Við rukkum á daginn og bjóðum upp á kvöldin segja þessir illpennar, svei þeim og aftur svehei barasta..

Ég vona bara að þínir menn til dæmis gæsalappi og Gerða leikaradóttir taki fljótlega við, þá fáum við sko almennilega skattahækkun, og það verður engin óþarfa þjónusta veitt til timburmanna og þvottakerlinga.

Þá verður gaman að lifa, forstjórar lífeyrissjóðanna komast aftur í ríflega tvær millur á mánuði.

Elsku drengurinn hvað varð af ljósa frakkanum sem þú varst í við kiljuhornið hér um árið ? Hann var svo flottur alveg eins og Stasi notaði á sínum tíma þegar þeir voru að dulbúast.

Ætli ég láti þessu ekki lokið í bili Hannsi minn, skrifa þér meira síðar, ef ég get slegið fyrir blýanti.

Bið að heilsa öllum í Súpergaggó.

Þín einlæg Magnea

 

 

Bréf 28                                                                                       Köben 5.sept.2009

 

Elsku vinir mínir !

Ég bara skil ekkert í því að hafa ekki fengið nein viðbrögð frá vinum mínum, eins og ég hef lagt á mig við að verja þá fyrir eitur og óþverrapennum sem hafa svívirt þá á allskonar máta. Ég hef eytt mörgum nóttum í að finna staðreyndir og hrekja sögur um ykkur sem eru undan síðum óvildarmanna ykkar. Þeir hljóta bara að vera í útlöndum kannski á einhverjum Tortúlum eða einhverjum Lúxum eða þá á Jónfúum, það hlýtur bara að vera.

Ég hef bent þessum illpennum á staðreyndir sem virðast alveg hafa farið fram hjá þessu pakki. Ég krefst þess að þessir pennar biðji hvern og einn vin minn margfaldra afsakana og lofi að hætta þessum óþverra skrifum, og skrifa ekki oftar svona um þá.

Ég segi ykkur alveg satt. Þessir sómamenn sem mega ekki vamm sitt vita hafa ekkert gert sem ekki er eftir ströngustu lögum og reglum, allt annað er bara hauga lygi.

Ég veit fyrir víst að margir þessara manna eru slyppir og snauðir eftir þessi voðaveður á alþjóða peningamarkaðinum. Margir hafa þegar orðið gjaldþrota aðrir bíða nötrandi í forstofunni heima hjá sér drulluhræddir í hvert skipti sem dyrabjallan hringir um að það standi rukkari á tröppunum. Þetta er náttúrlega ekki forsvaranlegt. Allt út af skrifunum í ykkur. Maður bara trúir ekki að BLOGGIÐ skuli ekki vera lokað fyrir þessum svívirðilegu skrifum. Jafnvel bæði Baugstíðindi og Mogginn slefa yfir þessum viðbjóði. Þeir segja að það seljist ekkert nema það sé djúsí eins og þeir taka til orða.

Þetta slúður um að þessir sómamenn hefðu farið með peninga til útlanda er bara kommúnistaáróður af verstu gerð. Ég hef það beint frá kunnugum að þeir fóru ekki með meiri pening til útlanda en fyrir nokkrum bjórum og kannski einni pulsu, þeir sem fóru til Köben. Allt annað er eins og ég hef sagt bara bull. Eins og ég segi Hannes sagði það.

Elsku vinir mínir ég kem bráðum til landsins og veiti ykkur áfallahjálp og bíð uppá kaffi og snafs.

Ykkar ástkæra Magnea.

 

 

Bréf 29                                                                                    Flatey 5.sept.2009

Elsku Óli minn

Alveg gengur fram af mér hvernig látið er um þig. Þetta fólk sem þykist vita allt miklu betur en þú, linnir ekki látunum með dónaskap og svívirðilegum skrifum í alla miðla sem gefnir eru út á landinu. Gott ef þeir senda ekki þessi skrif líka til útlanda hvað þá meir.

Sjálfsagt er þetta birt í Tortúlanjús og Luxtíðindum og maður tali nú ekki um Jómfrúarnjús. Hugsaðu þér þú ert sagður margbrotinn hvað þá heldur meir. Svo eru menn að skrifa um að þú étir ekki hrossaket af því að spúsunni líki það ekki. Þvílíkur dónaskapur ég hef bara ekki heyrt annað eins. Jafnvel gæsalappi fékk ekki svona útreið á flokksþinginu, þótt Gerða hefði sagt að hann væri gamaldags dragbítur, og stæði eins og drumbur gegn framþróun flokksins. Hann vissi ekkert um ES og bullaði bara.

Svo eru tíuþúsund hálfvitar sem ekkert vita hvað þeir eru að gera búnir að skrifa nöfnin sín á einhverja snepla sem þeir vilja að þú lesir og svo áttu í þokkabót að neita að skrifa nafnið þitt á eitthvað bull frá alþingi. Ég segi nú bara er ekki komið nóg af vitleysu og svívirðingum í þinn garð elsku Óli minn.

Það var snjallt hjá þér að fara um landið þitt í dulargerfi til að snúa ofan af þeirri firru sem haldið hefur verið fram um að þú hafir lofað og prísað einhverja víkinga.

Það er ekki þér að kenna að þú varst látin hengja á einhverja Jóna, Bjögga og Hannesa og fleiri fálkann. Það vita allir að þú hafðir ekkert með það að gera hverja þú hengdir á þetta járnadrasl. Þetta er í höndum og á ábyrgð einhverra gamalla hálf sjónlausra, skilningslausra og útbrunninna embættismanna sem kalla sig orðunefnd eee. eða orðanefnd, man þetta aldrei.

Ég á eftir að lesa betur yfir hausamótunum á þessum illfyglum, þeir skulu sko fá gúmoren hjá mér ef þeir hætta ekki þessum leiðinda skrifum. Þessi þarna Stormur eða Skerstormur man aldrei hvort hann heitir er algjör eiturpenni og sóðaskrifari, ég hef bara aldrei vitað annað eins. Þú þarna Stormur skammastu þín bara.

Þín Magnea

 

 

Bréf 30                                                                                                Drangey 7.okt.2009

Kæri Finnur Ing.

Hvað getur þú gert að því þótt þú sért frammari  ? Og hvað kemur þessu pakki það við sem er sífellt nöldrandi yfir öllu mögulegu og ómögulegu,  þótt þér berist uppí hendurnar sitt lítið af hverju ? Hverskonar er þetta eiginlega ?

Hvað er athugavert við að fá banka í jólagjöf ? menn fá nú annað eins frá vinum sínum. Svo var þetta ekki bara  gjöf  til þín, fleiri fengu nú þennan banka . Var það ekki Óli sem fékk að vera með þér í bílnum sem fékk þetta lítilræði með þér ?

Þeir sem nöldra hæst þykjast vera eitthvað. Þessar eiturtungur vilja klína bara öllu mögulegu á  þig Finni minn.  Þú átt að hafa sóað einhverjum samvinnusjóði, einhverskonar eftirhretum af samvinnu tryggingum. Þetta var svo sem ekkert að ráði nokkrar krónur að mér skilst. Svo eru þessir öfundarpúkar að velta sér uppúr einhverjum félögum sem þeir segja að þú eigir og notir til að stela peningum af fólki . Eitthvert FS7 eða 8 ehf, svo eitthvert Ker og  eitthvert  hestafélag  sem þeir segja að heiti Hesteyri. Mér finnst þetta bara ekkert fyndið.  Svo eru þessir púkar að tala um að þú sért eigandi af einhverju Gift, er þetta bara ekki einhver misskilningur, ertu bara ekki giftur er það ekki allt og sumt ?

Kæri Finni minn þú hefur alltaf verið frumherji í mínum augum. Því skyldi enginn vera hissa á að þú eigir Frumherja.

Hvað gengur sveitastjóranum eiginlega til að neita um malbik að sveitasetrinu fyrir austan ? Hann segir þetta vera bara kot og þú fáir sko ekkert malbikað. Við malbikum nú ekki að hvaða koti sem er sagði sveitastjórinn.

Elsku drengurinn minn, mikið þótti mér vænt um að heyra frá hrossaræktinni, þið hjónin leggið mest upp úr mýkt og góðu geðslagi er mér sagt. Ég hlakka til þegar þetta hrossaket kemur í verslanir lungamjúkt og geðþekkt. En illtungurnar halda áfram að mala tóma lygi.  Og hvað með það þótt þú eigir hestakerru með sér baði og eldhúskróki, það bara kemur það engum við og hananú.

Svo eru eiturtungurnar að hafa það eftir hverjum öðrum að þú hafir lánað heimilisfangi þitt undir einhver félög sem þú náttúrulega hefur ekkert  með að gera núna. Þeir gapa hver upp í annan og hafa í flimtingum Fikt.ehf, Hik.ehf, Bolmagn.ehf,  og Hvanná.ehf. Þessir aular eru bara alveg hugmyndablankir. Þeir fatta ekki að merkinguna í þessu, sem er auðvitað að þú hafir Bolmagn til að Fikta  og Hikir ekki við að vaða Hvönn upp í háls, þvílíkir aular, ég segi ekki annað.

Þessir aular eru að segja að þú hafir brotlent í einhverju Langflugi. Ég veit að þú gerir ekki svoleiðis, var bara ekki bensínið búið í þessu flugi ? hvað getur þú svo sem gert þegar aularnir sem sjá um bensínið bregðast ?  Ég veit ekki betur en Lalli sem var endurskoðandi hafi stimplað olræt á bensínpappírana hjá þér fyrir þetta Langflug. Var hann ekki í einhverri skilanefnd fyrir eitthvert kompaní sem þú settir hann í þegar þú varst ráðherra ?  eða var það eitthvert eftirlit ég bara veit ekki meir elsku drengurinn minn

Hvað eiga þessar pöddur eiginlega við þegar þeir segja að þú eigir eitthvað í Mannviti ? Ég veit nú ekki til að það sé neitt mannvit í kringum þing Finni minn. En það er því meira peningavit umkringis þig en marga aðra.

Ég man alltaf hvað mér þótti vænt um þegar þú komst á þing fyrir mig og okkur öll framsóknarlömbin. Og maður lifandi þegar þú varðst ráðherra og raðaðir okkar fólki í allskyns embætti hjá ríkinu. Maður tali nú ekki um þegar þér var falið það vandasama verkefni að stýra Seðlabankanum .

Ég segi nú ekki annað við þessar eiturpöddur og hælbíta sem eru á eftir þér, þið eruð bara öfundarpúkar og ekkert annað.  Þið hafið ekkert vit á framsókn. Þið eruð alltaf í vörn og nennið ekki  neinu sem okkar ástkæri Finnur hefur verið að sýsla með.  Hver segir að þú hafir fengið vin þinn til að kaupa eitthvert skoðunarfyrirtæki svo þú réðir yfir þeim báðum sem til eru í landinu ?

Algjör snilld að koma á sektarkerfi sem þú einn færð að innheimta og græða á.

Þetta verður ekki lengra í bili Finnur minn, hef samband síðar

Þín einlæga.

Magnea

Ps.

Ef þú ert blankur þá ertu alltaf velkominn í hrísgrjónavelling  til mín Finnur minn.

 

 

Bréf 31                                                                        Flatey 9.október 2009

Kæri Ármann

Mikið þótti mér vænt um þig þegar ég fékk boðskortið frá þér. Mig hefur alltaf dreymt um að vera í alvöru jólaboði innanum alvöru fólk. En því miður komst ég ekki til London um jólin. Ég átti ekki aura fyrir fargjaldinu, takk samt.  Var ég búin að þakka þér fyrir boðið í Miðjarðarhafið í hittifyrra ? Ég bara man ekki hvort ég var búin að þakka þér fyrir það. Mikið held ég að það hafi verið gaman á snekkjunni, með allt þetta fræga fólk um borð. Og þú bara drengurinn minn aðal maðurinn um borð.

Englasöngur þinn barst út yfir rennislétt Miðjarðarhafið og rann saman við nið náttúrunnar, eina hljóðið utan englasöngs þíns var glasaglymur veislugesta þegar þeir skáluðu aldeilis agndofa af hrifningu. Þvílíkt maður og þessu missti ég af af því ég var blönk þarna um sumarið. Ég reyndi að slá fyrir ferðinni en þeir þarna í Raupklink vildu ekkert  lána mér, ekki grænan eyri hvað þá meir. Svo var þarna einhver með þvílíkan dónaskap. Þegar ég sagði þeim að mig vantaði þessa aura til að komast á snekkjuna, þá bara sagði einn þeirra, þangað átt þú ekkert erindi, þú átt áræðanlega engan nothæfan kjól fyrir snekkjuferðir. Svona fór nú þetta Ármann minn og ekki meira um það. Auðvitað er ég svekkt yfir þessu öllu.

Nú eru níðbítarnir farnir að glefsa í þig líka Ári minn. Á því átti ég síst von eins og þú ert glæsilegur á velli. Þeim er ekkert heilagt þessum sullukjöftum svei þeim bara.

Þú bara lentir í þessari vinnu hjá Raupklink aldeilis óafvitandi, og svo varstu bara allt í einu kominn til London, eins og þú hefðir nokkurn tíma viljað það sjálfur. Nei þú bara lentir í þessu.

Auðvitað gerðir þú rétt fyrst þú á annað borð lentir í þessu að sjá um kaupin á þessari sjoppu, hvað hún nú heitir. Singja og Friðlander eða eitthvað svoleiðis. Ég á svo bágt með að muna útlensku.

Það var ekki þér að kenna þótt Darling vildi ekki henda til þín björgunarhring þegar bankinn drukknaði í skuldum, sem þú áttir náttúrulega enga sök á. Ég trúi þér alveg Ári minn þegar þú segir að þú hafir frekar átt á dauða þínum von en að fá heimsókn frá Darlig þarna í október í fyrra. Ekki nóg með það, heldur skrifuðu þessir sendlar frá einhverju fjáraeftirliti Darlings með stórum stöfum í gestabókina þína, þvílíkur dónaskapur, ég er hneigsluð.

Ámann minn elsku drengurinn minn og nú ertu búinn að skrifa þína höfuðlausn alveg eins og Egill forðum. Ævintýraaurinn heitir hún víst er það ekki annars ? Sama hvað hún heitir, hún er tær snilld er mér sagt. Meira að segja táruðust þeir Siggi og Hreiðar þegar þeir lásu formálann og þá er nú mikið sagt þegar svo miklir víkingar tárast.

En eiturtungurnar eru samar við sig og segja að þú hafir bara vitað þetta allt saman löngu á undan Darling og félögum. Svo er einhver kerling að skrifa að hún fái ekki banana fyrir börnin sín út af þessu öllu saman, henni var andskotans nær að eiga þessi börn segi ég bara.

Við ykkur sóðakjafta og níðskrifara segi ég eins og meistarinn forðum, kasti þá sem ekki er blankur fyrsta steininum, og hananú.

Elsku Ármann minn ég verð að láta staðarnumið í bili, Mogginn var að koma.

Þín Magnea

 

 

Bréf 32                                                                                                Papey 21.nóv.2009

Kæri Hannes Hólmsteinn

Mikið ertu klár. Þú ert bara svo klár að ég roðna þegar ég les síaðasta bloggið þitt. Mikið er ég stolt af þér elsku drengurinn minn. Auðvitað er það hárrétt hjá þér og Dabba að íslensk alþýða eigi ekki að borga óreiðuskuldir íslenskrar alþýðu. Dabbi sagði það bæði fyrir og eftir fall græðgisvæðingarinnar sem hann bjó til eftir teikningum frá þér. Svo eru einhverjir stúdentar að semja fyrir Grímsa um þessar skuldir sem við skuldum sko alls ekki, eins og þú og Dabbi eruð marg búnir að benda á.

Eins og þessir illpennar eigi ekki að vita þetta eins vel og þú Hannsi minn. Eini maðurinn svo vitað sé sem ekki vissi af því að óráðssíumennirnir væru búnir að setja alþýðu Íslands á hausinn var Baldur nokkur ráðuneytisstjóri hjá dýralækninum , sem þá var fjármálaráðherra. Hann vissi víst ekkert um þetta fall bankanna því hann var á kafi í beljurassi og sá ekkert hvað var að gerast í bönkunum.

En eins og Dabbi sagði alltaf þið megið setja Bjögga á hausinn en ekki mig.

Þú bendir réttilega á að ýmsir aðilar í ýmsum löndum hafi bent á að þetta séu ef til vill ekki skuldir Íslenska ríkisins. Heldur bara einhverra óráðsíukalla.

Þessi ríkisstjórn sem við kusum veit ekki hvað frelsi einstaklingsins þýðir, er duglaus skortir þor, þrek, kunnáttu og getur til að semja við útlendinga. Bíddu aðeins semja um hvað ? er ekki íslenska þjóðin blásaklaus ? Eru það bara ekki Bjöggarnir sem eiga að semja ? Látum þá um samningana sem stofnuðu skuldirnar í nafni frjálsræðis, einkavinavæðingar og græðgi.

Þessi AGS sem ég kalla bara Agga segir að þeir láni ekki til þeirra sem ekki standi við gerða samninga um greiðslu skulda. Það verði engin lán fyrr en búið sé að semja um skuldir óreiðsíumanna á Íslandi. Helvítis frekjuhundur þessi Aggi. Hann sagði víst það sama við Georgíumenn rétt um daginn. Þið skuluð borga Rússunum fyrst og tala svo við mig. Ósvífni og frekja ekkert annað.

En elsku Hannsi minn ég vona bara að þessi blogg þín leiði alþýðu landsins af moldartroðningi mjóa vegarins inn á breiðstræti frelsisins og einkavinavæðingar á ný.

 

Elsku Hannes minn haltu áfram þessum skrifum, ekki veitir af að upplýsa málin. Þetta með Baldur er áræðanlega runnið undan rifjum öfundarmanna og illpenna. Það er sko ekkert bannað að selja verðbréf. Verst fyrir þann sem keypti. Honum var andskotans nær ég segi það bara.

Bestu kveður til ykkar allra.

Þín Magnea

 

 

Bréf 33                                                                                      Fagurey 21.nov.2009

Kæri Baldur

Hvernig stendur eiginlega á því að þetta pakk sem hafði ekki vit á að græða, heldur því fram að þú hafir vitað fyrir fram um gjaldþrot Landsbankans ?

Það er ekki sama að vara í kaffi og sérríi hjá elskulegum Darling og vita hvenær banki fer á hausinn.

Illpennarnir halda því fram að þú hafir verið á fundi í útlöndum með þessum Darling og hann hafi verið að segja ykkur að bankinn væri gaga og færi á hausinn. Auðvitað segja illpennarnir auðvitað vissir þú þá að þú áttir að selja bréfin þín. Ég segi bara þvílík öfund og illkvittni hjá þessu pakki. Ég veit elsku Baldur minn að þú hefur bara ekki skilið þessa útlensku í honum Darling og því er það deginum ljósara að þú vissir ekkert.

Aumingja fólkið sem keypti þessa pappíra af þér, það hefur þá væntanlega tapað því sem þú tapaðir ekki. En ég bara segi það,  því var nær. Þetta pakk hefur áræðanlega ætlað að græða á þessum pappírum, og láta þig sitja eftir með sárt ennið.

Svo var Jónsi í eftirlitinu og Dabbi í Svartakastala búnir að segja að þú hafir ekki vitað neitt um þennan Landsbanka. Þess vegna fékk Jónsi í eftirlitinu ekki af sér að vera með einhverja rannsókn á þessu og bara sagði eins og ég hef alltaf sagt. Hann Balli vissi ekkert.

Það er því deginum ljósara að þú ert blá saklaus af þessu öfundarrausi í nöldrurum sem halda öðru fram.

Balli minn ég og mitt fólk styðjum þig af öllu afli og munum vitna þér í hag hvenær og hvar sem er. Þú þarft bara að segja okkur hvað við eigum að segja.

Þín elskulega.

Magnea

 

 

Bréf 34                                                                                               Eindrangur 22.okt.2009

Kæra  Ragna

Mér finnst það ekki ná nokkurri átt hvernig talað er um þig þessa dagana. Svívirðingar málningarskvettur og bara nefndu það, þetta er alveg óþolandi.

Svo er fólk að tala um að dómarakerfið muni ekki getað dæmt neina af þessum glæponum sem settu okkur á hausinn vegna skyldleika. Hvernig er bara hægt að starfa í þessu umhverfi, þar sem allir þekkja alla og eru meira og minna í ætt hver við annan ? Ég bara segi ekki meir.

En elsku Ragna mín, mér datt bara í hug að það mætti gera gott úr þessu öllu saman. Eins og við báðar vitum þá gengur fólk um göturnar hungrað og kvalið af þessu ástandi sem gæsalappi og Dabbi bjuggu til fyrir okkur. Ég ætla að benda þér á að í þessu felast tækifæri fyrir þetta volaða fólk. Tækifæri sem leysa vanda dómara og annarra skyldmenna Bjöggana, Werneranna, Ólafanna, Finnanna og fleiri og fleiri. Vinir þínir og undirmenn gætu þá dæmt á báða bóga, hægri og vinstri og allt um kring án þess að hafa áhyggjur af skyldleika og öðrum leiðindum.

Jú nú kemur tillagan sem þú getur ekki hafnað.

Stofnað verður félag sem ræður þetta fólk í vinnu sem er sársvangt og ráfar um í skuldafeninu öllum til leiðinda. Vinnan er í því fólgin að sitja inni fyrir glæpi annarra. Þetta er örugg vinna segjum si svona vinna til tveggja til tuttugu ára allt eftir því hvernig dómar falla. Þetta ólánsfólk gerir samning við félagið um hvað þunga dóma það vill sitja inni fyrir. Launin eru vatn og brauð, sem er meira en það fær í dag fyrir að ráfa um. Það mætti svo gefa skattaafslátt og eitthvað fleira fyrir þessa vinnu, enda er hún ekki ósvipuð sjómannastörfum,“ kallinn aldrei heima“.

Félagið gæti heitið Afleysingar ehf. Eða eitthvað. Ég mæli með nafnasamkeppni fyrir nafn á félaginu.

Félagið yrði að sjálfsögðu í eigu okkar og fengi tekjur úr ríkissjóði í öfugu hlutfalli af þyngd dóma.

Elsku vinkona hafðu samband við mig þegar þú hefur ákveðið hvernig þú vilt útfæra þetta.

Þín besta vinkona.

Magnea

 

Bréf 35                                                                        Kolbeinsey  4.11.2009

Kæra Birna.

Mikið hlýnaði mér um hjartaræturnar þegar ég frétta af þessu mikla barnaláni sem þú hefur í bankanum. Það er ekki hægt að segja um alla bankastjóra í dag að þeir séu svona lánsamir eins og þú Birna mín.

Til dæmis eins og Finnur, hann er í djúpum þú veist. Eymingja Finnur, hann veit ekkert hvort Jói í Bónus skuldar eða hvort Jón í Högum skuldar. Svo veit hann heldur ekkert hvort þetta séu fjörtíu milljarðar eða meira, eða kannski minna, sem þarf að afskrifa þurfi eitthvað að afskrifa.

Ég er ekki hissa þó maðurinn sé órakaður með allar þessar áhyggjur. Svo segir Steingrímur greyið bara bankinn ræður, svo það er ekki mikil hjálp í því fyrir Finn. Jóhanna segir bara bankinn ræður en hann verður að gera eins við alla. Þetta er bara ekki hægt Jóhanna mín. Bankinn hefur ekki efni á því að gera eins. Afturármóti er vel hægt að afskrifa skuldir Haga, einfaldlega af því Jonnarnir eru svo góðir gæjar, gefa bæði til mæðrastyrksnefndar og í kosningasjóði.

Birna mín ég ætlaði ekki að rausa um Jónanna, heldur barnalánið sem þú ert aðnjótandi að. Hvernig var þetta aftur. Er þetta sama upphæðin sem þú vissir ekki hvort var farin af reikningnum þínum og barnalánið kostaði? Voru það ekki 180 millur ?

Hvað um það barnalán er það hvort heldur sem er. Mikið öfunda ég þig Birna mín af öllu þessu barnaláni.

Þín einlæga

Magnea

 

 

Bréf 36                                                                           Flatey 4.11.2009

Kæri Hreinn.

Nú er öfundarpakkið farið að nöldra um þig elsku drengurinn minn.  Það er naumast fólkið getur verið óprúttið. Sumir segja og það án þess að roðna hvað þá meir að þú Hreinn minn sért ómerkilegur pappír.

Ég á bara ekki orð yfir þessum dónaskap. Það er ekki að spyrja að sumu fólki, það bara er með ofnæmi fyrir öllu sem kemur nálægt Baugi og Högum og hvað þetta nú heitir  allt saman. Svo segir þetta fólk að þú hafir eitthvað með þetta að gera. Ekki er það þér að kenna þótt Hagar skuldi einhverja smáaura.

Svo er þetta fólk að vitna í þig og segir að þú hafir sagt „óháð tilfinningum okkar, þá eiga reglur réttarríkisins að gilda hér á landi“ . Það er naumast segi ég bara, hvaða ríki er þetta réttarríki eiginlega ?  Hverjir eiga heima þar ? Hvar er þetta réttatríki hér á landi ?

Hverjum kemur svo sem við þótt þú farir til útlanda öðru hverju ? Ekki er þetta pakk neitt skárra tollir aldrei heima hjá sér. Hvernig var þetta með strætó varst þú ekki fullur-trúi Dabba og arkitekt að sölu strætó ? Mikið höfum við grætt á einkavinavæðingu strætó, svo maður nú ekki tali um bankana. Je minn maður lifandi hvernig væri ástandið hér ef við hefðum ekki snillinga eins og þig og Baugarana  til að leiða okkur um augnstræti fjármálanna. Heyrðu Hreinn minn, af hverju er ekkert um þig í hvítubókinni.vinstri grænn ? Þíðir .vg ekki annars vinstri grænn ?

Þín einlæga

Magnea

 

 

Bréf 37                                                                              Kolbeinsey  7.11.2009

Kæri  Valtýr.

Hversonar er þetta eiginlega með þig maður ? Hefurðu bara ekkert hugmyndaflug ? Ég skil bara ekki hvað þú ert að hugsa  maður. Það má þér og Rögnu vera morgunnljóst hvernig á að leysa ljósritunarvandann.

Hvernig er það annars er virkilega ekkert hagkvæmt kennt í Súpergaggó á Melunum ?  ég segi bara ekki annað.

Það má hverju barni vera ljóst að dæmdir nauðgarar, morðingjar og bankamenn eru auðvitað þeir réttu til að ljósrita dómsskjölin. Hvað með það þótt nauðgarinn sjái myndir sem hann sjálfur tók eða sýndi fórnarambinu, hann er búinn að marg sjá þetta allt saman, það ætti meira að segja að vera hollt fyrir hann að sjá þetta einu sinni enn. Svo gæti hann merkt með rauðu allar missagnirnar sem hafa verið sagðar fyrir dómi, svona til að auðvelda Hæstarétti eftirvinnsluna. Sama gildir um morðingja og smáþjófa, bara láta þessa gaura ljósrita sjálfasig.

Maður tali nú ekki um bankamennina. Það er bara spurningin um tíma, það er hvort þeim endist ævin til að ljósrita allt efnið sem þeir hafa samið um sjálfasig og snilli sína í stjórnun peningamála.

Kveðja til ykkar beggja.

Magnea

 

Bréf 38                                                                                   Lundey  11.11.2009

Kæri Bjarni Ben.

Mikið er ég sammála þér með þessar skattahækkanir. Það er algjört brjálæði að hækka skattana svona á þér. Þeir sem þessu stjórna ættu bara að skammast sín og hætta að bulla svona út í eitt.

Hún Gerða leikaradóttir hitti naglann þegar hún sagði að þetta væri fantasíumatseðill sem væri verið að kynna. Hún ætlar að gefa út matreiðslubók með 1000 fantasíuréttum.

Fyrst nokkrar súpur, sú kraftmesta er skuldasúpan, sú hin sama og gerð var tilraun með í Kaupþings eitthvað. Svo verður baunasúpan úr þinginu samsett úr því sem gæsalappi hefur baunað á stjórnina. Ekki má gleyma vælugrautnum, sem er slefan úr Framsókn yfir lánleysi þeirra í Noregi. Af nógu verður að taka fyrir leikaradótturina.

Meðal aðalrétta er til dæmis grilluð hryggsúla Samfylkingarinnar og marineruð hnakkastykki steikt með rauðlauk. Með þessu er gott að drekka rauðvín Sigmundar, sem er splunkunýtt brugg frá Alþingi.

Einnig er meðal aðalrétta reyktir síðubitar úr Borgaraflokknum með soðnum kartöflum úr Þykkvabænum teknar upp af Árna J. fyrir ömmu sína. Þetta er bara sýnishorn, af nógu er að taka fyrir Gerði leikaradóttur. Ekki má gleyma eftirréttunum. Þeir eru ekki af lakari gerðinni. Til dæmis gjalþrotabúðingur með skuldaslettum, sérlega ljúffengur. Svo lánakúlur með skuldalíkjör, og ekki má gleyma skuldarjóma með muldu tapi.

Svo er að sjálfsögðu borið fram skuldakaffi með Davíðsdropum á eftir þessu öllu saman.

Já það verður spennandi að elda í framtíðinni Bjarni minn.

Það er verst að þurfa að éta alla skapaða hluti ofaní sig. En frekjan í henni Jóku er engu lík það verð ég bara að segja.

Elsku Bjarni minn áfram með þig og taktu nú mark á dýralækninum, það er tími til kominn, enda hefur hann ómældan áhuga á fjármálum Grímsa.

Þín elskulega

Magnea.

 

 

Bréf 39                                                                                      Hrútey  16.11.2009

 Kæra Ingibjörg Solla,

Nú eru ljótir kallar að segja að þú hafir sagt að þú hafir verið reið. Maður lifandi hver er ekki reiður ?

Svo er þetta hyski að segja að þjóðin sé reið og þess vegna sért þú reið. Ég spyr bara hvaða þjóð er reið ?

Það vantaði bæði Bubba frænda og Stínu og líka Stebba dóp í Háskólabíóið, svo það var alveg laukrétt  hjá þér að þar var sko ekki öll þjóðin mætt. Hvað eru svo þessir illpennar að gapa ?

Þú ert auðvitað stikk frí eins og Haarde. Hvernig átti þér að detta í hug að eitthvað væri að ? þú hafðir sko nóg að gera við að safna í allsherjar eitthvað og svo að smala múslimakerlingum með viskastykki á hausnum. Svo það er ekki nema von að þú sért reið. Fékkst ekki að vera í allsherjarráði í stóra heimsklúbbnum og kerlingarnar sem þú frelsaðir frá ljótu köllunum í Írak eða Íran ég man ekki hvort það er, hafa ekki einu sinni sagt takk fyrir björgunina. Þú hefur sko allan rétt á að vera reið bæði sjálfri þér og allri þjóðinni

Þessi svokallaða þjóð lét þig ekki vita að neitt væri að hjá ykkur Haarda í heila átján mánuði. Svo bara allt í einu var allur peningur búinn og ekki meira að fá. Enginn furða að þú sért reið, ég segi bara ekki annað en það.

Flott hjá þér að forða þér frá landinu þar sem allir eru reiðir út í þig og þú út í alla.  Hvar verður þú nú aftur sendiherra var það Yemen eða Dubai ? Sama hvort er þú átt viskustykkið ennþá er það ekki ?

Jæja Solla mín við skulum bara halda áfram að vera reið sjálfum okkur og öðrum, þó aðallega öðrum.

Ég skrifa fljótt aftur.

Þín einlæga

Magnea

 

Bréf 40                                                                                       Viðey  19.11.2009

Kæri Baldur.

Enn eru illpennarnir að skrifa um þig elsku drengurinn minn. Nú er einhver ljótur kall búinn að frysta allt sem þú átt og vill meina að þú grandvar og góður embættismaðurinn hafir gert eitthvað ljótt.

Það er nú aldeilis öfundin í þessum púkum. Svo níðast þeir á minnimáttar ofaná allt annað. Ég bara spyr hvenær ætlar þetta hyski að ná og frysta alvöru glæpona eins og til dæmis flokksbræður þína Illhuga, Hannes, Felling og Werner svo einhverjir séu nefndir, að maður nú ekki tali um  þá sem plægðu akurinn og sáðu svindlfræjunum.

Meðan alvöru glæponarnir spígspora um og gera launakröfur í rústirnar þá ert þú tekinn í bólinu heima hjá þér að konunni aðsjáandi, mér verður bara flökurt.

Þessir slúðurkallar segja að þú hafir fengið einhverjar innviðisupplýsingar út í London, þvílíkt bull segi ég bara. Hvað heldur þetta pakk eiginlega að þú sért ? Voru ekki einhverjir aðrir út í London með þér eða varst þú með þeim ? og hvað með það þótt þú hafir drukkið te með þessum Darling eða hvað hann nú heitir. Þótt hann hafi eitthvað verið að segja að Landsbankinn væri með magapínu og best fyrir alla að setja hann í detox-meðferð þá er ekki þar með sagt að það hafi verið einhverjar nýtilegar upplýsingar, enda sagði Haardi að ekkert væri að og Solla sagði líka að ekkert væri að ekki einu sinni magapína. Hvernig heldur svo þessi ljóti kall að þú hafir vitað eitthvað ? þú sem ekki skilur útlensku frekar en ég og svo margir Íslíngar.

Eru bréf ekki til að kaupa og selja ég bara spyr ? hvað kemur þessu öfundarpakki til að halda eitthvað annað ? Nóg er af lúserunum fyrir það, þótt þú hafir fyrir einskæra tilviljun selt þína pappíra fyrir detoxið hjá bankanum. Nei vinurinn minn ég sko stend með þér og ef með þarf þá skrifa ég bóndanum á Bessó ef ljóti kallinn slekkur ekki á frystinum eins og skot, og hananú.

Þín besta vinkona

Magnea.

 

Bréf 41                                                                                       Eldey 21.nóv.2009

Kæri Styrmir.

Mikið skrifarðu fallega um hann Dabba okkar. Auðvitað ætlaðir þú að skrifa krimma um Íslendinga og dómgreindarleysi alþýðunnar.  En það verður bara  næsta bók.

En þetta er eins og venjulega þegar maður ætlar að gera eitthvað, þá kemur bara eitthvað uppá sem breytir öllu fyrir manni.

Auðvitað gengur það fyrir að skrifa höfuðlausn fyrir Dabba okkar, það hefur engan tilgang að hann skrifi sjálfur sína eigin höfuðlausn, það tæki enginn mark á því.

En eins og þú bendir réttilega á þá hefði það verið hreint stílbrot ef Dabbi hefði ekki farið í bankann, eins og þeir Steingrímur og Finnur. Það er afturámóti gegn hefð og góðum siðum að hvorki Solla né Haardi voru sett í bankann.

En eins og þú skrifar þá var það Dabbi sem varaði bæði bankamenn og stjórnmálamenn við banka vitleysunni. Það var hann Dabbi sem sífellt var að tala um útrásina og það var sko ekki Dabbi sem skálaði við bankamennina i kampavíni. En það var enginn annar en Dabbi sem varaði við ástandinu sem upp kæmi ef Mogginn fengi ekki að vera eina blaðið á Íslandi. Hver annar eins og þú bendir á vildi koma beisli á helvítis Baugaranna nema Dabbi. Það var auðvitað honum Óla á Bessó að kenna hvernig fór. Það fengu sko allir sótraftar að bulla það sem þeir vildu í Baugsmiðilinn ojbara.

Auðvitað eins og þú segir elsku Stymmi minn var það öllum öðrum að kenna en ykkur Dabba hvernig fór.

Ekki vildu sjálfstæðismenn að þetta færi allt til andskotans, enda vöruðu þeir við allan tímann.

Meira að segja hefur verið haft eftir gæsalappa formanni að það hefði ef til vill verið farið of geyst í þessum málum og ástæða væri ef til vill til að skoða nánar hvort einhverjir hafi stjórnað þessu af einhverskonar kæruleysi eða bjartsýni. En við verðum að líta heilstætt á þetta og skoða þetta með opnum huga sagði gæsalappi. En eins og gæsalappi sagði auðvitað er þetta allt saman vinstrigrænum að kenna.

Auðvitað er þetta ástand allt honum Steingrími að kenna, auðvitað er hann jókerinn í þessu spili öllu saman. Svo er hún Jóka bara strengjabrúða hjá Grími og ekkert annað.

Svo er verið að blanda frömmurunum í þetta bara af því að Steingrímur of Finnur eru frammarar, eins og það breyti einhverju ? nei heyr fyrir glópalánsforingja frammara segi ég bara og meina það.

Þín elskulega

Magnea.

 

 

Bréf 42                                                                                      Engey  23.des.2009

Kæri Bjarni Ben.

Ég skrifaði þér smá bréf í nóvember mig minnir að það hafi verið þann 11.

Nú get ég ekki orða bundist yfir því nöldri sem ég hef heyrt um þig undanfarið.

Þetta nöldur er út af því að öfundar-kommarnir í framsókn og samfylkingunni þykjast vita eitthvað um þinn auð fyrir og eftir kreppu.

Mér finnst þetta alveg rétt hjá þér að skammast út í kommana og kratana fyrir ástandið í peningamálum landsmanna.

Bubbi frændi gerði það alltaf þegar hann hafði gert eitthvað af sér. Þá öskraði hann á okkur frændsystkini sín, það voruð þið sem gerðuð það.

Þá kom mamma og skammaði okkur, alveg sama hvað við sögðum. Bubbi fór bakvið sófann og þóttist ekkert hafa gert.

Hvað með það þótt þú hafir verið að vasast í bissness, það er áræðanlega ekki þér að kenna hvernig fór. Þetta Mileston kom þér og þínum sko ekkert við. Hvað þá heldur Innvik & co, né þá ekki heldur, KCAJ, BNT, N1, Máttur, SJ2, Skeggi, Þáttur International, Hrómundur, Hafsilfur, Racon Holding, og þá ekki Svartháfur sem illpennarnir segja að hafi verið leppfyrirtæki fyrir Racon og Vafning. Svo er fólk að hneykslast yfir því þótt þú segir elsku drengurinn að þú hafir ekki tekið neinn þátt í svindlveislunni miklu sem skuldsetti almúgann upp fyrir eyru.

Það var auðvitað einhverjum Morgan í Ameríku að kenna hvernig fór, helvítið að tarna átti sko ekkert með að rukka ykkur feðgana og Wernerana.

Öfundarpakkið og kommakratarnir horfa bara alveg framhjá því og kenna ykkur um allt saman.

En Bjarni minn þú skalt bara halda áfram að skammast út í Steingrím og hina kommana alla saman, þetta er auðvitað allt þeim að kenna. Ég er sannfærð um að evruverkfræðingurinn Halldór Jónsson getur reiknað ykkur alla frá þessu og komið því á hana Jóhönnu og kannski einhverju á hann Steingrím líka.

Jæja Bjarni minn ég læt þetta gott heita í bili, ég skrifa þér aftur fljótlega. Mér finnst ljótt að kalla þig gæsalappa, en svona eru framsóknarmennirnir sem þú heldur að séu vinir þínir.

Bestu kveðjur, en passaðu að borða ekki of mikið af skuldasúpunni um jólin.

Þín einlæga Magnea

 

 

Bréf 43                                                                                       Lundey 30.des.2009

Kæra fréttastofa RUV

Hverjir eru skúrkar ársins spurði fréttamaðurinn.

Það eru þeir Björgúlfsfeðgar svaraði einn. Það er fréttastofur RUV segir einn. Það eru útrásarvíkingar segir einn. Það eru þeir sem enn eru við völd hingað og þangað og neita að víkja fyrir þeim sem eru að reyna að taka til.

Þvílík fyrra segi ég og skrifa. Skúrkar ársins eru náttúrulega fólkið í landinu sem valdi þetta fólk til valda sem komið hefur okkur á kaldan klaka.

Það er ekki Björgúlfsfeðgum að kenna hvernig fór með Landsbankann og þau félög sem féllu með honum. Nei ekki aldeilis, þeir lentu bara svona í því.

Það er ekki  Wernerum, Einarssonum né Máfum að kenna hvernig fór með Kaupþingsbanka, nei þeir bara lentu í þessu.

Það er ekki Weldingum, Jónssonum, Smárasonum né Bakkabræðrum að kenna hvernig fór fyrir Glitnisbanka, nei þeir lentu bara svona í því.

Auðvitað eru kjósendur og vandamenn þessara heiðursmanna skúrkar ársins og raunar undanfarinna ára líka, allir auðvitað nema hann Dabbi minn sem varaði stöðugt við. Ekki er hægt að segja með neinu sanni að hann Halldór og hún Valgerður séu skúrkar ó nei, ekki aldeilis, þá eru þeir Bjarni gæsalappi Ben og Sigmundur glópalán ekki skúrkar, öðru nær.

Nei það eru auðvitað allir aðrir en þeir sem eru skúrkar ársins og undanfarinna ára.

 

Magnea óskar öllum skúrkum nær og fjær farsælds komandi skúrkaárs.

 

 

Bréf 44                                                                                        Eyðiey 31.12.2010

Kæri  Jón Valur

Það er merkilegt fyrirbrygði þessi Jón Valur.

Hans skoðun er að það eigi að stinga í steininn slökkviliðinu sem er að reyna að slökkva óreiðubálið sem Framsókn og Íhaldið kveiktu  og gera eignir slökkviliðsmanna upptækar. Þetta er í samræmi við skoðanir evru-verkfræðingsins úr súpergaggó á melunum.

Þetta eru sko skoðanir sem mér líkar við, ég segi það bara.

Auðvitað á að gefa upp sakir til allra frammara og íhaldsmanna og dreifa uppteknum auði slökkviliðsmanna meðal þeirra. Það þarf bara að gæta þess að gæsalappi og glópaláni fái stærri skerf en aðrir.

Wernerar, Weldingar, Ólafssynir, Ingólfssynir, Thorsarar, Einarssynir, Ármannsynir, Smárasynir, Bakkabræður og allir hinir geta nú andað léttara og fengið sér bjór og kampavín án þess að skattmann sé eitthvað að horfa yfir öxlina á þeim.

Þeir geta svo þegar þeir eru komnir á þing aftur lagt niður saksóknara og leiðindadómara sem eru að hrekkja þá.

Svona eiga bændur, verkfræðingar og guðfræðingar að hugsa. Jöfnuður fyrir alla nema helvítis fíflin sem eru að pissa á bálið. Þeir þurfa ekki að hafa áhyggjur af kjósendum, þeir eru fíflin sem kjósa alltaf yfir sig brennuvarga hvort sem er.

Þetta er nýárskveðja til ykkar ágætu landsmenn.

Magnea.

 

 

Bréf 45                                                                      Kolbeinsey  4.jan. 2010

Kæri  Jón V.

Mikið finnst mér dásamlegt að menn séu að vakna til vitundar og vilja gera minnismerki um helvítis aulana sem eru sífellt að pissa á  efnahagsbálið sem gæsalappi og glópaláni segja að sé allt Steingrími að kenna. Fyrir 800 þúsund er örugglega hægt að gera veglegan minnisvarða með 33 nöfnum þeirra sem samþykktu þennan icesave samning, eins  vitlaus og hann  nú er.

Kæri Jón minn, finnst þér ekki ástæða til að gera líka minnisvarða með nöfnum þeirra sem bjuggu til Icesave vitleysuna ? Efst gæti til dæmis verið brjóstmynd af Dabba og Dóra þar fyrir neðan brjóstmyndir af Geir H, Gerðu leikaradóttur, Valgerði frammara og Sollu. Svo þar fyrir neðan af: Wernerum, Ingólfssyni, Thorsurum, Ólafssyni,  Einarssyni, Ármannssyni, Smárasyni, Gissurarsyni, Welding,  Árnasyni, Kristjánssyni, Guðmundssonum,  Sigurðssyni  og svo mörgum öðrum sem unnu ötullega að falli Íslands undir öruggri styrkri stjórn Íhalds og framsóknar. Ég sé fyrir mér þessa tvo minnisvarða í Garðinum bakvið alþingishúsið. Annar úr íslensku grágrýti hinn úr marmara frá Ítalíu.

Algjör gargandi snilld segi ég bara.

Hver var nú aftur að segja að slökkviliðið migi bensíni ? Ljótt ef satt er.

Elsku drengurinn minn ég vona bara að þú fáir nafnið þitt á minnisvarðan úr marmaranum.

Kær kveðja

Magnea

 

 

Bréf 46                                                                           Súlnasker 7.jan 2010

Kæri Tryggvi

Mikið þótti mér vænt um þig þegar ég frétti af því að þú hefðir ráðið vinkonu mína í rannsóknarnefndina þína sem sumir vilja meina að sé á vegum Alþingis. Við vitum nú að þetta er einkanefnd sem enginn þarf að svara fyrir. Bara dónar spyrja spurninga eins og til dæmis um eitthvert fyrirtæki  og kúlulán.  Hvað með það þótt hún Elín okkar hafi fengið kúlulán ?.hún er ekki sú eina sem fékk svoleiðis lán.

Hverjum er annars treystandi fyrir svona rannsókn nema vönum  mönnum og konum  sem hafa persónulega reynslu af sukkinu sem verið er að rannsaka, ég bara spyr.

Svo voru þetta ekki nema 117 millur, hvað er það svo sem í dag ? Þótt einhver banki þurfi að afskrifa þessa aura þá er það bara bankans og fólki kemur það sko ekkert við. Að vísu lendir reikningurinn hjá fíflunum í landinu en ég er glöð yfir því að fá að leggja mitt af mörkum svo Elín mín verði ekki að betla fyrir mat.

Þín einlæga

Magnea.

 

Bréf 47                                                                       Hafursey 10.jan.2010

Kæri Bjarni Reykhás Ben Gæsalappi

Mikið þótti mér þessi Reykhás sveifla glæsileg hjá þér. Auðvitað mótmælum við allir og pössum upp á að kerlingarnar fái ekki að vera með.  Það er göfugt að fylgja sinni sannfæringu hver svo sem hún er hverju sinni. Auðvitað voru allir heiðarlegir Íslendingar á móti Icesave, þess vegna flutti vinur okkar svarti Pétur Blönd tillögu um að skjóta þessu bara á þjóðina. Auðvitað vildir þú það gæsalappi minn hvað annað svo sem ?

En það var svo vitlaust af Óla að skrifa ekki undir, hann hefur áræðanlega ekki skilið ykkur. Hann vissi þó að það þýddi þjóðaratkvæðagreiðslu. Auðvitað er það framasóknar-vitlaust að hafa þjóðaratkvæðagreiðslu. Miklu betra að semja uppá nýtt við tjallana og hollana, ég segi ekki annað. Þess vegna ert þú svo sjálfum þér samkvæmur.

Ég segi enn og aftur elsku Bjarni minn Reykhás að snúast eins og vindhani í Icesave er bæði göfugt og gáfulegt og ættu fleiri að taka þig sér til fyrirmyndar.  Hver var aftur með leiðinda athugasemd um þig Bjarni minn? Eitthvað um að þú hafir verið með Wernerunum að gambla með Sjóvár tryggingarsjóðinn eða eitthvað svoleiðis. Ekki veit ég hvað þetta hyski er að tala um.

Jæja Bjarni minn ég læt þetta duga í bili.

Þín heittelskaða

Magnea

 

 

Bréf 48                                                                                      Þursey 12.jan.2010

Kæri Hannes Hólmsteinn

Mikið var greinin sem þú skrifaðir í Vallarstræti Jórnalinn í janúar síðastliðinn góð, tær snilld. Auðvitað eigum við ekki að borga óráðsíuskuldir óreiðumanna. Maður tali nú ekki um doktor Mikka Mús sem er sérfræðingur í alþjóðalögum sem í aðsendri grein til Finans-Tímanum 8. Janúar. Og svo Broi Madd sem er virtur breskur álitsgjafi og bloggari sem skrifaði í Tímann 9.janúar og maður lifandi ekki má gleyma Rut Suðurlands sem skrifaði pistil í Gardínuna 10.janúar.

Það er nú aldeilis rétt hjá þér að það sé kominn tími til þess að kommarnir í ríkisstjórninni átti sig á því að augu heimsins og eyru beinast að Íslandi og samúðin fossar yfir okkur.

Það er mátulegt að gæsalappi  vitni í gamlan Maóista og græningja  þegar hann segir að okkur komi bara ekkert við þessar Icesave skuldir . Þessi  Lipietz eða hvað hann nú heitir er bara útbrunninn kommi og ekkert annað.  Já Hannes minn það er allt sem þú segir heilagur sannleikur, þar erum við Dabbi sammála þér.

Auðvitað eru  Bjöggarnir, Ólafarnir, Hannesarnir, Jóhannesarnir, Jónarnir, Bjarnarnir, Wernerarnir, Weldingarnir og Bakkabræðurnir alsaklausir af þessu ástandi.  Það er fólkið sem keypti flatskjáina  sem allt þetta er að kenna. Það var aldrei neitt annað.

Þetta eftirlitsbull er bara kommaáróður. Auðvitað græddu allir, sumir bara meira en aðrir og hvað með það ? Er ekki sjálfgefið að allir borgi brúsann, annað væri ekki  sanngjarnt.

Auðvitað gerum við ekkert þótt aðal krimmarnir skreppi til útlanda og híi á okkur aulana fyrir að hafa ekkert gert til að ná af þeim aurunum. Aurarnir eru hvort sem er allir í útlöndum.

Hannes minn þú ert stórkostlegur og betur væri að Ísland ætti svo sem hundraðþúsund Hannesa eins og þig.

Ég þarf að fara til dyra núna. Mér  sýnist Stebba frænka vera að koma.

Skrifa þér aftur við tækifæri.

Þín  Magnea.

 

 

Bréf 49                                                                               Draugaey 9.feb.2010

Kæri Ólafur.

Mikið eru þessir blaðamenn ljótir sem sífellt eru að skrifa um hvað þú sért vondur kall og mikill svindlari. Vita þessir menn ekkert um sheika ? Þeir halda að þessi sheik sem þeir eru að segja að þú hafir keypt fyrir í Kaupþingsbanka sé einhver persóna eins og Finnur Ingólfsson, Jón Ásgeir og Bjöggi Thórs. Þvílík vanþekking. Auðvitað er þetta bara milksheik frá MS með aurabragði og ekkert annað.

Svo eru þeir að blanda allskonar félögum í málið. Eins og Kjalar sé eitthvað svindl þótt það skuldi milljarða ? ó nei þetta eru bara öfundsjúkir lúserar sem ekkert vita um bissnes.

Auðvitað skuldar bankinn Kjalari nokkrar millur það er engin spurning, „of course“

Þeir ættu að skammast sín fyrir vanþekkingu sína á æðri viðskiptum, sem eru ekki fyrir lásí blaðamenn að skrifa um, þótt þeir hafi verið í Súpergaggó á Melunum i áratug að læra hvernig á að blekkja fíflin í landinu.

Nei Óli minn við skulum ekki taka mark á þessu nöldri. Nú áttu stærri hlut í Samskipum en þú áttir fyrir hrun, þökk sé framsókn og gæsalappa.

Hvernig er ástandið á sumarhöllinni þinni ?? er hún nokkuð undir hamrinum eins og íbúðin hans Bubba frænda ?

Mig vantar heimilisfangið þitt í Sviss og símanúmerið svo ég geti haft samband við þig elsku drengurinn minn ef ég þarf „ No matter what“

Vonandi hefur þú það gott þarna í Sviss, er ekki gott skíðafæri núna ?

Seppi biður að heilsa.

Þín einlæga

Magnea.

 

 

Bréf 50                                                                           Djöflaey 7.mars 2010

Kæri Egill

Mikið hitnaði mér um hjartaræturnar þegar ég horfði á þáttinn þinn Silfur Egils í dag.

Hvernig Bjarni gæsalappa-vafningur og Sigmundur glópaláni bókstaflega rúlluðu upp Grími og Jóku. Þeir bókstaflega völtuðu yfir stjórnina og kindin hún Birgitta jarmaði með, hún jarmar svo fallega .

Þetta var tær snilld hjá þeim. Við vitum það öll að ástandið sem er í fjármálum þjóðarinnar er þessu pakki að kenna sem veit ekkert í sinn haus. Halda menn að flokkur gæsalappa hafi eitthvað með það að gera hvernig komið er ? Nei ekki aldeilis. Halda menn að flokkur glópaláns hafi eitthvað með þetta að gera ? nei og aftur nei. Hvorki flokkur Bjarna gæsalappa-vafnings né flokkur Sigmundar glópaláns hafa nokkuð til þessa ástands unnið öðru nær. Auðvitað er þetta allt Steingrími um að kenna.

Þeir sem halda að Steingrímur og Jóhanna séu að gera eitthvað, ráfa um í blindni og reyk. Þau hafa ekkert gert og geta ekkert gert segi ég bara og hef það eftir lambinu Birgittu.

Þeir sem kveiktu þetta efnahagsbál og skammast mest út í duglausa ríkisstjórn standa nú í kringum bálið og míga steinolíu og bensíni á það, og eru langt komnir með að skrúfa fyrir vatnið.

Þjóðaratkvæði eða ekki þjóðaratkvæði hafa bara ekkert að segja, ekki slekkur þjóðaratkvæðagreiðsla þetta bál meðan migið er á það steinolíu og bensíni.

Nei Egill minn það er bara ekki þannig.

Þín

Magnea.

 

 

Bréf 51                                                                           Skuldaey 7.mars 2010

Kæra Ragna-1

Ég veit að það er voða mikið að gera hjá þér við að láta bjóða ofan af fólki íbúðirnar sem það getur ekki borgað af. Því var andskotans nær að kaupa þessa kofa, hefðu betur látið skrifa þá á einhverja aðra.

Ég var að blaða í gömlum blöðum en fann hvergi fréttina frá í ágúst 2008, þú veist þessa með Lýð Guðmundssyni, sem á að hafa sagt að Exista væri að fullu fjármagnað út árið 2009, ábyggilega tóm lygi þessi frétt hefur örugglega hvergi verið birt  allavega ekki í Moggann.

En ég rakst á aðra frétt sem segir að í september 2006 hafi háttsettir starfsmenn og stjórnendur fengið erlend lán hjá Kaupþingi til að kaupa hlutafé í Existu.

Einhver Erlendur fékk 611 milljónir til að kaupa fyrir.

25.september 2008 færði hann auðvitað húsið sitt á nafn eiginkonunnar, þessu hyski sem er núna nöldrandi út í uppboð á sínum eignum var nær, þetta fólk gat sko alveg flutt sín hús á annarra nöfn, ég segi það bara.

Sama gerði sonur ríkissaksóknarans, strangheiðalegur piltur. Sem fékk ekki nema 86 milljónir.

Hann flutti allar eignir sínar í Exista til Tortúlu, rétt fyrir hrun og húsið á eiginkonuna ásamt nokkrum félögum, sem ég man nú ekki nöfnin á, allavega ekki öllum. En það voru víst meðal annars félögin Svalt ehf og Sigurlind ehf. Allt þetta las ég ekki í Mogganum.

En hvað um það Ragna mín mér finnst alveg rétt af þér að slá hvergi af þegar venjulegt launafólk á í hlut sem hefur bara ekkert vit á peningum og meira en það, hefur komið okkur á kaldan skuldaklakann með kaupum á hrærivélum, blóðþrýstingsmælum og flatskjáum, það á ekki betur skilið en að þú látir bjóða ofan af þeim kofana.

Þín einlæga

Magnea

 

 

Bréf 52                                                                                       Fagurey 8.mars.2010

Kæri Bjarni Ármann

Það er langt síðan ég hef heyrt frá þér. En hafðu ekki áhyggjur af því, ég veit að það er mikið að gera hjá þér elsku drengurinn minn.  Öll þessi fyrirtæki og allur þessi gróði hlýtur að taka á og fara í skapið á þér og þínum.

Það tekur á taugarnar að fá 800 milljóna skuld afskrifaða, maður græðir ekki mikið á því. Ekki fór gæfulega þetta Glitnir Property Holding, nei og aftur nei.  Hvað þá Imagine Investments, var það ekki annars félagið sem fékk þessar 800 millur lánaðar sem voru afskrifaðar nú um daginn ?

Elsku Bjarni minn vonandi er í lagi með SecurStore. Ég bara skil ekki í þessu pakki sem heimtar að allt sé boðið út, bara segi það. Hvað með það þótt þú fáir nokkrar millur fyrir frábært starf SecureStore á Skaganum? Hver hefði svo sem átt að kenna fólkinu að endursetja tölvurnar ? ég bara spyr?

Nei Bjarni minn þú skalt ekki hlusta á þetta pakk og halda bara þínu striki. Þegar ég heyrði skýringuna frá þér varðandi þetta lán sem þú lést afskrifa, þá bara vöknaði mér um augun af hrifningu. Ég verð að koma þessu í bréfið til þín Bjarna minn, þvílík snilld.

„Því miður þetta gekk bara illa „ Svona eiga menn að skýra hlutina, „no more no less.“

Þín einlæga

Magnea

 

 

Bréf 53                                                                                       Svindley 8.mars 2010

Kæri Finnur

Það getur bara ekki verið sem ekki er sagt  um þig í Mogganum. Það getur einfaldlega ekki verið satt. Þú sem ert bæði búinn að vera Seðlabankastjóri og viðskiptaráðherra, hver á svo að trúa því að þú hafir klúðrað þínum bissness og að þú skuldir 3,7 milljarða. Þetta FS7 tapaði bara þessu og kemur þér bara ekkert við er það nokkuð?.

Og hvað með það þótt þú hafir Fikt-að eitthvað með þessa peninga, ekki getur þú neitt gert að því þótt þetta Fikt hafi skilað hálfum milljarði í hagnaði, þetta bara kom sisvona. „No matter what.“

Ég verð að segja það um þig elsku Finnur minn að ég hef ekki staðið þig að neinu ójöfnu í minn garð. Hvað aðrir segja verð ég að vísa til Moggans og Fréttablaðsins. Myndin af ykkur Ólafi þegar þið komuð frá henni Valgerði, eftir að hún hafði gefið ykkur Búnaðarbankann ætti að fá verðlaun sem besta frétta mynd allra tíma fyrir hrun. „What else I say.“

Elsku vinur ég læt þetta duga núna , verð í sambandi síðar. Ég er að æfa mig í að skrifa á ensku, og læt einstaka korn fylgja með. „Fuck no matter what.“

Bestu kveðjur

Magnea

 

 

 

Bréf 54                                                                                       Skötuey 9.mars 2010

Kæra  Katrín

Mikið þótti mér leitt sem ég sá um þig ekki í Mogganum nýlega. Þú sem ert svo dugleg að drekka lýsi. Illar tungur segja að það sé í hnotskurn hvernig komið er fyrir þér. Þessar fjárfestingar í FL Group hafa verið gaga segir í blaðinu. Svo er þess  snepill ekki Mogginn að segja að þú hafir verið rekin frá Glitni í febrúar 2008 útaf einhverri greiðslutregðu.

Ég er sannfærð um að þessar skuldir uppá 1.8 milljarða eru allar vegna þess að Steingrími er illa við þig og ykkur öll sem drekkið lýsi, og lætur bara rukkarana kvelja ykkur sí og æ  „I mean it.“

Auðvitað áttu helling af pening í Hnotskurn  sem þú getur slakað í þennan banka sem er að rukka þig. Þú þarft bara að semja um 1.6 milljarða tæpa, það ætti að vera hægur vandi, „I say so.“

Bara örlitlar afskriftir svona milli vina,  what else. Nokkrar „focking“ verðlausar krónur „what is the problem beib.“

Kær kveðja

Magnea

 

 

Bréf 55                                                                                       Glitey 9.mars 2010

Kæri Lárus-1

Hvað eru menn eiginlega að pæla ? Ég bara spyr.Ég verð bara að segja það, so help my good. Hvað er það nema strangheiðarleiki að gera upp skuldir sínar, „I ask you,“ bara.

Lalli minn ég bara vona að ykkur líði vel í beinunum þarna austur í London, mér er sagt að þú sért svo duglegur að þurrka af og ryksuga, að hálfa væri nóg .

Nei það minnist enginn á það hverju þú ert að fórna bakvið eldavélina eins og ráðherrann sagði. „No way.“

Ég fæ ekki betur séð en slysastjórn Glitnis hafi gefið eftir 122 millur af láninu sem þú fékkst gegn greiðslu uppá 89 millur frá þér,  geri aðrir betur „yes I love it.“ Enda er þetta fært í alþýðubúning, „peoples dress,  yes.“

Skuldajöfnun og fullnaðaruppgjör,  „Focking good man.“

Ég ætla bara að vona að hann Bubbi frændi geti gert upp við bankann sinn svona eins og þú gerðir.

Svona fullnægingaruppgjör á bara að leiða í lög, „more or less, yes.“

Elsku drengurinn minn, ég bið kærlega að heilsa henni Gústu þinni kysstu hana frá mér og segðu henni að vera ekkert að hlusta á eitthvað nöldur að norðan, „I say no more.“

Bless elsku drengurinn minn

Þín Magnea

 

 

Bréf 56                                                                                       Heimaey 9.mars 2010

Kæri Magnús

Er eitthvað til í því sem ég las ekki í Mogganum að þú hafir fengið tæpa 50 milljarða afskrifaða, no more no less ?. Er þorskurinn virkilega svona erfiður við þig eða var eitthvað að hjá ykkur ? „Whats the problem man.“

En meðan slysanefnd Landsbankans  er ekkert að seilast eftir kvótanum hlýtur þetta að vera í lagi hjá þér, „no matter what.“

Afskriftir og ekki afskriftir, menn virðast bara vera alveg fastir í þessum frasa maður, ég segi bara, „consumtion“ hvað ?  Magnús „be straight and cool man.“

Þessir pennar sem ekki þora að skrifa í Moggann ættu bara að vera heima hjá sér, og horfa á Leiðarljós eða eitthvað, „else.“

Láttu þessi skrif ekki fá á þig neitt sem heitir, þetta eru bara öfundsjúkir lúserar sem eru að springa úr öfund út í afskriftirnar þínar. „O me good.“ Svo halda þeir að hver sem er geti fengið fullnægingar afskriftir, þeir vita bara ekkert um slysanefndirnar,  maður verður sko að vera „related“ en þetta skilja þeir ekki , „no man focikng craps they are.“

En elsku Maggi minn vertu alveg rólegur fíflin hans Þráins muna ekki neitt til lengdar, fyrir utan það sem ég var að segja, skilja ekki það sem þeir gleyma eða þannig sko , skilurðu sko?.

Maggi minn ég hef þetta ekki lengra núna.

Þín besta,

Magnea

 

 

Bréf 57                                                                           Heimskaey 15.mars.2010

Kæri Magnús

Mér fannst þetta helvíti gott hjá þér að gera 34 milljóna kröfu í þrotabú Glitnis. Það er annað mál þótt Magina ehf. Skuldi  1,2 milljarða sem á að greiða 2012, sko bara kemur ekki við þessari kröfu, „no way.“ Svo var þetta bara kúlulán upp á 800 milljónir en ekki neina milljarða, „what is the problem.“

Svo ertu nú besti vinur Weldings og það vegur nú aldeilis maður, „yes.“

Það verður sko að greina vini frá óvinum þegar á að rukka. Það bara gengur ekki að rukka alla jafnt. Menn verða að hafa svigrúm til að afskrifa eða hvað ?

Svo má semja um lokagreiðslur og fullnaðaruppgjör ef borgað er smá og restin afskrifuð „what else.“

Kæri Maggi minn ég las þetta um Magina ehf, ekki í Mogganum.

Þín

Magnea

 

 

Bréf 58                                                                                       Geitaey  15. Mars 2010

Kæri Magnús P

Elsku Maggi minn P. Ég var að skrifa nafna þínum honum Magga AA.  Þið Maggarnir eru sko mínir menn það verð ég að segja. Flott nafn  á þínu félagi Langidalur ehf. Þegar ég heyri eða sé nafnið Langidalur dettur mér alltaf í hug Geitaskarð. Það eru að vísu engar geitur á Geitaskarði en hvað með það,  „noname.“

Þú gerðir ekki nema 32 milljóna kröfu í þrotabú Glitnis, ég skil bara ekki þessa hógværð í þér, man. Þú sem ert vinur Jakobs í Stím, „I say no more.“

Hvað með það þótt þú hafir fengið svo sem eins og 520 milljóna kúlulán til að eignast bankann sem þú vannst hjá. Þetta var á velgengnistímum þegar sólin hafði ekkert að gera nema skína. Ég bara botna ekkert í þessum skrifum sem eru ekki í Mogganum um að þú skuldir 741 milljón í valútu, „fock them all.“

Þótt Langidalur skuldi 787 millur umfram eignir eru nú ekki mikil tíðindi nú til dags, „no no no.“ Bara að afskrifa smá, þá er málið leyst, „no deal man.“

Elsku Maggi minn, kærar kveðjur

Þín Magnea

 

 

Bréf 59                                                                        Mosfellsey 15.mars 2010

Kæri Kristján A

Það hefur aldeilis verið stuð á ykkur hjónunum 245 landsleikir hvorki meira né minna, „yes man yes.“ 1123 mörk ekkert smá. Það má nú aldeilis nota það maður. 7hægri eða vinstri ehf eða ekki ehf,  „beats me.“

Ég las það ekki í Mogganum að 7hægri eða vinstri skuldi 2 millarða.

Það er áræðanlega tómt rugl, Hún Gerða mín hafði ekki hugmynd um þetta 7vinstri ehf eða var það 7hægri ehf. Alla vega hafði hún ekki minnstu hugmynd eins og hún sagði vinkona hennar í útvarpið um daginn, enda segja eiginmenn ekki nærri alltaf kvinnum sínum frá fyrirtækjum sem þeir eiga, „no way.“

Hvernig átti svo sem Gerða að vita hvort Stjáni ætti hægri eða vinstri, ég segi bara það.

Svo er þetta ekki nema 1.780.943 krónur á mark sem 7vinstri eða hægri skuldar, „what´s the problem beib ?“

Illar tungur sem skrifa ekki í Moggann segja að þú hafir fengið kúlulán til að kaupa bankann sem þú vannst hjá. Hvernig átti svo sem Gerða að vita það, hún sem var ráðherra  og hafði sko nóg að gera. Auðvitað alltof þreytt þegar hún kom undir sængurhornið hjá þér til að stunda einhverjar yfirheyrslur.

Ég segi bara Stjáni minn, „fock them all,“ og svei til viðbótar.

Þín

Magnea

 

 

Bréf 60                                                                                    Bulluey  30.mars 2010

Kæra  Jóhanna

Þetta er nú meira bullið í henni  dóttur Móses.  Hvað veit hún svo sem um ketti ? ekki er hún köttur eða hvað ? „what else.“

Það er ekki að því að spyrja með þessa Villu-græna, þeir sjá óvætti út um allt. Ég verð nú bara að segja það Jóka mín að manni getur ofboðið hvernig þetta fólk fer út og suður, það er eins og það ráfi eftir mörgum stígum án þess að vita hvert þeir liggja. Svo vita sumir VG ekki hvert þeir eiga að fara, eða hvort þeir eigi yfir höfuð að fara eitthvað.

Ég bara segi það enn og aftur, mér finnst Steingrímur  vera eins og grár köttur eftir þessum Jónassonum og Mósesdætrum og  öðrum villuráfandi VG-um. Það er löngu tímabært að Grímur fari að koma skikki á þessa hjörð sína, og setji þeim stefnuna. Til eru tæki og tól til að auðvelda honum þetta, til dæmis mætti nota GPS þótt það sé amerískt . Svo mætti hann bæta því við að þessir VG ættu ekkert með að fokka svona í þér.

Jóka mín ég verð að segja það eins og mér finnst. Betri er einn köttur í hendi en tíu villuráfandi í óbyggðum. Við ég og hann Brandur minn erum hjartanlega sammála þér um að Grímur verði að smala þessum köttum sjálfur og reka þá til þín, svo þeir geti mjálmað í kórnum þínum.

Hverjir gleðjast svo yfir þessum villtu dýrum aðrir en Bjarni gæsalappa-vafningur og Sigmundur glópalán ég bara spyr ? Þeir fitna eins og Dóri og Dabbi á fjósbitanum í hvert skipti sem þú hastar á þessa Villu-grænu ketti.

Elsku dúllan mín þetta verður ekki lengra hjá mér núna, „I say no more.“

Þín einlæga.

Magnea

 

 

Bréf 61                                                                        Askarey 4.apríl 2010

Kæri Tryggvi Þór

Þá eru páskarnir langt gengnir, og ég fletti. ekki gömlum moggum. Í þeim sá ég ekki þetta.

Einkver Karl Pétur Jónsson var ráðinn til Askar Capital til að flokka pappíra með meiru. Þegar hann kallar á tengdapabba, kallar hann Óli og stundum Óli forseti.

Tryggvi Þór sem var rekin frá Askar skrapp til USA í vikunni sem ætlast er til að þingmenn noti til að ræða við sína kjósendur. Kjósendur hans eru ef til vill á Florida, eða í grennd um þessar mundir.

Tryggvi þessi Þór var einu sinni forstjóri Askar Capital, var rekin þaðan og lofað að hann þyrfti ekki að borga kúlulán sem hann fékk í askinn sinn hjá Askar Capital, heppinn, „lucky“ gæi.

Þá varð hann efnahagsráðgjafi Geirs Haarde og ráðlagði honum heilt, eða allavega hálft.  Sagðist ekki hafa neinna hagsmuna að gæta hjá Askar þótt hann væri á súperlaunum hjá þeim á sama tíma og hann var ráðgjafi Geirs.

Rekin frá Geir, og kosinn á þing. Aðspurður um hagsmuni sagði Tryggvi að hann ætti þriðjungs hlut í sumarhúsi í Mjóafirði og aðgang að þremur básum í hesthúsi í Víðidal, annað ekki.

Tryggvi telur ekki rétt að skattleggja gróða ef hann er tilkominn vegna afskrifta, þær eiga að vera skattfrjálsar segir Tryggvi.

Hann er talinn hafa níu líf og vera einhver mesti rótari í íslenskri pólitík. „I say no more.“

Tryggvi manstu eftir partíinu í Annabels í London ? Ekkert smá fjör maður segðu, en það kostaði maður ekkert smá.

Bless Tryggvi minn

Þín Magnea.

 

 

Bréf 62                                                                                       Enginey 9.apríl 2010

Kæra Ingibjörg Sólrún.

Mikið þykir mér vænt um að lesa í ekki mogganum um að þú sért alsaklaus. Þetta hef ég svo sem alltaf vitað, það er ekki það,  „me dear.“

Hvað með það þótt þú hafir fengið að lesa svo sem fjórar síður úr þessari svokallaðri rannsóknarskýrslu, sem enginn hefur fengið að sjá og enginn á að fá að sjá fyrr en á mánudaginn,? „no way.“

Ég bara segi það hvað eru þessir pésar að bera uppá þig að þú hafir vitað eitthvað sem einhverjir ráðherrar vissu um peningamál. Hvað á það að þýða að vera að „focka“ í þér, vita mennirnir ekki að þú varst að smala múslimum, meðan Haarde stýrði öllu til fjandans ásamt vini þínum og flokksbróður, honum…. hérna hvað heitir hann nú ? jú ég man það núna, Sigurður eða Sigurðsson, „I dont care: fock him any way.“

Ég meina bara, það var gott hjá þér að segja þýskurunum að þú hafir ekkert getað gert því þér var ekkert sagt.

Hvað voruð þið Siggi í Kaupþing aftur að gera til Köben ? Voruð þið ekki að segja vitleysingjunum í Danska banka að þeir hefðu ekkert vit á íslenskum fjármálum, og ættu ekkert að vera að rífa kjaft. Bankamálin væru sko skotheld á Íslandi og ekkert að þeim.

Helvítis „focking fock“ er þetta.

Elsku Solla mín, mér dettur ekki í hug eitt augnablik að þú verðir dregin eitt eða neitt útaf þessu sem stendur á þessum fjórum síðum sem þú nefndir að þú hafir fengið að lesa yfir öxslina á einhverri rannsóknarnefnd, fyrr í vikunni, no way að ég trúi þessu.

Þín einlæga

Magnea

 

 

Bréf 63                                                                                   Stubitey 12.apríl 2010

Kæru bræður.

Bjarni gæsalappa-vafningur og Sigmundur glópalán. Nú er þessi blessaða skýrsla að koma fyrir sjónir Íslensku þjóðarinnar, „time is on.“

Ég ætla að ráða ykkur heilt eins og ég geri ævinlega. Þið félagarnir ættuð nú í nafni og fyrir hönd ykkar bestu manna Davíðs og Halldórs að bjóða þjóðinni á fyllerí, „I mean it yes.“

Þetta kostar bara brot af þeim styrkjum sem flokkurinn hefur þegið af útrásinni.

Látið opna allar vínbúðir landsins og bjóðið öllum sem vilja að drekka eins mikið og þeir geti í sig látið. Þetta kostar ekkert miðað við það sem við erum búin að borga og eigum eftir að borga fyrir bullið í ykkur íhalds og framsónar-bubbunum  undanfarna áratugi. Bara smáaurar, hugsið ykkur ánægjuna sem þessu fylgir, „yes.“

Heil þjóð á skallanum meðan kyrjuð er einhver hryllingsskýrsla í þinginu, „me good I say no more.“

Börn og templarar sem ekki mega né vilja drekka guðaveigar , eiga að fá eftir mínu viti eins mikið kók og prinspóló og þeir torga, og auðvitað í boði Bónus, „genius“ ekki satt?

Þið ættuð at taka til skoðunar hvort ekki ætti að lækka aldurstakmörk til brjóstbirtu-inntöku niður í 10 ár í einn dag,ég meina í dag.

Kæru bræður ég vænti þess að þið látið verða af þessu í nafni Dabba og Dóra.

Ykkar ástkæra

Magnea

 

Bréf 64                                                                                   Valiney 12.apríl 2010

Kæru systur.

Auðvitað var það Bjarni gæsalappa-vafningur sem hafði forgöngu um að skipa þessa rannsóknarnefnd sem allir eru að eigna sér. Hvaða kjaftæði er þetta að einhver annar hafi fundið uppá þessu, „no way“ segi ég þvílíkt bull.

Allir vita segi ég að þið Sjálfstæðismenn hafið aldrei gert neitt sem gæti hugsanlega komið sér illa fyrir kjósendur ykkar. Allt þetta bull um að Dabbi og félagar eigi einhverja sök er bara illgirni og ósannindi.

Sagan mun sýna,  hvað svo sem þessi skýrsla segir,  að þetta var allt helvítinu honum Steingrími að kenna,  „fock him.“

Gerða mín og dýralæknirinn í Hafnarfirði þurfa sko engu að kvíða, „no way.“ Hvað þá heldur drengurinn sem var vélaður til að stjórna bankamálum ó nei.

Nú er að setja ríkistjórnina af og láta Bjarna gæsalappa-vafning og Sigmund glópalán taka við, „I mean it yes.“

Nú er að bretta upp ermarnar og moka inn fyrrverandi bankastjórum og fylgis-já mönnum þeirra og biðja þá afsökunar á að það hafi verið hastað á þá. Jafnvel greiða þeim skaðabætur úr ríkissjóði til að milda skap þeirra.

Ég segi það vinir mínir hlustið ekki á helvítis kommann, spyrjið heldur Halldór verkfræðing hvort nokkuð sé hæft í því að spillin hafi verið hjá hans fólki. Nei auðvitað var engin spilling á ferðinni hjá Gæsalappa-flokknum, og þá ekki heldur hjá Glópalánsflokknum.

Nú eiga menn bara að detta í það og vera á viku fylleríi í boði Gerðu leikaradóttur.

Magnea

 

 

Bréf 65                                                                           Purkey 13.apríl 2010

Kæri Jón Valur

Mikið er ég sammála ykkur Hannesi Hólmsteini, Þið bendið rækilega á hvernig Samfylkingin fór með allt  til helvítis og hvernig Davíð varaði við, ekki einu sinni, ekki tvisvar, heldur mörgum sinnum. Hvorki Hannes né þú Jón minn Valur nefnduð einu orði Framsókn, sem von er.

Framsóknarmenn eru hreinir englar og ekki dettur mér í hug að halda öðru fram. Halldóri  Ásgrímssyni gekk bara gott eitt til þegar hann lét Valgerði selja vinum sínum Búnaðarbankann. Engum dettur annað í hug en Davíð Oddssyni hafi gengið eitthvað annað en gott eitt til, þegar hann lét selja vinum sínum Landsbankann.

Auðvitað er það hárrétt hjá ykkur að Ingibjörg Sólrún ásamt Jóni Ásgeiri settu alla bankana þrjá á hausinn, hverjir svo sem aðrir ?

Ekki voru það Björgólfs-feðgarnir ó nei. Ekki voru það Bakkabræður, ó nei. Ekki voru það ‚Ólafur og Finnur ó nei, það var helvítis drósin hún Solla, hver svo sem önnur ég bara spyr. Það var heldur ekkert að hjá Geira Haarde, ó nei. Hann stjórnaði af sanngirni og festu, eins og þið Hannes ætluðuð að segja.

Þið þarna úti sem stjórnið illpennunum og öfundarpennunum ættuð að skammast ykkar og biðja Geir greyið og Davíð afsökunar á skrifum ykkar undanfarið ár, rúmlega.

Það kemur glöggt fram í þessari svokölluðu skýrslu um hrun bankanna að þið, Þú Jón vinur minn og Hannes Hólmsteinn félagi þinn hafið haft rétt fyrir ykkur allan tímann.

Þar fyrir utan held ég að skýrslan segi raunverulega það sem þið eruð að segja, svona ef rýnt er djúpt i hana, þetta var allt Jóni Ásgeiri og Ingibjörgu að kenna og hana nú.

Kær kveðja

Magnea

 

 

Bréf 66                                                                           Hafnarey 19.apríl 2010

Kæra Þorgerður K

Mikið varstu nú réttsýn og yfirveguð í partíinu í Stapa. Þú bara fékkst margar stjörnur fyrir það að biðja flokkinn afsökunar. Ég er sko sammála þér að þjóðin þurfi engar afsakanir frá þér, enda hefur þú ekkert gert á hlut þessarar þjóðar út af fyrir sig. Það er auðvitað fólkið í partíinu sem er fullt vorkunnar og hefur nú meðtekið afsökunina og klappað fyrir þér.

Mér finnst svo sem eins og Bjarni gæsalappa-vafningur ætti sisvona að íhuga hvort hann þurfi líka að biðjast afsökunar á einhverju.

Hvað er fólkið  líka að  gera með nefið ofaní ykkar koppi ? Stjáni skuldaði ekkert og hvað þá heldur þú Gerða mín. Mér finnst þetta bara alveg óþarfi að vera með eitthvað væl út í gerða hluti, afsakaðu er meira en nóg fyrir þetta pakk.

Vonandi kemur þú aftur til starfa fyrir þjóðina sem allra fyrst. Þessi svokallaða nefnd sem á að lesa áróðursskýrsluna sem kom upp um ykkur hjónin á áræðanlega eftir að komast að því að þú hafir ekkert gert ólöglegt né ósiðlegt.

Elsku dúllan mín, ég segi bara. Áfram Gerða, áfram Gerða, áfram Gerða „yes.“

Þín elskaða

Magnea

 

 

Bréf 67                                                                           Valdísarey 21.apríl 2010

Kæra Steinunn Valdís

Mikið er þetta skítapakk sem vogar sér að fara heim til þín með kröfu um að þú hættir að gera gott á Alþingi ómerkilegt. Hvað með það þótt þú hafir fengið einhverja smáaura frá Baugi og Landsbankanum ? þetta voru skitnar fimm og hálf milljón „so watt“  segi ég bara.

Mér finnst það ekki ná nokkurri átt að fólk sé að bögga ykkur Þorgerði út af smámunum eins og þessu. Hverjar koma á eftir mér er spurn ? Verða það kannski Ingibjörg og Jóhanna eða ef til vill Ragnheiður Ríkkadóttir eða Katrín Júlladóttir ? ég bara spyr.

Þið eigið öll börn eða gamalmenni sem svo þetta pakk ætti að sjá sóma sinn í að vera ekkert að þessu. Eins og við vitum öll er friður á hverju heimili samkvæmt Ólínu Þorvarðar, varinn í stjórnarskrá og Evrópu lögum og ábyggilega einhverjum fleiri lögum. Svo þið skuluð bara haga ykkur.

Það gegnir allt öðru máli þegar fógetinn kemur heim til ykkar til að bera úr sófaborðið alhússtólana og rúmin. Þá þýðir ekkert fyrir ykkur að bera börnin fyrir ykkur. Þeim er einfaldlega mokað frá og sagt að vera ekki fyrir.

Löggan veit sko alveg að það er fyrir óráðsíu ykkar sjálfra að kenna hvernig komið er fyrir ykkur, þótt krakkarnir séu með hor niður á bringu og tár niður á höku kemur fógetanum það bara ekkert við. Út skal hyskið og hana nú. Friðhelgi hvað ? „Fokk“ þessu helvítis friðhelgi þegar þarf að rukka.

En mútuþægu elskurnar sem þessi gjaldþrota fífl kaus til að sitja í hlýunni  við Austurvöll þau eiga að njóta friðhelgi bæði einkalífsins og atvinnulífsins og fyrir alla muni á ekki að ráðast á þau fyrir augum barna og gamalmenna.

Í ykkar sporum myndi ég segja við þetta pakk sem er að bögga ykkur „skrú jú“ og hundskist heim í hreysin ykkar fram að næstu kosningum. Þetta var hvort sem ykkur að kenna allt saman, ég gerði mitt besta. „I say no more.“

Þín ástkæra

Magnea

 

 

Bréf 68                                                                           Engey 5.maí 2010

Kæri Guðlaugur.

Mikið komstu vel fyrir í sjónvarpinu í gærkvöldi. Ég bara skil ekki í þessum fréttasnáp hvað hann var að fara eiginlega. Þú marg sagðir honum og áhorfendum að þú hefðir farið eftir ströngustu reglum, og ekki vikið frá þeim ekki einu sinni þegar þú fórst í laxveiðina með öllum Baugurunum og bankamönnunum. Ég bara trúi ekki öðru en þú hafir borgað fyrir þig og jafnvel splæst á hina, nóg var af millunum hjá þér í sjóðnum.

Auðvitað ertu strang heiðarlegur eins og allir Sjálfstæðismenn, það er ekki málið. Ríkisendurskoðandi stimplaði þig í lagi og Geir og Davíð gerðu engar athugasemdir, þarna sérðu, alger reglumaður sem mátt ekki vamm þitt vita.

Það er annað en með hana Steinunni sú svindlherfa ekki nema gott á hana að fólkið mæti fyrir framan hjá henni og híi á hana. Ekki getur hún sagt að hafa farið eftir ströngustu reglum. Þar á bæ eru örugglega engar reglur til að fara eftir.  Það er annað með þig elsku Gulli minn. Þetta pakk sem var að púa á börnin þín er ekkert annað en uppreisnarhyski og landráðapakk. Ég er hjartanlega sammála þér, það á sko að stinga þessu pakki öllu saman í steininn, „yes me dear.“

Ég skil vel að þú þurfir að fá auglýsingastofur til að orða fyrir þig hugmyndir sem þú færð fyrir kosningar, það kostar nú sitt að hafa þessa sérfræðinga í vinnu og svo þarf að prenta þetta allt saman, það kostar líka sitt. Tuttugu og eitthvað millur, þær eru nú fljótar að hverfa í þessum bransa.

Gulli minn ekki gefa eftir ekki einu sinni eina tommu hvað þá meir. Við vitum vel að þú vinnur eins og sannur Sjálfstæðismaður vinnur, sjáðu til dæmis hana Þorgerði leikaradóttur og Illhuga níunda, þetta eru líka fyrirmyndar Sjálfstæðis fólk. „Yes.“

Ekkert hafa þau gert af sér, því skil ég bara ekki af hverju þau fóru í frí. „No way.“

Gulli minn ég kveð í bili

Þín

Magnea

 

 

Bréf 69                                                                           Djöflaey 7.maí 2010

Kæra Ólína

Mikið ertu nú skynsöm, en það sjá barasta ekki allir. Auðvitað er ekkert vit í því að kjósa „alvöru flokka“  þegar maður á kost á því að kjósa eitthvað skemmtilegt.

Það ætti öllum að vera ljóst að það er ekkert grín að stjórna fíflunum í landinu,en sennilegast er að grínistar geti það, því þið „alvöru“ stjórnmálamenn hafið sýnt getu ykkar til þess með heldur döprum árangri.

Ég bara segi það að kjósendum má vera slétt sama hverju grínistarnir lofa, því loforð „alvöru þú veist flokkanna“ er eins og hvert annað grín. Þið mútuþegar allra flokka ættuð að sjá sóma ykkar og taka ykkur frí frá „alvöru“ stjórnmálum. Nema ekki þú Ólína mín, þú ert lang best engin spurning, „no question“ eins og Reykhás sagði.

Ég verð að játa það elsku dúllan mín, að ég fæ gæsahúð af hrifningu í hvert sinn sem ég heyri þig tala á þinginu, þú talar svo fallega að maður bara gleymir stað og stund, en verst er að maður bara gleymir öllu sem þú segir.

Þú ert sko alvöru stjórnmálakona sem veist uppá hár hvað gera má og hvað ekki. Taktu bara ekkert mark á þessu pakki sem ekki veit neitt í sinn haus og atar þig í pólitískri drullu. Þú ert lang best og hana nú. Við konurnar eigum að standa saman á röngunni og réttunni, bæði slétt og brugðið.

Þín ástkæra

Magnea

 

 

Bréf 70                                                                                       Bulluey 20.mai 2010

Kæra Ingibjörg S.

Nú er fyrrverandi ritstjóri búinn að skrifa höfuðlausn fyrir Davíð fyrrverandi. Auðvitað var Davíð alla tíð að reyna að koma í veg fyrir að þrjótarnir í Baugi settu bankana á hausinn, það sjá allir. Það þarf ekki að spyrja að því,  að hvorki Davíð né Halldór frammari áttu nokkurn skapaðan hlut þátt í sölu Búnaðarbankans og Landsbankans. Það er með engu móti hægt að kenna þeim um hvernig þær sölur fóru fram. Og sama má segja um þjófinn Hannes, hugmyndafræði er ekki sama og hugmyndir.

Auðvitað var þetta allt saman helv.. honum Jóni Ásgeiri að kenna, „nothing else.“

Þið kjósendur skuluð muna það í næstu kosningum að það var Sjálfstæðisflokkurinn undir og með undirliggjandi stjórn Davíðs sem barðist alla tíð fyrir opnu söluferli bankanna, hvað annað.

Það var líka undirliggjandi að bankarnir ættu að vera í almenningseign. Var það ekki Davíð sem sagði það einu sinni ? Jú en svo kom helv… hann Jón Ásgeir og skemmdi þetta allt saman, hver annar ég bara spyr ?.

Ég er viss um að þessi Jón Ásgeir er laumukommi sem hefur verið plantað í bankana til að koma þeim á hausinn og þjóðinni með. Auðvitað vissir þú mín kæra Ingibjörg ekkert um það, það sagði enginn þér hvað var í gangi, enda fylgdu engar skýringar með mútunum frá Baugi til ykkar í Samfylkingunni.

Hvernig gast þú áttað þig á þessu ? Ég bara spyr ?

Nei Solla mín það verður ekki hægt að skrökva upp á ykkur Dabba, Styrmir hefur í höfuðlausninni í eitt skipti fyrir öll dregið fram sannleikann um Jón Ásgeir og hvernig hann smaug inn að beini þjóðarinnar og saug allan merginn úr þeim og át svo allt holdið af þeim, og hana nú, „I say no more.“

Munum XD í næstu kosningum XD XD XD „what else?“

Þín

Magnea